Bullandi, falin verðbólga

Enn heldur krónan áfram að styrkjast - eða hvað?

Það er nefnilega ekki svo einfalt að við séum raunverulega með sterkan gjaldmiðil, heldur stendur þessi blessaða íslenska króna á óttalegum brauðfótum.

Seðlabankinn er fastur í vítahring.   Það vita allir að útflutningsfyrirtækjum, bæði í sjávarútvegi og öðrum greinum er að blæða út, vegna gengis krónunnar, en ef Seðlabankinn myndi lækka vexti gæti það leitt til samdráttar í útgáfu jöklabréfanna, gjaldeyrir myndi hætta að flæða inn í landið og krónan snarfalla, sem aftur myndi leiða til hækkunar á innfluttum varningi, sem á endanum myndi koma fram sem verðbólga, en forgangsmarkmið seðlabankans er einmitt að halda verðbólgunni niðri.

Vandamálið er bara það að sú verðbólga er í rauninni þegar til staðar - hún er bara falin vegna  hágengisins.

Púkinn vill í raun fullyrða að hávaxtastefna Seðlabankans sé í rauninni afar gagnslítið stjórntæki.   Þeir sem vilja taka lán í erlendum gjaldmiðli á mun lægri vöxtum gera það, þannig að háir vextir slá ekki á þensluna - það eina sem þeir gera er að valda röskun í efnahagslífinu - háir vextir gera útgáfu jöklabréfa áhugaverða, sem styrkir krónuna, sem gerir innflutning "ódýran" - innflytjendur og heildalar græða sem aldrei fyrr, meðan útflutningsfyrirtækin lepja dauðann úr skel.

Hágengisstefnan er að leggja staði eins og Flateyri í eyði og hrekur hátæknifyrirtækin úr landi.  
Ef svo fer fram sem horfir mun þessi spilaborg hrynja á endanum og íslenskt efnahagslíf verður þá sem brunarúst, þar sem ekkert stendur eftir nema fjármálafyrirtækin.

Styrking krónunnar hefur ekki skilað sér út í verðlagið

Athugasemdir

[Púkinn, 24.5.2007 kl. 17:01]

Skattalækkanir koma innflytjendum og heildsölum vel - það eru jú þeir sem eru að græða.  Hagnaður útflutningsfyrirtækjanna hrynur og ef fyrirtæki eru rekin með tapi, þá skiptir nú ekki voðalega miklu máli hver skattprósentan er.

[Hallgrímur Guðmundsson, 24.5.2007 kl. 20:04]

Hvernig í helvítinu getur það staðist að það lækkar ekkert í þessu samfélagi samhliða styrkingar á krónunni? Sjáum til dæmis Bensín og Olíuna þessar vörur hækka og hækka auk þess hækkar flest annað.Niðurfellingin á virðisaukaskattinum er löngu fokin til helvítis.Ég óska eftir afdráttalausum svörum.

[Dr Banco Vina E.D.R.V, 24.5.2007 kl. 20:33]

Góður

[Dr Banco Vina E.D.R.V, 24.5.2007 kl. 20:34]

Betri

[Sigurjón, 25.5.2007 kl. 12:08]

Það þarf fyrst og fremst að losna við sveiflurnar.  Það er ekki hægt að bregðast of harkalega við háu gengi og lækka það á fáeinum dögum um 10% eins og í fyrravor.  Það hafði mjög slæmar afleiðingar í för með sér.