Ekki nema 2.000.000 á hvert mannsbarn

Þetta smálán sem þarna er sótt um jafngildir um 2 milljónum króna á hvert mannsbarn í landinu.  Þetta hljómar eins og hin sæmilegasta tala, en er í rauninni aðeins hluti þess sem þarf.

Heildarupphæðin sem íslenska ríkið gæti þurft að fá gæti verið fjórum sinnum hærri en þetta lán, en þetta er skref í áttina.

Púkinn vonast hins vegar til að IMF setji skilyrði um aukinn aga í ríkisfjármálum - en sum þeirra skilyrða gætu orðið sársaukafull.  Það verður t.d. að útrýma fjárlaga- og viðskiptahalla - og halda launahækkunum og útþenslu hins opinbera niðri.   Þetta mun þýða niðurskurð og seinkun framkvæmda - með meðfylgjandi samdrætti og atvinnuleysi - slæmt fyrir þá sem lenda í þessu en nauðsynlegt fyrir þjóðarbúið í heild.

Það er reyndar spurning hvort þetta lán dugar eitt og sér til að styðja við gengi krónunnar, þannig að eðlilegt gengi myndist á henni erlendis.  Þegar Seðlabanki Evrópu afskrifaði í raun krónuna var gengi evrunnar um 300 krónur, sem er tæplega raunhæft.  Hvort það tekst að ná fram stöðugu gengi í kringum 150 kr/evra eins og reynt er að halda uppi þessa dagana er hins vegar óljóst.  Púkinn er hins vegar á því að engin von sé til að gengi krónunnar styrkist frá því gildi.

Óska eftir 6 milljörðum dala

Athugasemdir

[Kebblari, 20.10.2008 kl. 13:20]

Í USA, þá fara opinberir fjármálastjórar í fangelsi fari þeir yfir fjárheimildir sem ákvarðaðar eru samkvæmt fjárlögum, gildir þá einu hversu mikið þeir fara fram úr. Það er agi.

[Ólafur Eiríksson, 20.10.2008 kl. 13:28]

Nokkuð sammála púki, ertu til í að útskýra þína útgáfu af heildarskuldunum þegar upp er staðið?

[Helgi Hrafn Gunnarsson (IP-tala skráð) 20.10.2008 kl. 13:35]

Kebblari: Athugaðu nú samt að Bandaríkjamenn setja 11 ára börn í 10 ára fangelsi fyrir að sýna fram á fullkomlega eðlilegan kynþroska. Þeir eru refsiglaðasta þjóð í heiminum og það er mjög varhugavert að taka þá sér til fyrirmynda í refsingum, svo ekki sé minnst á þá staðreynd að þessi harka skilar ekki tilætluðum árangri.

Hinsvegar er ég sammála þér að því leyti að það eigi að vera meiri agi. Opinberir fjármálastjórar eiga að bera persónulega ábyrgð einhvers konar, og sömuleiðis með stjórnendur fyrirtækja sem t.d. halda ólögleg samráð.

Maður er í meiri vandræðum fyrir að vera með gramm af hassi á sér heldur en fyrir að leggja fjárhag alls landsins í rúst. Þegar menn fara í jakkaföt virðist sjálfkrafa verða óþarfi að refsa þeim fyrir nokkurn skapaðan hlut.

[Púkinn, 20.10.2008 kl. 15:32]

Þegar dollarinn var í 58 kr var gengi krónunnar allt, allt, allt of sterkt, eins og sjá mátti á því innkaupaæði sem hrjáði Íslendinga um tíma.  Ef ríkisstjórnin og Seðlabankinn hefðu brugðist við á réttan hátt ætti eðlilegt gengi að hafe verið ca. 85 kr - svona ef maður miðar við hluti eins og launakostnað á Íslandi miðað við nálæg lönd.

Þegar tiltrúin á krónunni er gjörsamlega horfin eru menn að reyna að rembast við að halda dollaranum í 110 kr.  Það má vera að það gangi ef nægur gjaldeyrir kemur inn í landið, en það getur líka verið að krónan hrynji enn frekar.

[Kebblari, 20.10.2008 kl. 18:14]

Er raunveruleg hætta á því að krónan sé alveg verðlaus? Maður fær hva? 300 - 400 krónur fyrir eina Evru í evrópska seðlabankanum! En það er í raun marklaust, vegna þess að það eru engin viðskipti með íkr þar. Hversu mikils virði er krónan í raun og veru, miðað við að ríkið væri ekki að stýra sölu á gjaldeyri? Alveg klárlega veikari en opinbert gengi er...

[Púkinn, 20.10.2008 kl. 18:40]

Tjá...en ef hún hangir í núverandi gengi í eitt ár eða tvö þá verð ég sáttur....þá næst að vinna upp skaðann sem hágengisstefnan olli á sínum tíma.

[Laurent Somers, 20.10.2008 kl. 22:16]

Það var svo augljóst að 60kallinn mót dollar var algjört, algjört lágmark og ekki séns að útflutningurinn réði við neitt undir því til lengri tíma. Sjávarútvegfsfyrirtæki urðu gjaldþrota og gengið klóraði sig rétt aðeins niður fyrir það (58-60 á móti $) til skamms tíma en ómögulegt að halda því.Uppsveiflan frá því gildi var því mun meiri en nokkur möguleiki á niðursveiflu (sterkara gengi) út frá því gildi. Að nokkrum skuli hafa dottið í hug að taka langtímalán á því gengi er eitthvað sem ég hef aldrei botnað í.

Ég hef verið á þeirri skoðun að þegar SÍ sleppir krónunni á flot aftur muni hún sökkva niður í 250, jafnvel 300 á móti evrunni. Það met ég út frá gengi krónunnar sem SÍ hefur verið að ríghalda í og 305kallinum hjá Evrópska seðlabankanum. Í þeirri tölu þá eru bankarnir úti að taka premíu, þannig að sennilega meta þeir úti gengið í frjálsu flæði á ca. 200-250.

Síðan tel ég að við eigum eftir að fá nokkra stóra skelli sem eru ekki enn á borðinu en munu opinberast eftir því sem raknar úr skuldabréfa- og fyrirtækjafléttunni. Þá er hætt við að gengið muni síga meira en það jafnvægisgildi sem það nær þegar að krónan fer á flot aftur.

Ég held að miðað við þær verðbólguspár sem eru í spilinum muni innlent fjármagn leita í erlendan gjaldeyri, sem verður til þess að fljótt muni ganga á þann gjaldeyri sem eftir verður af þeim gjaldeyri sem erlendu bankarnir koma með þegar búið verður að mæta öðrum skuldbindingum að einhverju leyti.

Það verður vonandi nóg til að koma jafnvægi á gengið, en ég held að það muni þess vegna gefa nokkuð meira eftir. Væntingarnar eru alla vega niður á við, og því held ég að gengið muni stefna í þá átt. Ef ég væri mjög bjartsýnn myndi ég ætla að krónan færi að braggast eftir 2 ár, en sennilegra finnst mér 4-5 ár.