Á hvaða braut erum við?

Örugg hverfi - fyrir þá sem hafa efni á að búa þar.  Er það framtíðin sem koma skal?  Vilja Íslendingar búa í þjóðfélagi þar sem menntun, heilsugæsla og öryggi þegnanna ræðst af efnahag þeirra? Öryggisgæslan í Urriðaholti er því miður skref í þá átt og Púkinn er ekki hrifinn af því - ekki frekar en ýmsu öðru í þjóðfélaginu sem er stöðugt að færast meir og meir í átt að bandaríska módelinu.

Púkinn hefi viljað sjá allt aðrar lausnir hér.  Fjölgun þjóðarinnar, sér í lagi á suðvesturhorninu kallar á aukna löggæslu - en hún á að vera á vegum hins opinbera og greitt fyrir hana úr sameiginlegum sjóðum - það á ekki að setja lögregluna í fjársvelti og bjóða síðan upp á sérstakt öryggi fyrir þá efnameiri.

Púkinn saknar þess líka að enginn stjórnmálaflokkanna hefur lagt áherslu á aðgerðir gegn afbrotum.  Púkinn er varla sá eini sem er orðinn þreyttur á sífelldum fréttum af síbrotamönnum sem brjóta af sér, eru gómaðir, sleppt að loknum yfirheyrslum og fara þá af stað aftur - brjótast barinn í næsta hús.  Það er engum gert gagn með því að láta þessa menn ganga lausa meðan þeir bíða dóms.  Púkinn vill sjá dópistana skikkaða í meðferð, en beri ítrekaðar meðferðir ekki árangur og haldi þeir áfram afbrotaferlinum á að að taka þá úr umferð.

Urriðaholt verður fyrsta vaktaða hverfi landsins

Athugasemdir

[Guðmundur D. Haraldsson, 9.5.2007 kl. 12:29]

Er ekki heppilegra að fólk hjálpist að við að hafa eftirlit með eignum hvers annars? Munurinn á því og að einhver utanaðkomandi aðili sjái um það er sá að þá öðlast maður traust til nágrannans, sem getur varla verið annað en jákvætt. Gallinn er trúlega sá að eftirlitið er ekki jafn reglubundið.

Það að loka af hverfi er galin hugmynd. Þarf að rökstyðja það nánar?

[Guðmundur D. Haraldsson, 9.5.2007 kl. 12:40]

Er málið ekki líka, að það þarf að huga að því að gera eitthvað fyrir það fólk sem brýtur af sér trekk í trekk í stað þess að loka það inni og vona það besta? Og er það ekki ódýrara og betra fyrir samfélagið líka, til langs tíma litið? Held að það sé óhætt að svara báðum spurningum játandi.

[halkatla, 9.5.2007 kl. 13:13]

ég vona að bófahóparnir sérþjálfi upp lið sem getur tekið á þessu hverfasnobbi

[Ólafur Þórðarson, 9.5.2007 kl. 13:17]

Stutta svarið við "Á hvaða braut erum við" er að líttu til Ameríku. Þaðan er fyrirmyndin sl. áratugi hvað sem sumi tauta.

[Kári Harðarson, 9.5.2007 kl. 14:03]

Mér krossbrá þegar ég sá þessa frétt.

Securitas þrífst á ótta við náungann enda elur fyrirtækið á honum - og það gerir sjónvarpið líka.

Við erum farin að trúa því að við búum í Ameríku eftir of mikið þáttagláp.  Ég minni á að morðtíðni á Íslandi er ekki farin að ná í amerískar hæðir þótt umferðarþunginn sé það.

[Jósep Húnfjörð (IP-tala skráð) 9.5.2007 kl. 22:34]

Mun ástandið ekki bara versna!  Þurfum við ekki að fara að hugleiða aðra kosti, eins og að ráðast beint að upprunanum og hætta framleiðslu ungra glæpamanna til dæmis með því að lögleiða fíkniefni, að fullu eða hluta!  Aðferðarfræðin við baráttuna við fíkniefnin er að tapast um öll vesturlönd. Fjármunir ættu að nýtast betur í forvarnir en löggu!