Hugleiðingar um stýrivexti

Í flestum stærri löndum eru stýrivextir seðlabanka mjög virkt stjórntæki.  Það sem Seðlabanki Íslands virðist ekki vilja skilja er að þannig er því ekki farið hér.

Vextir hafa áhrif á aðsókn í lánsfé, en því aðeins að lántakandi eigi ekki annarra kosta völ.  Hér á Íslandi hafa hækkaðir vextir í raun ekki haft þau áhrif sem þeir myndu hafa víðast erlendis - að draga úr lántökum, því að á undanförnum misserum hefur fólk í staðinn tekið gengisbundin lán með mun lægri vöxtum.  Það er að vísu að koma í bakið á viðkomandi núna vegna gengisfalls krónunnar, en það er annað mál. Þettaþekkist ekki meðal almennings erlendis - þar dettur engum í hug að taka lán í öðrum gjaldmiðli en sínum eigin og þess vegna bíta vaxtahækkanir annarra seðlabanka.

Púkinn telur einnig sennilegt að Seðlabankinn muni hækka vexti frekar - ekki vegna þess að það sé vænlegt til að halda verðbólgunni niðri, heldur vegna þess að Seðlabankinn kann engin önnur ráð - þetta er klassíska staðan að ef eina verkfærið sem einhver á er hamar, þá líta öll vandamál út eins og naglar.

Verðbólgan mun að líkindum lækka þegar líður á árið og Seðlabankinn mun væntanlega þakka það sinni vaxtastefnu, en staðreyndin er að það mun ekkert hafa með málið að gera - verðbólgulækkunin mun stafa af lækkun íbúðaverðs og samdrætti í útlánum banka, vegna verra aðgengis þeirra að lánsfé. 

Glitnir spáir stýravaxtahækkun í apríl

Athugasemdir

[Landfari, 5.4.2008 kl. 00:26]

Þetta er nú svolítið sami hringurinn. Íbúðaverðið er að lækka vegna þess að vextirnir eru að hækka. Á sama hátt hækkaði íbúðaverð þegar vextir lækkuðu. Það dregur úr útlánum af þvi vextir eru að hækka.

Er þá ekki niðurstaðan að hækkun vaxta hafi áhrif til lækkunar verðbólgu?

"Vandamálið" er að hluta það að hækkun vaxta er lengi að koma fram í greiðslum af verðtryggðu lánunum vegna þess að verðbólgan kemur ekki til greiðslu strax heldur dreifist á allan lánstímann.

[proletariat, 7.4.2008 kl. 01:02]

Svona abstract af hvað þú ert að segja.

Engin vill lána okkur peninga, þess vegna fáum við minna lánað!