Nonni nýríki...og bankinn hans

Það var óneitanlega athyglivert að hlusta á Jón Ásgeir hreinlega tala niður gengi bankanna.  Það var einnig athyglivert að dagana á undan voru sumir þeirra sem starfa við eignastýringu að ráðleggja viðskiptavinum sínum að losa sig við bréf í Glitni, því þau ættu eftir að lækka - og lækka meira en markaðurinn í heild.

Hvað er á seyði?  Hvað vita sumir sem sumir aðrir vita ekki?

Sumir halda að Jón Ásgeir sé að tala niður gengi bankanna og annarra félaga á markaði í þeim tilgangi að geta keypt allt saman á brunaútsöluverði - það munu víst nefnilega ennþá vera einhver fyrirtæki sem hann á ekki.

Aðrir túlka þessi orð hans sem svo að hann viti að allt sé á leiðinni í hundana og sé að reyna að losna undan því að vera sakaður um að tala upp gengi fyrirtækja þegar hann veit hve slæmt ástandið er.

Aðrar kenningar heyrast líka, en enginn virðist trúa því að hann meini bara það sem hann er að segja og engin dulin áætlun sé á bak við þetta ...  hvernig var annars málshátturinn "Engi maður frýr þér vits, en meir ertu grunaður um græsku" eða þannig.

Púkanum fannst hins vegar furðulegt að heyra Jón Ásgeir hreinlega bera sig aumlega yfir því að allir íslenskir fjárglæ... eh.. athafnamenn væru settir undir sama hatt erlendis.  Málið er nefnilega það að burtséð frá Björgólfsfeðgum, þá eru Jón Ásgeir og fyrrverandi eða núverandi viðskiptafélagar hans nánast  þeir einu sem um er að ræða.  Það er eiginlega erfitt að vorkenna mönnum sem kvarta yfir ástandi sem þeir bera að stóru leyti ábyrgð á sjálfir.

Púkinn á engra hagsmuna að gæta, enda á hann engin hlutabréf í fyrirtækjum sem eru á markaði hérlendis, en hann er samt forvitinn að vita hvernig gengi bréfanna í Glitni breytist næstu daga.

Skuldaálag úr takti við raunverulega stöðu