Of vægt tekið á ölvunarakstri

Púkinn auglýsir hér með eftir alþingismönnum (eða konum) sem þora að leggja fram frumvarp um verulega hertar refsingar við akstri undir áhrifum.

Það er ljóst að núverandi kerfi er ekki að virka, miðað við fjölda þeirra ökumanna sem eru teknir nánast daglega - já og sumir oftar en einu sinni á dag.

Sumir hafa verið sviptir ökuréttindum ævilangt en eru samt teknir aftur og aftur.

Hvað er til ráða?

Hér eru nokkrar tillögur:

1) Meðferð.  Það mætti skikka þá sem eru teknir undir áhrifum í meðferð. Ef eina ráðið til að fólki skiljist að það á við vandamál að stríða er að vera sendir í meðferð á viðeigandi stofnun, þá verður bara svo að vera.

2) Kyrrsetning bifreiða.  Púkinn er þeirrar skoðunar að sé einhver tekinn undir áhrifum, eigi skilyrðislaust að kyrrsetja bifreiðina um tíma - það myndi a.m.k. koma í veg fyrir að menn séu teknir oftar en einu sinni á dag á sömu bifreiðinni.  Lögreglan hefur í dag heimild til að kyrrsetja eða leggja hald á bifreiðar, en það er ekki nóg - Púkinn vill sjá þeirri heimild breytt í skyldu.

3) Upptaka bifreiðar.  Það má rökstyðja að bílar þeir sem um ræðir séu ekkert annað en tæki sem notuð eru til að fremja með afbrot.  Púkans vegna mætti gera bílana upptæka og selja á uppboðum - fá þannig einhverjar krónur í kassann til að standa undir kostnaðinum við þær aðgerðir sem hér er lýst.  Það þarf að vísu að hafa undantekningar þegar um bílþjófnað er að ræða og einnig þarf að huga að stöðu og ábyrgð bílasala sem lána bíla til aðila sem aka þeim síðan undir áhrifum.  Það að fyrri eigendurnir verða áfram að borga af bílalánunum eftir að hafa misst bílana er að sjálfsögðu bagalegt fyrir viðkomandi, en það er nú einu sinni tilgangurinn.

4) Samfélagsþjónusta.  Eitthvað af þessu liði mætti t.d. nota til skúringa á Grensásdeild og öðrum slíkum stöðum - hugsanlega átta einhverjir sig þá á mögulegurm afleiðingum svona hegðunar.

5) Fangelsisvist. Glæfraakstur undir áhrifum er að mati Púkans lítið annað en tilraun til manndráps.  Refsingar ættu að vera í samræmi við það - ef það eina sem dugir til að vernda þjóðfélagið gegn viðkomandi er að henda þeim bak við lás og slá, þá verður svo að vera. 

Púkinn vill benda á að hækkaðar sektir eru ekki á ofanfarandi lista, enda eru einhverjir stútanna væntanlega eignalausir aumingjar.  Í þeim tilvikum sem þeir eiga eignir mætti þó beita hærri sektum, jafnvel í hlutfalli við tekjur viðkomandi - sekta menn um 5-10% árstekna til dæmis.

Ef ekkert verður gert munum við bara halda áfram að heyra sömu fréttirnar aftur og aftur, ásamt fréttum af dapurlegum dauðaslysum inn á milli.

Hvaða alþingismenn þora að gera eitthvað í þessu máli?

Margir ölvaðir og undir áhrifum vímuefna

Athugasemdir

[Gunnar Th. Gunnarsson, 24.10.2011 kl. 21:30]

Fangelsisrefsingu er nú þegar beitt við ítrekuð brot.

[Vendetta, 24.10.2011 kl. 23:02]

Já, satt segirðu, Púki. Að keyra undir áhrifum áfengis (eða fíkniefna) er alvarlegur glæpur. Sérstaklega ef um meira en tvo bjóra er að ræða.

"Fangelsisrefsingu er nú þegar beitt við ítrekuð brot." Já, biðlistarnir lengjast. Ekkert mjög aftrandi að fara á biðlista og vera þar árum saman. Þú veizt, að vegna dugleysis stjórnvalda og fangelsismálastjóra eru fangelsismálin í algerum ólestri.

Í Bretlandi hafa þeir haft þann háttinn á í þó nokkur ár að þegar einhver er tekinn oftar en einu sinni  ölvaður, þá er bíllinn dreginn í burtu strax (meðan verið er að skrifa sektarmiða) og bíllinn settur í pressuna. Einnig ef einhver er tekinn við stýrið án ökuskírteinis. Það þýðir allavega að viðkomandi verður að finna sér annan bíl til að aka ölvaður í og það getur tekið nokkra daga. Þennan sið ætti að taka upp hér á landi.

En ef bílnum hefur verið stolið, þá er hann auðvitað ekki settur í brotajárn, en bílþjófurinn settur í fangelsi. Og þarf ekki að bíða með að afplána nema fram að dómi (engir biðlistar). Hér á landi ganga þeir víst flestir lausir. Dæmdir, en óhengdir.

[Jóhann Elíasson, 25.10.2011 kl. 07:21]

Þær hafa gefið ágætis raun aðferðirnar, sem Norðmenn beita, að hafa SEKTIRNAR himinháar og þar að auki TEKJUTENGDAR, þ.e lágmarkssektin er mjög há en er líka tekjutengd, menn hugsa sig MINNST tvisvar um áður en þeir keyra undir áhrifum.

[Vendetta, 25.10.2011 kl. 17:43]

Síðast þegar ég vissi til þá voru sektirnar í Danmörku eins mánaðar laun (man ekki hvort það var fyrir eða eftir skatt). Þessa sekt er hægt að greiða með afborgunum. Við mjög hátt áfengismagn (>2 promill) er heimilt að setja menn í fangelsi, en þessu er sjaldan beitt nema sérstakar aðstæður liggja fyrir, t.d. manntjón.

Við akstri án ökuskírteinis fyrirliggur bæði sekt og viku fangelsisvist (í opnu fangelsi) við fyrsta brot, við eftirfarandi brot lengist vistin allt upp í 3 mánuði (að mig minnir). Þessi refsing er stöðluð (vegna fordæmis landsréttar) og er ekki hægt að breyta eða fella niður nema fyrir ökumenn sem liggja á dánarbeði og deyja áður en fullnusta hefst.

Því miður hafa þessar refsingar ekki fælingarmátt sem skyldi. Það sem hefur fælingarmátt fyrir flesta er að þurfa að taka ökuprófið aftur eftir að banntíminn er liðinn. Prófið er mjög erfitt, sérstaklega það bóklega, og ekki séns fyrir þá sem hafa drukkið heilann í sér í þrot að ná því.

Margir enda með ævilangt bann og þá freistast þeir til að keyra próflausir aftur og aftur. Þess vegna er það eina sem dugar er að taka bílinn og setja hann í brotajárn. Sama þótt það sé nýr Porsche-jeppi. Ég vil sjá það gert hér á landi (líka stóra jeppa sem lagt er vísvitandi ólöglega á gangstígum).

Hins vegar ekki hægt að reiða sig á það að alþingismenn leggi fram frumvarp um að herða refsingarnar við ölvunarakstur. Þeir munu ekkert gera fyrr en einhver úr þeirra eigin fjölskyldu verður fyrir slysi vegna ölvunaraksturs. Sjálfselskan er svo gífurleg hjá þessu liði.

Sérstaklega hafa núverandi stjórnarliðar eytt svo miklu púðri í að herða refsingar á einni tegund brota, að öll önnur brot hafa orðið útundan. Sama með lögguna. Íslenzka löggan eyðir tíma í 2-3 tegundir brota, en er skítsama um öll önnur afbrot. Ég þekki fólk sem hafa kært alls konar glæpi, en það er eins og hinir kærðu hafi lögguna í vasanum. Því að hún tekur bara eftirfylgjandi kærur hins kærða gegn kærandanum alvarlega. Sérstaklega ef kærandinn er af erlendu bergi brotin(n).

Á endanum hafa persónur sem hafa orðið fyrir árásum/ofsóknum/áreiti/kynferðisbrotum og hafa kært það, einfaldlega gefizt upp. Hér er ég ekki að tala um dómstólana, heldur lögguna og aðra embættismenn sem áhrifamiklir menn virðast hafa í vasanum. Ég nefni engin nöfn (ennþá).

Mér finnst persónulega að það ætti að reka alla í löggunni (nema þá sem eru við umferðareftirlit), og ráða nýtt fólk, sem er ekki duglaust og sem tekur starf sitt alvarlega.

[Gunnar Th. Gunnarsson, 25.10.2011 kl. 19:04]

Vandetta, ég trúi því ekki að nýir bílar séu settir í brotajárn. Til hvers? Er hörgull á brotajárni í Danmörku?

[Vendetta, 25.10.2011 kl. 23:35]

Nei, ekki í Danmörku, heldur í Bretlandi. Sbr. athugasemd #2. Þetta var sýnt í heimildaþáttum á Discovery. Það ætti að nota sömu aðferð í Danmörku og víðar. Til að stöðva (eða stórlega minnka) ölvunarakstur.

[Gunnar Th. Gunnarsson, 26.10.2011 kl. 00:03]

Þetta er með því heimskasta sem ég hef heyrt, að eyðileggja verðmæti í refsingarskyni.

Discovery Channel er ekki merkilegur pappír. Þangað getur nánast hver sem er keypt sér sýningartíma fyrir áróður sinn, t.d. Greenpeace.

[Vendetta, 26.10.2011 kl. 00:52]

Eigendurnir geta sjálfum sér um kennt, ef bílarnir þeirra fara beint í brotajárn. Þeir geta vælt eins og þeir vilja.  Í öðrum löndum er bara ný flaska tæmd og gamli góði bíllinn er þarna ennþá tilbúinn til nýrra ævintýra, nýrra manndrápa.

Umræddir heimildarþættir á Discovery eru raunverulegar upptökur af ökumönnum sem eru stöðvaðir af lögreglunni víðs vegar í Englandi og sýnt þegar bílarnir eru dregnir burtu í bílapressuna meðan hinir brotlegu bílstjórar standa kjökrandi á gangstéttinni. Í rauntíma. Ekki reconstruction. Sem sagt enginn uppspuni.

Á Discovery hef ég aldrei séð neitt með eða af Greenpeace, kannski ertu að rugla saman við aðra stöð (kannski National Geographic?). Margir þættir á Discovery eru mjög góðir, t.d. How Things Are Made, sem sýnir framleiðsluaðferðir í iðnaði. Sem vantar á Íslandi (iðnað). En líka eru margir þættir sem ég hef takmarkaðan áhuga á, eins og krabbaveiðar og mótorhjólaviðgerðir.

Svo er önnur stöð, I.D. Discovery sem er ein bezta heimildaþáttastöðin sem þekkist og ég horfi á hana næstum allan tímann, enda mikill fróðleikur um raunveruleg atvik. Bæði um réttarmeinafræði með og án krufninga, raunverulegar glæpasögur og sjaldgæfa sjúkdóma.

Hins vegar horfi ég sjaldan á RÚV, sem hlýtur að vera allra lélegasta sjónvarpsstöðin á þessari plánetu. Í staðinn fyrir að greiða okurgjaldið til RÚV, 17 þús. á ári, þá ætti fólk að fá borgað fyrir að þjást fyrir framan skjáinn. Næstlélegasta stöð í heimi er Skjár 1. Þriðja lélegasta er Stöð 2, sem hefur lélegustu þýðendurna á launaskrá (google-þýðendur). Svo man ég ekki hvaða stöð er rétt fyrir ofan íslenzku stöðvarnar í gæðum, ríkissjónvarpið í Zimbabwe eða Kabul TV. Þó má RÚV eiga það, að þeir sýna stundum brezka sakamálaþætti, meðan hinar tvær íslenzku stöðvarnar sýna nær eingöngu amerískt sitcom-rusl.

En hvað varðar ölvun við akstur, þá vil ég minna á að bifreið á miklum hraða með ölvuðum ökufanti er eins og lífshættulegt vopn. Ölvaður ökumaður sem veldur dauða annarra vegfarenda er þar af leiðandi morðingi. 

[Gunnar Th. Gunnarsson, 26.10.2011 kl. 01:10]

Ég er ekkert að tala um eigendurna! Ég er að tala um verðmætin.

Þetta er tómt kjaftæði, þú hlýtur að sjá það sjálfur.

Ef fíkniefnasali er handtekin með fullt af peningum, heldur þú að dómsvaldið hlaupi þá með seðlabúntin á næstu brennu?

[Gunnar Th. Gunnarsson, 26.10.2011 kl. 01:12]

Já, það er sennilega rétt hjá þér, þetta var National Geographic

[Vendetta, 26.10.2011 kl. 11:21]

Jæja, þá legg ég til að bíllinn verði þá tekinn, boðinn upp og seldur hæstbjóðanda.

[Gunnar Th. Gunnarsson, 26.10.2011 kl. 11:43]

Nákvæmlega, annað væri rugl