Hver er "eðlileg" vanskilaprósenta?

Jafnvel á mestu uppgangs- og "góðæris"tímum eru alltaf einhverjir sem fara í þrot, annað hvort vegna óheppni eða rangra ákvarðana.

Í venjulegu árferði er ekkert verið að hugsa um að bjarga þessum hópi, en á þessum erfiðu tímum sem ríkja í þjóðfélaginu heyrast raddir um að það verði að bjarga öllum.

Að mati Púkans er þetta ekki aðeins rangt og óréttlátt, heldur líka hreinlega hættulegt.

Hluti þeirra sem stefna nú í gjaldþrot hefði sennilega endað þar líka þótt hrunið hefði ekki komið til - af hverju ætti að bjarga þeim núna, þegar ekki hefði verið lyft litla fingri til að bjarga fólki í nákvæmlega sömu stöðu á þeim árum þegar allt virtist leika í lyndi?

Aðrir stefna í gjaldþrot fyrst og fremst vegna eigin heimskulegu ákvarðana - fólk eyddi langt um efni fram, tók lán til að borga lán sem það tók til að fjármagna eyðsluna eða fjárfesti í sápukúlum eða öðru álíka gáfulegu. Af hverju ætti þjóðfélagið að bjarga þeim sem bera að öllu leyti ábyrgð á eigin vandræðum?

Svo eru auðvitað þeir sem stefna í gjaldþrot vegna ytri aðstæðna - fólk sem missti eignir sínar þegar bankar og sjóðir hrundu - fólk sem missti vinnuna og hefur jafnvel verið án atvinnu í langan tíma.  Púkinn styður þær aðgerðir sem hjálp þessum hópi - það er fyllilega réttlætanlegt að samfélagið aðstoði þá sem lenda í vandræðum vegna ytri aðstæðna.  Púkinn vill í raun líkja þessu við neyðaraðstoð vegna (efnahagslegra) náttúruhamfara.

Það verður að draga línuna einhvers staðar.   Það er hreinlega ekki hægt að bjaga öllum - það eru aðilar sem munu fara í gjaldþrot sama hvað gerist - spurningin er bara hversu hátt það hlutfall "á" að vera.  10.1% er of hátt....en hvert er "eðlilega" hlutfallið?

Yfir 10% heimila í vanskilum

Athugasemdir

[Einar Guðjónsson, 19.11.2010 kl. 10:43]

Átti ekki bara að draga línuna við bankana ? og láta þá fara á hausinn og þar með hefðu allir setið við sama borð. Innlánseigendur tapað öllu sínu nema 20.000. Evrum og skuldarar þá getað borið fyrir sig vanefndir og skaðabótarök ? Í staðinn var bankamönnum og innlánseigendum bjargað eingöngu.

[Jóhannes Laxdal Baldvinsson, 19.11.2010 kl. 13:38]

Auðvitað er sjálfsagt að koma til móts við skuldara vegna forsendubrestsins. En það má ekki teygja sig yfir lækinn. Það á að setja fé í leiguhúsnæðiskerfi en ekki styrkja séreignastefnu á kostnað ríkisins

[Guðmundur Ingi Kristinsson, 20.11.2010 kl. 04:51]

Ef ætti að finna út eðlilega (normal) vanskilaprósentu væri ráð að taka tölur um slíkt,segjum 7 ár aftur í tíman,leggja þær saman og deila með sjö. Sem sagt barnaskólareikningu.

[Billi bilaði, 27.11.2010 kl. 20:23]

Já, við skulum ekki refsa glæpamönnunum. Það er svo miklu skemmtilegra að refsa heimskingjunum, af því að við erum jú aldrey hluti af þeim.