Það versnar áður en það batnar...

Traust til krónunnar er gersamlega hrunið erlendis.  Þetta eru góðar fréttir fyrir útlendinga sem fara í bankana sína og fá 300 krónur fyrir hverja evru og koma hingað með troðnar ferðatöskur, fullar af krónum.

Til lengri tíma litið verður að reyna að byggja upp eitthvað lágmarkstraust á krónunni, þannig að utanríkisviðskipti geti gengið eðlilega fyrir sig.  Hluti af því ferli er að stefna Seðlabankans sé trúverðug, en líti ekki út eins og hringlandaháttur ráðlausra manna.

Það að lækka fyrst stýrivextina hressilega og hækka þá síðan strax aftur er ekki til þess fallið að auka traust manna á Seðlabankanum og það gildir einu hvort þessi hækkun er tilkomin vegna krafna IMF eða ekki.  Málið er hins vegar að þessi hækkun er hugsanlega óhjákvæmileg - án hennar væru raunstýrivextir neikvæðir og það gæti jafnvel litið enn verr út - myndi meðal annars hafa í för með sér algeran fjármagnsflótta úr landi og enn frekara hrun krónunnar.

Það að hækka stýrivextina núna er hins vegar ákaflega sársaukafull aðgerð fyrir marga, en það má rökstyðja að óbreyttir (eða lækkaðir) vextir hefðu gert stöðuna enn verri til lengri tíma litið. 

Ástandið hér á landi á hins vegar eftir að versna til muna á næstunni.  Púkinn á von á því að gjaldþrotum fyrirtækja fjölgi til mikilla muna frá því sem nú þegar er útlit fyrir, atvinnuleysi snaraukist og sömuleiðis brottflutningur frá landinu.  Ástandið gæti orðið eins og í Færeyjum þegar allt hrundi þar, með 25% fyrirtækja gjaldþrota, og 10% þjóðarinnar flutt í burtu.

Ástandið ætti hins vegar að vera orðið gott eftir 8-10 ár.

Stýrivextir hækkaðir um 6 prósentur

Athugasemdir

[Púkinn, 28.10.2008 kl. 11:23]

Mitt fyrirtæki er ekki gott dæmi, því háir vextir angra mig ekki - ég skulda engum neitt.  Það eru hins vegar mörg önnur fyrirtæki sem lenda í vandræðum, en hvað útflutningsfyrirtækin varðar, mun leiðréttingin á gengi krónunnar og lækkaðar launavæntingar vega upp á móti.

[G. Tómas Gunnarsson, 28.10.2008 kl. 15:19]

Púkinn segir, "mitt fyrirtæki er ekki gott dæmi".  Það kann að vera rétt, en ef til vill er fyrirtæki Púkans gott fordæmi.

Það er ekki lögmál að fyrirtæki eigi að vera skuldsett.  Það hefur verið og er hins vegar ótrúlega algengt á Íslandi.  Fyrirtæki hafa verið keypt með því að kaupandinn leggur lítið sem ekkert eigið fé í kaupin, umsvifin þanin og keppinautar keyptir (eða óskyld félög) með lánsfé eitt að vopni.

Auðvitað hefur hagnaðarvonin oft verið mikil, en kostnaðurinn (vextirnir) að sama skapi hár.

Það er oft betra að fara hægar yfir.

[Kebblari, 28.10.2008 kl. 18:03]

Ég var í Noregi, á flugvellinum þar (Oslo) var búið að líma yfir ÍKR, sem átti að sýna hvað maður fengi margar Norskar krónur fyrir íslenskar í svona skiptigjaldeyrisbanka, það var sem sagt búið að líma yfir hvítann miða með rauðann texta, Suspended.

[Púkinn, 28.10.2008 kl. 19:39]

Tja, það eru einstaka bankar sem eru alveg til í að losa sig við "verðlausar" krónur.  Ég fékk staðfestar upplýsingar um einn banka í Frakklandi - sá sem skipti evrunum sínum þar sagðist hafa grrætt rúma milljón miðað við að koma með gjaldeyrinn til landsins og skipta honum hér.

Hitt er annað mál, að þangað til krónan verður aftur skráð á http://www.ecb.int/stats/exchange/eurofxref/html/index.en.html munu flestir bankar í Evrópu einfaldlega neita að eiga viðskipti með hana.