Hugleiðingar um hugsanafrelsi

Hér á Íslandi ríkir skoðanafrelsi, samkvæmt 73. grein stjórnarskrárinnar.  Menn mega hafa hvaða skoðanir sem er - sama hversu skrýtnar þær eru. Hér ríkir líka að mestu leyti tjáningarfrelsi - menn mega láta skoðanir sínar í ljós (með ákveðnum takmörkunum þó).

Þær skoðanir sem fólk hefur og kýs að láta í ljós skapa að hluta þá ímynd sem aðrir hafa af viðkomandi - ímynd sem verður jákvæð eða neikvæð eftir aðstæðum.

Þessi ímynd sem fólk skapar sér er eitt af því sem ræður því hvort aðrir bera virðingu fyrir viðkomandi og hvort (og á hvaða hátt) þeir kjósa að umgangast viðkomandi.

Púkinn vill halda því fram að skoðanir geti haft áhrif á hvort einstaklingar séu hæfir til að sinna ákveðnum störfum eða ekki.

Hugsum okkur til dæmis einstakling sem lýsir í ræðu og riti þeirri skoðun sinni að rauðhærðir einstaklingar séu úrkynjaður ruslaralýður, sem eigi að gelda svo hægt sé að útrýma þeirra genum - hugsum okkur þessum skoðunum sé ítrekað lýst á Facebooksíðu viðkomandi og fleiri slíkum stöðum.

Ef ég rækist á slíkan einstakling t.d. sem leigubílstjóra sem þyrfti mikið að lýsa þessum skoðunum sínum meðan hann keyrði mig heim, myndi ég ekki kippa mér mikið upp við það - hrista hausinn yfir því eftir á hversu ruglaður viðkomandi væri, en ég sæi hins vegar enga ástæðu til að telja þessar furðulegu skoðanir hafa áhrif á hæfni hans sem leigubílstjóra (svo framarlega sem hann hreinlega veitist ekki að örvhentum farþegum).

En hvað ef viðkomandi væri í starfi sem kennari?   Væru foreldrar rauðhærðra barna sátt við að þau sæktu tíma hjá kennara með þessar skoðanir (og þá gildir einu þótt hann minnist ekki á þær í kennslustundum)? 

Ég held að rauðhærðum nemendum myndi líða illa í tímum hjá viðkomandi og það er hætta á að aðrir nemendur sem hugsanlega líta upp til kennarans líti á þetta sem óbeina hvatningu til að beita þá rauðhærðu einelti.

Kennari með slíka fordóma gagnvart ákveðnum hópi nemenda er einfaldlega ekki hæfur til að sinna sínu starfi.  Ég er ef til vill gamaldags, en ég ætlast til að hægt sé að bera virðingu fyrir kennurum sem einstaklingum - og kennari sem opinberlega lætur í ljósi svona skoðanir væri ekki einstaklingur sem ég gæti borið virðingu fyrir.

Fordómar Snorra snúa ekki að rauðhærðum, heldur samkynhneigðum, en eru alveg jafn fáránlegir....og gera hann jafn óhæfan sem kennara.

Það voru ekki mistök að reka Snorra - einu mistökin voru að ráða hann í upphafi.

Snorri krefst 12 milljóna í bætur

Athugasemdir

[Jóhannes Laxdal Baldvinsson, 5.3.2016 kl. 01:09]

Á þá bara að stunda einhliða innrætingu í skólum samkvæmt pólitískum réttrúnaði. Banna þjóðrækni og kristnifræðslu og slíta tengslin milli kirkju og skóla?  Sá sem heldur að Snorri Óskarsson sé hættulegur uppalandi en sér ekkert athugavert við kynfræðslu homma og lesbía frá Samtökunum 78 í grunnskólum á Íslandi, er illa áttaður svo ekki sé meira sagt.

Ég hef hinsvegar áhyggjur af því, þegar feminísk lögreglukona sem fær sjálfdæmi um að rannsaka og ákæra í hatursglæpamálum, er jafnframt virkur meðlimur í öfgastjórnmálaflokki og situr í borgarstjórn á vegum þessa flokks og hefur tekið sæti á Alþingi. 

Því þegar feminísk forræðishyggja fær að túlka lög sem varða tjáningarfrelsið þá þurfum við menn eins og Snorra til að tryggja skoðanafrelsi okkar hinna

[Jón Steinar Ragnarsson, 5.3.2016 kl. 02:04]

Mín spurning er hvað Snorra er ætlað að kenna í þessum skóla og hvort skoðun hans og "fræðsla" hafi á einhvern hátt verið viðurkennt sem námsefni. Ef ekki þá þarf að áminna hann og reka ef hann lætur ekki segjast.