Gyllti áttavitinn - hættulegur börnum?

Vera má að ein ástæða þess að Gyllti áttavitinn skilaði minni peningum í kassann um síðustu helgi en vonir stóðu til sé að ýmsir "kristnir" hópar hafa staðið fyrir aðgerðum til að hvetja fólk til að sniðganga myndina og meðlimir þeirra keppast nú við að senda hver öðrum tölvupósta um þessa voðalegu mynd.

Boðskapur myndarinnar er stórhættulegur að sumra mati - eitt þemað í henni er nefnilega um sjálfstæða, gagnrýna hugsun, í stað þess að trúa bara í blindni því sem trúarleg yfirvöld boða.

Að vísu virðist sem þessir gagnrýnendur hafi hvorki horft á myndina, né lesið bókina, því tölvupóstarnir eru uppfullir af beinum rangfærslum, en það kemur Púkanum svosem ekkert á óvart. 

Trúleysingjar eru margir hverjir ekkert sérstaklega ánægðir með myndina heldur, því þessi boðskapur hennar hefur verið útvatnaður verulega í myndinni - það er miklu betra að lesa bara bækurnar beint.  Það er hins vegar einmitt það sem sumir fyrrnefndir aðilar eru hræddir um - þeir líta sumir hverjir svo á að höfundur bókanna,Philip Pullman, sé einn af þremur hættulegustu mönnum samtímans, ásamt Richard Dawkins og Sam Harris.

Púkinn hins vegar glottir.  Þetta upphlaup verður bara til þess að vekja meiri athygli á myndinni. 

Vonbrigði með aðsókn á Gyllta áttavitann

Athugasemdir

[Linda, 10.12.2007 kl. 17:05]

Spyr sú sem ekki veit, hvað er svona hættulegt við þessa mynd?, mig hefur hlakkað til að fara að sjá hana, elska ævintýramyndir hef alltaf gert. 

[Sveitavargur, 10.12.2007 kl. 17:07]

Hann er ekki hættulegur börnum heldur fávísum foreldrum þeirra.  Guð forði þeim frá því að svara spurningum barnanna, sem náttúrulega gerist ekki öðru vísi en að sniðganga spurningarnar.

[Brynjólfur Þorvarðsson, 10.12.2007 kl. 21:27]

Bækurnar eru ágætar, man nú ekki eftir að þær séu svo andkristnilegar. En ég man eftir bloggfærslu frá íslenskri konu fyrir nokkrum árum, fór á trúarhátíð í Noregi og gisti í heimahúsi, en í næsta herbergi svaf barn og var með Harry Potter í hillu. Konugreyið svaf ekki fyrir andsetningu frá galdraskruddunni hinu megin við þilið, jafnvel þótt hún lægi á bæn alla nóttina.

Þær leynast víða hætturnar!

[DoctorE (IP-tala skráð) 12.12.2007 kl. 09:21]

Kristlingar... eru sjálfum sér verstir