Íslendingar vilja ekki vita í hvað peningarnir þeirra fara

Einu sinni skrifaði Púkinn heimilisbókhaldsforrit. Þetta var í kringum 1990, þegar tölvuvæðing íslenskra heimila var að hefjast og rök sumra fyrir því að þeir þyrftu tölvu voru meðal annars sú að þannig væri hægt fylgjast betur með fjármálum heimilisins.

Þetta forrit "floppaði" gersamlega.

Púkinn vill nú ekki viðurkenna að það hafi verið vegna þess að forritið var lélegt - þá hefðu menn bara fengið sér sambærileg erlend forrit í staðinn, en sú var ekki raunin.

Skýringin var ekki heldur sú að markaðssetning forritsins væri í ólagi - forritið var markaðssett á sama hátt og önnur forrit Púkans (Púki, Espólín og Lykla-Pétur) á þeim tíma, sem voru þá mest seldu íslensku forritin á heimilismarkaði.

Nei, Púkinn komst að þeirri niðurstöðu að í raun vildu Íslendingar upp til hópa bara ekki vita í hvað peningarnir þeirra færu. Agaleysi í fjármálum er nefnilega ekki bara útbreitt - það er hreinn þjóðarsiður.  Það liggur við að þeir þyki skrýtnir sem hafa sín fjármál á hreinu og vita í hvað hver króna fer - vita hver útgjöld þeirra verða næstu mánuðina, geyma allar kvittanir, versla þar sem hagkvæmast er, hafa varasjóð til að mæta óvæntum útgjöldum og eyða ekki umfram tekjur.

Það eru til undantekningar, en Íslendingar kunna almennt ekki með peninga að fara.

Það er ekki hægt að kenna skólakerfinu um þetta - segja bara að það verði að taka upp fjármálafræðslu - það læra börnin sem fyrir þeim er haft, ekki satt?  Ef börn alast upp við þann hugsanahátt á heimilum að það sé engin þörf á að fylgjast með því í hvað peningarnir fara, þá skiptir engu máli hvort fjármálafræðsla er í boði í skólum eða ekki.

„Alvarlegt hve margt ungt fólk er illa statt“

Athugasemdir

[Einar Örn Ólafsson (IP-tala skráð) 28.5.2008 kl. 09:53]

Alveg sammála þér.

Ég er nú tiltölulega ungur að árum en fylgist með hverri krónu sem ég eyði og nota til þess Excel. Það er ekki vegna þess að Excel er svona frábært tól heldur af því að ég var alinn upp við skynsemi í fjármálum.

[Björg Sigurðardóttir, 28.5.2008 kl. 10:09]

HEYR HEYR

það er ekki einungis hægt að kenna bönkunum og alls ekki skólunum  um óráðsíu og óábyrgð í fjármálum. Peningarir detta ekki af himnum ofan og þetta reddast nú ekki einhvern veginn. Það er það sem ég reyni að kenna mínum börnum og vonandi tekst það.

[Sigurður Haukur Gíslason, 28.5.2008 kl. 12:19]

Ég kenni stærðfræði í 10. bekk og hef verið með verkefni um farsímakostnað. Oft hafa krakkarnir ekki hugmynd um hvað þau eyða í síma á mánuði og þeim er líka alveg sama. Ég spurði einn strák hvort hann færi með 500 kr., 5000 kr. eða 50000 kr. á mánuði. Strákurinn svaraði:" Ég veit það ekki. Pabbi borgar."

Það er voðalega erfitt að kenna nemendum ábyrgð í fjármálum ef heimilin fylgja ekki með.

[Theódór Norðkvist, 28.5.2008 kl. 20:58]

Ég nota Excel í heimilisbókhald með ágætis árangri. Ég afrita kortayfirlit hvers tímabils úr netbankanum yfir í skjalið og skipti útgjöldum niður í flokka með því að draga og sleppa.

Ég gæti samt hugsað mér að fá mér heimilisbókhaldsforrit ef ég finn eitthvað slíkt vel nothæft.

[gfs (IP-tala skráð) 29.5.2008 kl. 12:39]

Anna!

Td skotsilfur.com, fjolskylda.is báðar byggðar á Excel nema bókhald skotsilfur finnst mér skemmtilegra upp sett. Svo var kaupþing með bókhald sem kallaðist hómer minnir mig en það virðist ekki vera í boði lengur.

Svo er náttla fullt af þessu td á yahoo.com í finance dálkinum þeirra, en það er náttla á ensku.

[Guðrún Sæmundsdóttir, 29.5.2008 kl. 13:27]

Algjörlega sammála þér í þessum pistli. Ráðgjafaþjónusta heimilinna hefur einmitt talað um það að margir sem til þeirra leita viti ekkert hverjar skuldir og eignir þeirra eru

Ég man þegar að bankarnir buðu öll lánin útá "endurfjármögnun" (veð í eignum) þá fékk ég að heyra það hvort að ekki stæði til að endurnýja eldhúsið og fleira, og þótti ég frekar hallærisleg með því að svara um hæl "þarf ekki að greiða af þessum lánum" Það þykir afskaplega asnalegt að velta fjármálum heimilisins fyrir sér og gott ef slíkt fólk er ekki álitið nískt

[gfs (IP-tala skráð) 30.5.2008 kl. 23:40]

Ég verð nú að segja að þó að námsgrein í skóla um fjármál eða fjármálalæsi leysi ekki allan vanda að þá held ég samt að það sé mikilvægur áfangi fyrir óhörnuð börn á leið út á vinnumarkaðin fá smá leiðsögn.  Og þó þau taki ekki mark á kennsluefninu strax hef ég þá trú að þau muni vilja rifja upp kennsluefnið  þegar þau hafa lent í ógöngum eða bara vilja sjá fram á fjárhagslegt öryggi.

Grunnvandin er náttúrulega sá að við lærum það sem fyrir okkur er haft. Foreldrar, vinir, frændfólk, nágrannin og þá sem við sjáum í fjölmiðlum er fólk sem við lærum af, og hvort sem okkur líkar betur eða verr að þá verðum við einsog umhverfið mótar okkur, svona í flestum tilvikum. Við sjáum þá því miður ekki útfyrir boxið í okkar reynsluheimi fyrr en of seint. En er það of seint? Nei það er aldrei of seint að byrja að spara. Málið er bara það að við þurfum að breyta hugsunarhætti okkar og leita útfyrir boxið. En svo eru margið því miður sem vita ekki af því að þeir hugsa í boxi.....