Hjólreiðastígar...huh!

Púkinn fer venjulega fótgangandi til vinnu, enda með hundinn sinn í för.  Leiðin liggur að hluta meðfram hjólreiðastígnum við Lönguhlíð - ef hægt er að nefna hann því nafni, því hann er oft á mörkum þess að vera nothæfur sem slíkur.

Ástæðan er einfaldlega sú að íbúar nærliggjandi húsa nota stíginn sem bílastæði og til undantekninga heyrir að stígurinn sé hindranalaus - nánast alltaf eru einhverjir bílar á stígnum - og þessa dagana er jafnvel einn gámur þar.

Púkinn hefur aldrei orðið var við að neinn þessara bíla fái sektarmiða fyrir að leggja á hjólreiðastíginn, en honum er spurn - hvers vegna er Reykjavíkurborg að þykjast vera að leggja hjólreiðastíga hér og þar, en hirðir síðan ekkert um að halda þeim opnum fyrir hjólreiðafólki?

Er hagt að hringja í eitthvað númer til að leggja fram kvörtun - nú eða bara að láta draga bílana í burtu, eða eiga .þetta bara að vera þykjustuhjólreiðastígar?

Nýtt kort fæst gefins

Athugasemdir

[Hildigunnur Rúnarsdóttir, 24.9.2008 kl. 23:06]

já, þetta var fínt í smá tíma í sumar, nú nær ónothæft. 

[Lára Bryndís Eggertsdóttir, 25.9.2008 kl. 10:19]

Og ekki rutt á veturna og glerbrot ekki sópuð, dálítið "víst-gerum-við-eitthvað-fyrir-hjólreiðamenn"-legt að leggja þetta hjólastígabílastæðisfurðuverk.

[Kári Harðarson, 25.9.2008 kl. 12:20]

Þarna skilur milli Feigs og Ófeigs.  Það er auðvelt að leggja stubb af hjólastíg, það kostar bara peninga skattborgara.  Það er meira mál að breyta stefnunni í málum hjólreiðamanna, því það kostar mikla vinnu þeirra sem eru kosnir.

Dáldið eins og munurinn á að kaupa kort í ræktina eða þurfa að mæta reglulega.

Þegar ég var hvað pirraðastur á þeim sem lögðu á hjólastíga hringdi ég í lögguna en það var vanþakklátt því löggan vill helst ekkert af þessu vita.

[Arnar Pálsson, 28.9.2008 kl. 18:18]

Hjartanlega sammála. Bílar um stíga, stéttir og jafnvel þvert á götuhornum. Er kominn á franska hópferð, með veltum bílum, múrsteinum og sítrónum til að verjast táragasinu? Þá myndi löggan kannski svara erindinu : )

[Púkinn, 7.10.2008 kl. 10:53]

Það er með þetta eins og annað - lögreglan "sér ekki ástæðu til að aðhafast"