Álver - hátækni?

Á vefsíðu Alcan má lesa eftirfarandi: "Hátæknilegur og flókinn búnaður stýrir öllu framleiðsluferli álversins.  Álverið er þannig hátæknifyrirtæki."

Einmitt það já.

Samkvæmt þessu er hægt að flokka flest undir hátækni.

Videoleigan úti á horni notar hátæknilegan og flókinn búnað ril að stýra öllu sínu ferli (tölvan sem er notuð til að skrá hver hefur leigt hvaða spólu).  Hún er því hátæknifyrirtæki.

Götusóparinn sem ekur um göturnar á hátæknilegu og flóknu tæki (sem er í raun ryksuga á hjólum) er því væntanlega starfandi hjá hátæknifyrirtæki.

Hvers konar bull er þetta eiginlega?

Ef fyrirtækið þróaði sjálft þann búnað sem um ræðir, eða ef afrakstur vinnunnar væri "hátæknilegur og flókinn búnaður" þá gæti ég samþykkt að um raunverulegt hátæknifyrirtæki væri að ræða.

Það að "nota" hlutina er bara ekki nóg.  Raunveruleg hátæknifyrirtæki eru fyrirtæki eins og deCode og  Össur - fyrirtæki sem nota "hátæknilegan og flókinn búnað" til að framleiða hátækni. 

Þau framleiða líka þekkingu.  Það er lykilatriðið.  

Púkinn vill fleiri þekkingarfyrirtæki - fyrirtæki sem vinna með þekkingu og "framleiða" þekkingu.  Fyrtæki sem gera kröfur til menntunar starfsmanna - fyrirtæki sem framleiða hugvit og flytja það út.

Ætlar Alcan e.t.v. líka að halda því fram að þeir séu þekkingarfyrirtæki?

Athugasemdir

[Tryggvi L. Skjaldarson (IP-tala skráð) 10.2.2007 kl. 16:21]

Sæll Púki

Ég vil ekki vera dónalegur, en Þú virðist ekki hafa græna glóru um hvað þú ert að blogga. 

Með kveðju Tryggvi L. Skjaldarson

Starfsmaður Alcan

[Gaukur Garðarsson (IP-tala skráð) 10.2.2007 kl. 19:59]

Sæll Púki,Það er gaman að lesa skilgreininguna þína, annars vegar á þekkingarfyrirtæki og hins vegar á hátæknifyrirtæki. Hér koma nokkrar staðreyndir um Alcan á Islandi hf.1. Starfsmenn í álverinu taka stöðugt þátt í að þróa og betrumbæta búnað sem síðan hefur verið framleiddur fyrir Alcan og fleiri fyrirtæki. T.d. hafa frumkvöðlafyrirtæki hreinlega orðið til vegna þessa hér á landi. Hjá fyrirtækinu er starfssemi og stefna um stöðugar umbætur (CI) þar sem starfsmenn úr öllum deildum fyrirtækisins taka þátt. Með þessu er verið að vinna með þekkingu starfsmanna sem síðan er nýtt til að framleiða hágæða ál til útflutnings.

2. Til þess að framleiða ál hvort sem er í kerskálum eða frekari úrvinnsla þess í steypuskála þá þarf til þess mikinn og flókinn búnað. Eins og ég nefndi hér að ofan þá koma starfsmenn sterkir inn með sína þekkingu og reynslu þegar verið er að þróa nýjan búnað eða endurbæta þann búnað sem til er í fyrir. Flest allur búnaður í fyrirtækinu er stýrður af flóknum iðntölvubúnaði og eru það starfsmenn Alcan sem sjá mest um rekstur og endurbætur á þeim búnaði, hvort sem um er að ræða vélbúnað eða hugbúnað. Því má segja að um hátæknifyrirtæki sé að ræða.

Kær kveðja, Gaukur Garðarsson

Starfsmaður Alcan