Hlutabréfin og kristalkúla Púkans

Fyrst spá Púkans um hlutabréfaþróun síðustu daga rættist, er kominn tími til að rýna aftur í kristalkúluna og sjá hvað hún segir um íslenska hlutabréfamarkaðinn næstu mánuðina.

(Spá Púkans frá morgni fimmtudags (sjá hér) var annars sú að lækkun miðvikudagsins myndi ganga til baka fimmtudag og föstudag, en síðan yrði stefnan aftur niður á við eftir helgina.)

Það er nefnilega þannig með kristalkúlur að árangur þeirra við að spá fyrir um þróun hlutabréfa virðist engu verri en árangur fjármálaráðgjafa í Armani jakkafötum - spár þeirra um gengisþróun á síðasta ári rættust ekki sérstaklega vel í það minnsta.

Hvað segir kristalkúlan þá?

Jú, í fyrsta lagi það sem ekki mun gerast.  Hlutabréfamarkaðurinn mun ekki hækka það mikið á þessu ári að hann vinni upp þá lækkun sem varð frá miðju síðasta ári. Þær hæðir munu í fyrsta lagi nást árið 2009.  Þeir sem sitja á sínum hlutabréfum og vonast til að verð þeirra nái fljótlega aftur fyrri hæðum verða fyrir vonbrigðum - það þarf meiri þolinmæði til.

Í öðru lagi sér kristalkúlan óvissu næstu vikurnar - óvissu um það hvort verð bréfa hafi náð botni eða ekki.  Fram til páska gætu komið allmargir dagar þar sem gengið sveiflast upp eða niður um nokkur prósent, en einnig er möguleiki á einni stórri dýfu til viðbótar.

Kristalkúlan sér umsvifamikinn aðila sem tengist mjög ákveðnum stjórnmálaflokki eiga í vandræðum vegna rangra fjárfestinga á undanförnum misserum, en einnig sést unnið að því að bjarga viðkomandi, þannig að óvíst er að þetta komist í hámæli.

Í kristalkúlunni sjást líka ýmsir spekingar stíga fram og tala um að kauptækifæri hafi myndast, en hætt er við að hækkanir af þeim sökum verði skammlífar og gangi fljótlega til baka.

Í kristalkúlunni sést birta aðeins yfir markaðinum þegar vorar og einhver hækkun mun verða frá þeim tíma og til loka ársins 2008, þannig að gengið í árslok gæti orðið eilítið skárra en í ársbyrjun.

---------
Púkinn vill taka fram að hann er ekki fjármála- eða verðbréfaráðgjafi og hefur engin réttindi sem slíkur og ráðleggur engum að haga sínum fjárfestingum í samræmi við það sem hér segir.  Þetta er einungis til gamans gert og enginn ætti að taka þessa spá alvarlega, enda er Púkinn bara lítið skrýtið blátt fyrirbæri með stór eyru sem hefur ekkert vit á neinu. Púkinn vill að lokum taka fram að hann á engin hlutabréf sem eru skráð í íslensku kauphöllinni og hefur enga sérstaka hagsmuni af því hvernig þróunin verður.

Spá 30% hækkun á hlutabréfum

Athugasemdir

[Þorvaldur Blöndal, 15.1.2008 kl. 10:46]

Mér fannst pínu merkilegt í fréttinni að Úrvalsvísitalan á að hækka um 30% og svo er sérstaklega bent á 2 fyrirtæki sem gætu hækkað meira en 20%.

Og annað: "gætu farið að leynast kauptækifæri í einstökum hlutafélögum til langs tíma".  Ég les milli línanna "draslið heldur áfram að lækka en ef þú kaupir það þá gæti það borgað sig eftir mörg ár".

[Ívar Pálsson, 15.1.2008 kl. 11:26]

Takk fyrir spána. Greiningarfólkið hefur náð að hressa hvort annað ærlega við. Bömmerinn af því að skeika í áætlunum sínum frá október (3 mán) um rúma eitt þúsund og eitt hundrað milljarða er þá farinn af þeim. Gleymum því að skuldatrygginga- markaður heimsins getur komið til með að tapa 400 milljörðum dollara. Förum þetta allt bara á trúnni.

[Jóhannes Snævar Haraldsson, 15.1.2008 kl. 13:15]

Góð spá og ég tek meira mark á henni en þessum frá greiningadeildunum.

Ég er búinn að vista spá Glitnis í sér möppu og þann sið ætla ég að hafa áfram næstu misseri. Tel geta komið sér vel að hafa góðan aðgang að þeim í framtíðinni, því þeir gætu tekið upp á því að láta spárnar hverfa af heimasiðunum.

Annars rek ég augun harðast í eftirfarandi:  "Glitnir segir, að við núverandi aðstæður gætu farið að leynast kauptækifæri"

Sem sagt núna þegar flest fyrirtæki hafa hrunið um 30 -60% þá séu að fara að myndast kauptækifæri. Það mætti útleggja þetta þannig að þau (kauptækifærin) séu ekki allveg komin en þá.

En burtséð frá því. Getið þið sem eruð betri en ég að grúska í þessu, rifjað upp með okkur hverju Glitnismenn spáðu s.l sumar þegar verðin voru í toppi. Sáu þeir þá eitthvað varhugavert. Hafi þeir þá, eins og mig mynnir, verið brattir og talið verðið í góðu lagi, þá hefðu þeir nú átt að senda frá sér yfirlýsingu um kostakaup!!! strax eftir fyrstu 10 - 15% lækkunina.

[Ásgeir Kristinn Lárusson, 16.1.2008 kl. 00:40]

Það er nú hressandi að kíkja á síðu Jóhannesar Björns í þessu samhengi, vald.org...

[gfs (IP-tala skráð) 16.1.2008 kl. 12:49]

Ég veit ekki hvort það sé eitthvað hressandi við það að líta á vald.org, en eitt er víst að þar er raunveruleikinn..... en ekki í greiningadeildunum........... ha?

[U (IP-tala skráð) 16.1.2008 kl. 14:07]

Góð greining.  EN það sem kanski var best bið allt sama var "disclaimerinn" sem fylgdi.  Sérstaklega þetta með blá eyrun.  Það gætir svo mikillar hrinskilni í forsendunum.  Mikið  yrði maður nú hissa ef að að loknum greiningum Glitnis eða Kaupþings stæði eitthvað á þá leið að þessu verður að taka með varkárni af því að greingaraðili útskrifaðist úr versló  í hittifyrra og hefur ekki gert stórt annað en að velja sér ný dress og fína bíla síðan þá.