"Besti tíminn til að kaupa hlutabréf ...

...er þegar blóðið flæðir um göturnar."  Púkinn man reyndar ekki hver sagði þessi orð, en þau eiga ágætlega við í dag.  Ef fólk er að leita að skammtímagróða á hlutabréfamarkaði, í stað þess að fjárfesta jafnt og þétt, þá skiptir tímasetningin miklu máli, og besti tíminn til að kaupa er þegar allir eru uppfullir af örvæntingu, múgsefjun hefur gripið um sig meðal fjárfesta og allir eru að reyna að selja.

Frá þeim sjónarhóli er það hrein heimska að hlaupa til þegar markaðurinn hefur verið á brjálaðri uppleið mánuðum saman.  Það er enn meiri heimska að vera "gíraður"  undir þeim kringumstæðum - leggja bréfin fram sem veð til að geta fengið lán til að kaupa enn fleiri (veðsett) bréf.

Púkinn er þeirrar skoðunar að hafi einhverjir verðbréfaráðgjafar ráðlagt fólki að gera slíkt um mitt síðasta ár, þá hafi þeir annað hvort ekki verið starfi sínu vaxnir, eða notað sér græðgi og þekkingarleysi fjárfestanna á hátt sem jaðrar við að vera glæpsamlegur.

Nei, þeir sem höfðu vit í kollinum losuðu sig væntanlega við sín bréf með góðum hagnaði og sitja nú með feit veski og bíða eftir góðu tækifæri til að koma aftur inn á markaðinn.

Er þá rétti tíminn til að kaupa núna?  Púkinn er ekki viss - þó þykir honum sennilegt að tímabundnum botni hafi verið náð og einhver hækkun gæti orðið í dag og á morgun....en það kæmi alls ekki á óvart þótt enn meiri lækkanir yrðu síðan, og botninum ekki náð fyrr en eftir mánuð eða jafnvel lengur.

Athugasemdir

[DoctorE (IP-tala skráð) 10.1.2008 kl. 11:02]

Ég er ekki nægilega bjartsýnn til þess að taka þátt í þessu, lái mér hver sem vill

[Ágúst H Bjarnason, 10.1.2008 kl. 11:25]

Það hefur orðið töluverður viðsnúningur í morgun.

[Púkinn, 10.1.2008 kl. 11:57]

Já, en eins og ég sagði er ég ekki viss um að botninum sé raunverulega náð.  Sjáum til eftir viku eða svo.

[Þórir Kjartansson, 10.1.2008 kl. 14:54]

Góður pistill Hr. Púki.   Alveg sammála þessu og  sérstaklega hvað varðar alla ,,fjármálaspekingana" og greiningardeildafólkið, sem er algjörlega búið að  opinbera fávisku sína.

[gfs (IP-tala skráð) 10.1.2008 kl. 20:47]

Þú ættir að hinkra þangað til félög og þá sérstaklega bankarnir hafa birt ársuppgjör fyrir 2007.  Bankar og aðrar fjármálastofnanir eru þau fyrirtæki í öllum heiminum sem bera þungan af öllu fyllerýinu sem við tókum þátt í.

þegar vel gengur þá vegnar þeim best, og þegar illa gengur gengur þeim verst. Um næstu mánaðamót munu koma nokkrar ársuppgjörsbyrtingar, og menn ættu líka að fylgjast með uppgjörum banka í BNA. 

Annars er ég mjög ósammála flestum greiningadeildum bankana og framámönnum í fjármálalífnu, þegar þeir tala um að þetta sé bara niðursveifla sem leiðréttist aftur upp á við eftir 3 til 6 mánuði, enda hafa þeir mikla hagsmuni að gæta upp á marga milljarða þegar þeir voga sér að opna kjaftinn til að kjafa upp markaðinn.

 Í þetta sinn held ég að heimurinn sé að ganga í gegnum langt tímabil niðursveiflu eða kreppu (í öllum heiminum.... sjá BNA) og þá er ég að tala um 2-3 ár. 

Allavega mundi ég vera mjög var um mig ef hagsmunaaðillar eru að tala um góð kauptækifæri á markaðinum núna, þeir ljúga öllu til að halda áfram LSD partýinu sem þeir voru í sumar........