Fyrirsjáanlegt verðhrun fasteigna á Íslandi

Því hafði verið spáð að um 20% raunlækkunar á fasteignaverði væri að vænta á Íslandi - aðallega þannig að fasteignaverðið stæði í stað meðan verðbólgan æddi áfram og allt annað hækkaði.  Nú er hins vegar hugsanlegt að hér hafi verið um bjartsýnisspá að ræða.

Margir verktakar og byggingaraðilar eru í alvarlegum vandræðum - "Bankinn hegðar sér eins og asni" sagði einn þeirra nýlega við Púkann og ljóst er að yfirstandandi ástand gæti rekið marga þeirra í þrot. Þessir aðilar geta ekki allir leyft sér að sitja og bíða með fasteignirnar uns ástandið batnar - nei, þeir þurfa að losa fjármagn núna.  Á sama tíma er líklegt að margir kaupendur haldi að sér höndum - það eru aðeins örfáir Íslendingar sem beinlínis græða á hruni fjármálakerfisins - flestir tapa einhverju, bara mismiklu.  Undir þeim kringumstæðum er skiljanlegt að fólk sé hikandi við að ráðast í meiriháttar fjárfestingar, eins og kaup á nýju húsnæði.

Afleiðingin af auknu framboði og minnkandi eftirspurn verður því líklega sú að verðið lækkar - sem aftur leiðir til þess að enn fleiri sitja uppi með illseljanlegar húseignir með áhvílandi skuldum sem eru langt yfir markaðsverðmæti eignanna.

Endanleg niðurstaða?  Enn fleiri en áður munu eiga minna en ekki neitt.  Já, Púkinn er svolítill svartsýnispúki í dag.

Verðhrun á fasteignum í Danmörku

Athugasemdir

[Laurent Somers, 14.10.2008 kl. 11:50]

Fyrir 2 árum spáði ég því að inan 18-24 mánaða myndi fasteignaverð lækka um 20-30%. Sumum fannst það svartsýni, en í ljósi síðustu vikna held ég að það sé reyndar vanmat og gæti alveg farið upp í 40-50% (eftir því hvernig og hvort ríkið geti gripið inn í), vegna þess hve þróunin var hröð og mikil. Við vorum mun kærulausari en þjóðirnar í kringum okkur, og af því leiðir, að mínu mati, að niðursveiflan verði okkur þyngri byrði en þeirra.

Ég verð líka var við að fólk er enn ekki að átta sig hvað hefur gerst síðustu vikurnar, og það að ástandið á eftir að versna svo um munar. Það tekur marga mánuði fyrir afleiðingarnar að koma af fullum þunga.

[Eyþór Eðvarðsson í Vilnius, 14.10.2008 kl. 12:41]

Við höfum séð fasteignaverð á Íslandi hækka mun meira en innistæða var fyrir. Erum við kannski frekar að tala um leiðréttingu fasteignaverðs frekar en verðlækkanir?

[Þorsteinn Briem, 14.10.2008 kl. 13:33]

Á höfuðborgarsvæðinu er mjög stór markaður fyrir leigu á íbúðarhúsnæði. Yfir 80% Íslendinga búa í eigin húsnæði, sem er heimsmet, og margir hverjir án þess að hafa nokkurn áhuga á því eða fjárhagslega getu til þess.

Húsaleiga á höfuðborgarsvæðinu er núna gríðarlega há, meðal annars vegna mjög lítils framboðs, og hún hefur hækkað um að minnsta kosti 80%, eða svipað og verð á húsnæði á þessu svæði frá sumrinu 2004, þegar bankarnir hér byrjuðu að lána fé í stórum stíl til íbúðakaupa.

Hér er því góður markaður fyrir húsaleigufyrirtæki, sem eiga mörg hundruð, jafnvel nokkur þúsund, íbúðir til útleigu fyrir sanngjarna húsaleigu fyrir báða aðila. Slík fyrirtæki geta hvort heldur sem er verið í eigu sveitarfélaga eða einkafyrirtækja, sem eiga íbúðirnar og reka. Og íbúðunum getur fylgt til dæmis þvottavél, þurrkari, ísskápur og uppþvottavél.

Þess háttar fyrirkomulag hefur til dæmis lengi verið við lýði í Svíþjóð. Og slíkt fyrirtæki er nú þegar rekið á Vallarheiði en það leigir út íbúðir sem bandarískir hermenn og fjölskyldur þeirra bjuggu í við Keflavíkurflugvöll.

[Villi Asgeirsson, 14.10.2008 kl. 14:18]

Hér í Hollandi er talað um að fasteignaverð sé "anyone's guess". Enginn veit hvað húsnæði kostar, því það selst ekkert. Fólk er hrætt og heldur að sér höndum. Þó er kreppan ekki komin hingað að neinu ráði og mun sennilega verða töluvert mildari en heima. Þar fyrir utan er offramboð á húsnæði á höfuðborgarsvæðinu. Það er því viðbúið að fasteignaverð muni lækka töluvert.

[Billi bilaði, 15.10.2008 kl. 11:15]

Eins og ég nefndi á mínu bloggi:

Vinsamlegast lækkið fasteignaskatta strax! Þeir eru byggðir á fullkomlega óraunhæfu fasteignamati!