Úldinn matur, klúður og léleg þjónusta

Hvers vegna eru íslenskir skyndibitastaðir svona lélegir?

Þótt ekki sé réttlætanlegt að gera sömu kröfur til skyndibitastaða og "alvöru" veitingastaða, þá ætlast maður nú til ákveðinna lágmarksgæða - skyndibitinn er ekki gefins á Íslandi, en því miður er það nú oft svo að staðir standa ekki undir væntingum.

Púkinn er mikill áhugamaður um góðan mat, en stundum er tíminn af skornum skammti, þannig að úrræðið verður að koma við á skyndibitastað. 

Ef staðurinn stendur ekki undir væntingum Púkans bregst Púkinn við með því að fara ekki aftur á þann stað í einhvern tíma, sem getur verið mislangur eftir atvikum.

Eitt það alversta sem Púkanum hefur verið boðið upp á er úldið hráefni.  Það átti sér stað hjá KFC, strax eftir opnun á sunnudagsmorgni.  Ætlunin var að kaupa barnabox handa dóttur Púkans og nokkra bita handa foreldrunum, en tilhlökkun barnsins var fljót að hverfa þegar ýldulyktin gaus upp.  Svona eftir á að hyggja þykir Púkanum sennilegast að hráefnið hafi ekki verið geymt í kæli yfir nóttina, þannig að fyrstu viðskiptavinum dagsins var boðið upp á mat sem tæplega var boðlegur hundum.

Púkinn ákvað því að gefa KFC langt frí, en gerði aðra tilraun 6 árum síðar. Það gekk ekki mikið betur.  Á leiðinni heim fékk frú Púki svo heiftarlegt ofnæmiskast að fjölskyldunni stóð ekki á sama.  Eftir þetta var KFC settur á varanlegan bannlista hjá Púkanum.

Annar staður sem er kominn á bannlistann er kjúklingastaðurinn í Suðurveri.  Synd og skömm, því þetta er sá skyndibitastaður sem er næst heimili Púkans.  Ástæða bannsins í því tilviki er ekki gæði matarins, heldur endalaust klúður í afgreiðslu.  Um þverbak keyrði í gær - þegar Púkinn kom heim og opnaði pakkann gerði hann sér ferð til baka og skilaði bitunum á þeirri forsendu að þetta væri ekki það sem hann hefði pantað.  Til hvers í ósköpunum er verið að spyrja viðskiptavininn hvernig bita hann vilji, þegar ekkert mark er tekið á svarinu?

Ruby Tuesday er líka á svarta listanum hjá Púkanum, vegna hræðilegrar þjónustu og matar sem ekki uppfyllir væntingar miðað við verð. 

Annar staður sem lenti á svarta listanum var Svarti svanurinn við Hlemm, en eftir að eigendaskipti urðu þar hrapaði þjónustan niður úr öllu, Púkinn gafst upp á staðnum og sennilega hafa fleiri gert það líka, því hann lagði upp laupana.

Það eru líka nokkrir staðir sem klikka stöku sinnum, en Púkinn stundar samt - Nings (þar sem stundum gleymist eitthvað af því sem pantað var) og American Style (þar sem sumir starfsmenn virðast ekki skilja orðin "enga sósu á hamborgarann").

Einu staðirnir sem alltaf uppfylli væntingar Púkans eru pizzustaðir - áður fyrr var Púkinn fastagestur á Hróa Hetti og Eldsmiðjunni, en þar sem þeir staðir eru ekki lengur innan göngufæris er Devitos (við Hlemm) sá staður sem Púkinn stundar einna helst.

Púkinn minntist ekki á McDonalds, enda hefur hann ekki farið þangað síðan dóttirin óx upp úr því að vilja barnabox með leikfangi - ef Púkinn vill hamborgara fær hann sér "Heavy Special" hjá American Style, ekki einhverja dvergvaxna eftirlíkingu af hamborgara.

Það eru reyndar ekki bara skyndibitastaðir sem hafa valdið Púkanum vonbrigðum hér á landi - alversta þjónusta sem hann hefur fengið var á einum af dýrari veitingastöðum bæjarins, en það er efni í aðra sögu, sem ef til vill verður sögð síðar.

Hvað um það, hafa einhverjir aðrir sínar eigin hryllingssögur af íslenskum skyndibitastöðum - eða sérstök meðmæli með einhverjum stað sem ekki veldur vonbrigðum?

Athugasemdir

[H.T. Bjarnason (IP-tala skráð) 13.6.2008 kl. 10:29]

Innilega sammála þér í sambandi við KFC.  Ég hreinlega skil ekki hvað þeir gera við kjúklinginn í eldhúsinu hjá þeim.  Kjötið er oftar en ekki afskaplega þurrt og bragðlaust og þessi fitubrák sem liggur milli skinnsins og kjötsins er ráðgáta.

[Loopman, 13.6.2008 kl. 10:44]

Íslenskir veitingastaðir eru flestir rusl. Er ekki að vera bitur eða pirraður, heldur eftir að hafa búið í erlendis og ferðast útum allt, þá er þetta eina niðurstaðan sem hægt er að komast að.

1. Munurinn á skyndibita og betri veitingahúsum er svo lítill. Bæði hvað varðar verð og gæði. Erlendis færðu ódýran mat sem oft er ok, en þegar þú ferð á betri staði er maturinn oftast mikið betri og þjónustan líka.  Hér er þjónustan alltaf frekar slök. Ef maður vill eitthvað spes, eða ef maturinn er hálf kaldur eða jafnvel frosinn eins og kom fyrir mig tvisvar í röð á Pítunni á síðasta ári, og maður kvartar, þá er oftast leiðinda attitude og manni líður eins og skít fyrir að vilja fá sæmilegan mat fyrir klikkað verð.

2. Hráefnið hér er oftast ekki gott, margir staðir notast við forgrillað frosið kjöt, dósagrænmeti (Núðluhúsið á Laugarvegi) og þar frameftir götunum. Og maður þarf að borga óheyrilegt verð fyrir lélegan mat.

3. Matur er fáránlega dýr hér og allir staðirnir reyna að ræna fólk peningum í stað þess að bjóða uppá almennilegan mat. Dæmi um þetta er Indian Mango. Þar fær maður Chicken Tikka Masala á sirka 2000 kall. Sem eitt og sér er rán. En svo þarf maður að kaupa hrísgrjón sérstaklega, og þau kosta 350 skammturinn fyrir manninn. Þau eiga að vera hluti af réttinum. Tólf tommu pizza fæst á sirka 2400 kr hvar sem er. Sem er miðað við Bretland fjórfalt verð. Heimsending frá Dominos eða hvaða stað sem er í rauninni tekur að meðaltali 40-60 mínútur. Ofan á það borgar maður fullt verð, sem líka rán. Mér finnst að pizzusendlar ættu að rukka alla með því að ota að þeim skambyssu.

[Hildigunnur Rúnarsdóttir, 13.6.2008 kl. 10:45]

Skrítið, ég hef aldrei fengið vondan mat á KFC, reyndar eru bringurnar þar stundum þurrar en mér finnast reyndar bringur alltaf þurrar á kjúklingastöðum (elda þær sjálf ekki lengur en þar til þær eru rétt nákvæmlega hættar að vera rauðar)

Grillhúsið klikkar aldrei, það er náttúrlega varla skyndibitastaður, sama með Vitabar, fínir borgarar. Búllan niðri í bæ er fín líka.

RPC er svo sami pakkinn og Eldsmiðjan, fínar pizzur.

[Hildigunnur Rúnarsdóttir, 13.6.2008 kl. 10:46]

ussuss, er að gleyma uppáhaldsstaðnum, Krúa Thai, pad thai núðlurnar þar eru tóm snilld og ótrúlega risastórir skammtar (við kaupum 2 fyrir okkur 5)

[Einar Indriðason, 13.6.2008 kl. 11:31]

Hrói Höttur vestur í bæ, JL húsinu er löngu dottinn úr því að koma einu sinni til greina hjá mér.  Nokkrar ástæður til:

   - Reykingar.  Það var aðskilið á milli reyklauss svæðis, og reyksvæðis, með léttum OPNUM vegg.  Getiði hvað.. reykurinn fór SAMT yfir til reyklausa svæðisins.  Þegar var kvartað, þá var svarað með skætingi, svona sirca... "þið þurfið ekkert að borða hér".

   - Mismunun á pizzustærðum.  Ef þú pantaðir pizzu og tókst hana með þér út, þá gastu fengið 1" pizzu.  Ef þú pantaðir pizzu og ætlaðir að borða hana inni, þá var þér neitað um að fá 18" pizzu.  Stærsta pizzan var 16" sem hægt var að borða inni.  Þegar það var kvartað undan þessu, þá kom bara svar til baka:  "Eigandinn segir þetta".  (Af því bara!)

Nei, púki, Eldsmiðjan er ekki úr göngufæri fyrir þig :-)  Kannski í lengra lagi, en ... ekki úr göngufæri.

Með KFC, þá fæ ég alltaf í magann, eftir að hafa fengið mér KFC.  Ég er farinn að hafa lengra KFC minni en ég var með, það er.... lengra á milli KFC ferða.

Hamborgarar, án sósu.  Já... alveg merkilegt fyrirbrigði, hvað sumu starfsfólki er FYRIRMUNAÐ að skilja það að "enga sósu, takk" þýðir:  Ekki kokteilsósu, ekki pítusósu, ekki tómatsósu, ekki sinnepssósu, ekki grillsósu.  EKKI SÓSU!

Ég er farinn að panta hamborgarana mína með þessum formála:  "Nú skaltu taka þér blað í hönd, því ég er með sér kröfur..."

Þetta virkar næstum því alltaf.  URGH!

Ruby Tuesday er með "Saddan" matseðil.  Maður verður saddur af því að horfa á matinn koma á borðið.  Þvílíkir risaskammtar!  Og stundum lendir maður á þjónustufólki þar sem talar bara ensku. 

TGI Fridays.... þar verður maður bara saddur við að lesa matseðilinn.  Fyrir utan að þar er hávaði og skvaldur, og ef fólk ætlar að tala saman þar, þá þarf það að hækka röddina verulega, og auka þar með á skvaldrið.

Grillhús Guðmundar í Tryggvagötunni fær hins vegar jákvæð prik, og eins Askur Grillhús.

Pizzustaðirnir með heimsendingu virðast oftar en ekki, ekki átta sig á því, að jú, það eru til kúnnar (ég, t.d.), sem viljum fullt, fullt, fullt, (og ég meina fullt) af ferskum hvítlauk ofan á.

En.... það sem maður ætti að gera meira, væri að fá eitthvað matarkyns í búð, og matreiða það sjálfur.  Miklu hollara, og þá er hægt að ráða skammtastærðinni sjálfur.

[Andrea, 13.6.2008 kl. 13:21]

Úff hvar á maður að byrja!!
Ömurlegast er nátttúrulega að fá skemmdan mat en þar á eftir fer mest í taugarnar á mér að fá ekki það sem ég bið um. Eins og að sleppa kartöflukryddinu! Þoli það illa

En Fridays er á "shitlistanum" mínum. Burger King ekki, mér finnst þeir með betri plasthamborgara en McDonalds.
En tek undir með Hildigunni, Vitabar og Búllan klikka ekki

[Jóhannes H. Proppé (IP-tala skráð) 13.6.2008 kl. 15:50]

Nú að sjálfsögðu þá skaltu fara á Hambaorgarabúllu Tómasar. Búlluborgararnir eru afgreiddir með hraði, fádæma góðir og eins vinaleg þjónusta og gerist á bestu veitingastöðum landsins. Ef borgari er ekki fýsilegur þá eru Bæjarins Bestu að sjálfsögðu að standa undir nafni.

Svo í merkilegri verðflokk þá bendi ég á bístróið á Hilton. Verðin voru síðast þegar ég vissi lítið eitt fyrir ofan þessar keðjusjoppur en maturinn almennt til fyrirmyndar.

Síðast en ekki síst þá hvet ég þig til að skoða Lauga-Ás. Hiklaust besti veitingastaður landsins í sínum flokki. Skal ég glaður ásamt næstum hvaða kokki sem er skrifa uppá það. 

[Óskar Þorkelsson, 13.6.2008 kl. 16:11]

Sennilega er best að byrja á jákvæðu nótunum..

Krua Thai, langbestur, hefur aldrei klikkað og ég bókstaflega borðaði þar 4-5 sinnum í viku mánuðum saman og það án nokkurar ástæðu til kvartana.. mæli samt ekkert sérstaklega með hlaðborði í hádegi.

Gullfoss.. langbesta kjötsúpa landsins.. einfalt og gott.. og ódýrt.

Kebabhúsið grensásvegi.. mæli með fish and chips þar.

Greifinn akureyri.. flokkast tæplega undir skyndibitastað.. en afgreiðslan er það snögg að um skyndibitastað gæti verið að ræða.. góðar steikur.. góðar pizzur, góðir hamborgara .. og mæli með rétti dagsins í hádeginu.. öruggur vinur í söluferðum norður.

Bæjarins bestu Tryggvagötu...

Árhús Hellu.. kalkunahamborgararnir eru einstakir..

no komment á slæma þjónustu eða vondan mat.. hef td aldrei upplifað KFC eins og lýst er í upphafspistlinum.. pizzuastaðir almennt eru drasl... TGI Friday finnst mér sorglega verksmiðjulegur.

[Púkinn, 13.6.2008 kl. 16:41]

Mér heyrist á svörunum að ég verði að gera mér ferð á Hamborgarabúlluna.   Lauga-Ás, sem minnst var á hér að ofan...já, toppstaður, sammála því.  Fáir aðrir staðir þar sem maður fær jafn mikil gæði miðað við pening.  

[Einar Indriðason, 13.6.2008 kl. 23:19]

Ah, já... Búllan.  Get mælt með henni :-)

[Bumba, 14.6.2008 kl. 09:22]

Löngu hættur að að fara á íslenzka skyndibitastaði, nema Bæjarins beztu. Það er sá eini staður sem blífur. Með beztu kveðju.

[Arnar Pálsson, 17.6.2008 kl. 12:24]

Súpan á Brú varla í göngufæri en vel þess virði.

Tek undir að Eldsmiðjan er best. 

[Maelstrom, 17.6.2008 kl. 23:47]

Krua Thai gleymir svolítið að láta sósuna fylgja með réttunum.  Djúpsteiktar rækjur með engri sósu er ekki vinsælt hjá mínum börnum, þannig að fara vel yfir pöntunina við afhendingu.  Annars frábær staður.

Búllan er bara við spes tækifæri, aðeins og mikið 'gúmmilaði'.

Red Chili er góður take-away.  Eitthvað fyrir alla á matseðlinum þar.

[Árni Steingrímur Sigurðsson, 23.6.2008 kl. 19:47]

Sá eini sem mér finnst ekki klikka nokkurn tíman er Subway sem skyndibiti.  Ég hugsa að stærsti hlutinn af því er að maður hefur færi á að leiðrétta mistök as-they-make-it.  Thai matstofan í Skeifunni er fínn staður.  Ég hef í seinni tíð farið að gera heimabakaðar pizzur þar sem þær bragðast talsvert betur og bjóða upp á nákvæmlega það sem maður vill á hana.  Prófið sólþurkaða tómata, rauðlauk og kjúkling, yummie.