Samsæriskenning um fasteignamarkaðinn

Púkinn heyrði nýlega kenningu sem átti að útskýra hvers vegna fasteignaverð hefur ekki fallið meira en það hefur gert. 

Ástæðan, sagði nafnlausi heimildarmaðurinn, er sú að bankarnir eru á skipulagðan hátt að halda fasteignaverðinu uppi þangað til allir sem geta hafa samþykkt 110%-leiðina - þá, en ekki fyrr, má leyfa verðinu að falla.

Þangað til það hefur gerst sitja bankarnir á þeim fasteignum sem þeir eiga - ef þær færu á markaðinn myndi fasteignaverð lækka almennt.  Að auki stunda bankarnir fasteignaviðskipti milli fyrirtækja sem þeir stjórna - en á hærra verði en teljast má eðlilegt.

Er eitthvað til í þessu?   Púkinn er ekki viss - en víst er að bankarnir sitja uppi með mikið af fasteignum og fasteignatryggðum lánum ... verðfall myndi koma þeim illa.

 

Enn líf í fasteignamarkaði

Athugasemdir

[Óskar Þorkelsson, 4.7.2011 kl. 11:39]

þetta er alls ekki ólíklegt

[Guðmundur Ásgeirsson, 4.7.2011 kl. 13:11]

Þegar fólk situr uppi með fullveðsett húsnæði eins og eftir 110% leiðréttingu, þá hefur enginn hagsmuni af því að verðið falli, því þá verður neikvæð staða lánsins enn verri og veðtrygging bankans fyrir láninu þeim mun rýrari.

Tilkynnt hefur verið að fasteignamat íbúðarhúsnæðis mun hækka um 9% næstu áramót. Ég veit hinsvegar ekki til þess að það byggi á neinu öðru en óskhyggju. Kannski er það bara til að gera ráð fyrir kaupmáttarrýrnun nafnvirðis, með öðrum orðum að verðtryggja fasteignamatið.

[Sumarliði Einar Daðason, 5.7.2011 kl. 11:54]

Ég tel þetta sennilegt. Það er t.d. lífsnauðsynlegt fyrir Íbúðalánasjóð að fasteignaverðið haldist uppi - og jafnvel hækki!

Sumir eru farnir að benda á að sjóðurinn sé hættulega nálægt því að vera tæknilega gjaldþrota. Hátt fasteignaverð styrkir eignasafn þeirra.

Þannig má segja að sama vitleysan og fyrir bankahrun er komin á fullt aftur en núna hangir hún á ennþá veikari bláþræði.