Burt með vefauglýsingarnar!

Púkanum leiðist að fara á vefsíður sem eru allar útbíaðar í auglýsingum, en sem betur fer er til einföld lausn á því vandamáli.

Sú lausn felst í því að setja upp lítið forrit sem nefnist Adblock Plus. Þetta forrit er ókeypis og getur hreinsað burt mikið af þeim auglýsingum sem birtast á vefsíðum - en með því að "þjálfa" forritið aðeins má losna við nánast allar auglýsingar.

Þess ber að vísu að gæta að forritið virkar bara með Firefox og skyldum vöfrum, en þar sem Púkinn var hvort eð er löngu hættur að nota Internet Explorer af öryggisástæðum, þá var það bara hið besta mál.

Það eru til önnur svipuð forrit, en þetta hefur reynst Púkanum best. 

Sem sagt - ef ykkur leiðast auglýsingar, setjið upp Firefox og Adblock Plus.  Forritið má nálgast hér.

Netið að verða þriðji stærsti auglýsingamiðillinn

Athugasemdir

[Ágúst H Bjarnason, 3.12.2007 kl. 21:42]

Þetta svínvirkar!  Takk fyrir.

[Einar Indriðason, 4.12.2007 kl. 08:07]

Annað plugin sem er vel þess virði að skoða er flashblock.  Nánari upplýsingar má fá hér. 

[Sigurður J Guðmundsson (IP-tala skráð) 4.12.2007 kl. 13:10]

Já er betra að þurfa að borga fyrir að skoða alla þá vefi sem nota auglýsingar til að fjármagna sig? Væruð þið tilbúin að þurfa að greiða 100 kall í hvert skipti sem þið farið inn á mbl.is? ok 100 kall er kanski fullmikið þegar maður fer oft á dag inn á vefinn svo kanski gæti það verið eitt gjald í 24 tíma í senn. eða 20 kr. fyrir skiptið. og þá þurfið þið náttúrulega að gefa kreditkortanúmerið ykkar í hvert skipti eða að biðja moggann að geyma það fyrir ykkur til að flýta fyrir. Þá er einnig búið að útiloka að börnin ykkar sem ekki eru komin með kreditkort geti skoðað fréttavefinn. Reyndar flesa vefi því þeir þurftu jú allir að fara að rukka fyrir notkun vegna þess að þeir auglýsa náttúrulega ekki af því fólki er illa við auglýsingar Sorry, þetta er heimskuleg hugsun fólk, það er ekkert frítt í þessum heimi en ef þið viljið sleppa við að borga þá verðið þið að gera eitthvað í staðinn og að horfa á einhverjar skitnar auglýsingar er eitt það auðveldasta sem til er, og einstaka sinnum sér maður eitthvað sem manni finnst áhugavert.  Þetta er vanhugsað og frekt af ykkur. Og mér  dettur í hug þar sem ég er starfsmaður hjá Skjá Einum sem er jú frí sjónvarpsstöð í staðinn fyrir að horfa á auglýsingar. Ég vinn þar í útsendingu og sé því meðal annars um að það sé í lagi með auglýsingatímana þegar þeir fara í loftið og ég er oft spurður bæði af vinum mínum og fólki sem ég kynnist og spyr mig út í vinnuna mína hvort ég geti ekki bara slept auglýsingatímunum í einhverjum þætti Vissulega er þetta létt grín en ég verð voða reiður því fólkið er ekki að borga neitt fyrir og þessar auglýsingar borga matinn sem fer ofan í mig í hverjum mánuði, þetta eru launin mín sem ég passa vel uppá. Það setur enginn auglýsingar í frímiðla bara af því að það er gaman að pirra neytendurna. Hættið nú þessu væli helvítis frekjurnar ykkar.

[Ingi Björn Sigurðsson, 4.12.2007 kl. 16:01]

Skemmtileg tilviljun að þessi frétt er farin af forsíðu mbl.is.. afhverju ætli það sé?

[Óli Jón, 7.12.2007 kl. 18:03]

Ég er nú á því að netverjar sjálfir verði verst úti ef þeir fara að víkja sér undan áhorfi á auglýsingar í stórum stíl. Það er t.d. klárt mál að mbl.is, og þá um leið blog.is, nyti ekki við ef engar væru auglýsingarnar.

Fögnum auglýsingunum og lítum frekar á þær sem þjónustu en áþján. Ef hlutirnir eru skoðaðir betur ofan í kjölinn má jafnvel líkja afnotum af auglýsingasneyddum mbl.is vef við hugverkaþjófnað því þar væri áhorfandi að nýta sér frumsafmið og höfundarréttarvarið efni án endurgjalds. Hver er þá munurinn á slíku athæfi og torrent.is eða álíka vefjum?