Krónan á réttri leið?

Gengi krónunnar hefur nú fallið það mikið að það er að nálgast það sem Púkinn telur ásættanlegt fyrir útflutningsfyrirtækin.  Lágt gengi þýðir auðvitað hækkað verð á innfluttum vörum - Bensín, Prins-póló og allt þar á milli er nú orðið nokkru dýrara en það var fyrir einhverjum vikum - eða ef það hefur ekki hækkað nú þegar mun það gerast á næstu vikum eða dögum.

Þetta gerist þrátt fyrir að Seðlabankinn haldi enn fast við ofurvaxtastefnu sína og reyni með því að fela verðbólguna - já "fela", því raunverulega ætti verðbólgan hér að mælast mun meiri en hún gerir - henni er bara sópað undir teppið með því að halda genginu uppi á röngum forsendum. 

Vandamálið er ekki bara það að Seðlabankinn hafi á undanförnum árum brugðist rangt við - stóra vandamálið er að Seðlabankanum er gert samkvæmt lögum að halda verðbólgunni niðri en hann notar ekki öll þau tæki sem hann hefur til þess og misbeitir þeim tækjum sem hann notar.

Menn virðast sem betur fer að vera farnir að sjá í gegnum þennan blekkingarleik og átta sig á því að það fer að koma að skuldadögunum.  Vandamálið er hins vegar að ef krónan heldur áfram að falla, mun draga verulega á áhuga fjárfesta á jöklabréfunum og ef þau verða ekki endurnýjuð mun það þýða verulegt fjárstreymi úr landi, sem aftur mun leiða til enn frekara falls krónunnar, sem kemur fram sem hækkun á verði innflutts varnings, sem aftur kemur fram sem verðbólga, sem gæti neytt Seðlabankann til að hækka vexti enn frekar í tilgangslausri baráttu sinni við að fela raunverulega vandamálið.

Krónan lækkar um 2,6%

Athugasemdir

[Jón Magnús, 7.3.2008 kl. 13:04]

Hvert er hið "raunverulega vandamál"?  Bara forvitni í mér hvað þú telur það vera.

[Púkinn, 7.3.2008 kl. 13:11]

"Raunverulega vandamálið" er að grundvallarmarkmið Seðlabankans er rangt.  Honum er gert að halda niðri verðbólgu umfram allt - og án þess að vinna gegn hinnii raunverulegu orsök verðbólgunnar.  Þetta er svona eins og að lækni sé fyrirskipað að halda niðri sótthita sjúklings og geri það með hitalækkandi lyfjum í stað þess að ráðast að rót vandans og vinna gegn sjúkdómnum sem hrjáir sjúklinginn.

[Jón Magnús, 7.3.2008 kl. 14:17]

Nokkuð til í þessu.  Er t.d. afnám verðtryggingar málið eða er það eitthvað annað?

[Púkinn, 7.3.2008 kl. 14:27]

Vandamálið er of margþætt til að hægt sé að finna eina lausn á því.  Bestu lausnirnar til lengri tíma eru því miður sársaukafullar tímabundið og hætt við að stjórrnmálamenn myndu líta á þær sem pólitískt sjálfsmorð.

[Johnny Bravo, 7.3.2008 kl. 20:34]

Tilhvers voru mótvægisaðgerðir ef þær seinka lækkun vaxta og gengisfalli.

25% minni fiskur 15% hærra verð og 25% veikari króna.

Þarna voru menn full fljótir með aðgerðir lol.

Þetta er allt hið besta mál, nú verður fólk að hætta að yfirdráttast, eignast sparifé og að versla í útlöndum verður óhagstæðara og meirri virðisauka skattur handa okkur.

 Það eru engin dauðsföll í þessari óhöfnu kreppu. Fólk sem tók erlend húsnæðislán verður fyrst að fjúka svo eitthvað af bankastarfsmönnum en það er alltaf þegar fyrirtæki þenja sig mikið.  Svo er það þeir sem ekki hafa keypt húsnæði náttúrulega lán"s"lausir.

[Baldur Fjölnisson, 7.3.2008 kl. 21:56]

Halldór Blöndal er núverandi formaður bankaráðs seðlabankans.