Súludansari tekur á móti flugfarþegum

Einhverjum þeirra flugfarþega sem leið hafa átt um Gatwick flugvöll nýlega mun hafa brugðið í brún þegar súludansmey tók á móti þeim.

Reyndar er ekki allt sem sýnist, heldur er hér um að ræða risavaxna auglýsingu, málaða á akur við eina af aðflugsleiðunum til flugvallarins.

Auglýsingin er tæplega sýnileg af jörðinni, en farþegar sem sitja réttu megin í vélum sem eru að koma inn til lendingar eða taka sig á loft munu víst margir hafa rekið upp stór augu.

Yfirvöldum í héraðinu er ekki skemmt, þar sem auglýsingin var sett upp í leyfisleysi og hóta þeir að beita dagsektum, verði hún ekki fjarlægð.  Fyrirtækið sem ber ábyrgð á auglýsingunni heitar hins vegar að fjarlægja hana, og eftir að fréttin af auglýsingunni hefur ratað í fjölmiðlana má gera ráð fyrir að heimsóknum á myprivatedance.com hafi fjölgað verulega.

Er tölvan þín uppvakningur?

Fjölmargar tölvur eru nýttar á ólöglegan hátt án vitundar eigenda þeirra. Þetta er gert á þann hátt að "bakdyrum" er komið fyrir í tölvunum, en þau forrit leyfa utanaðkomandi aðila að yfirtaka tölvuna.  Svona tölvur eru síðan tengdar saman í svonefnd "botnet", sem er stjórnað af einum aðila, til dæmis til að senda út ruslpóst, en annars er hægt að leigja þessi "botnet" til hvers sem er.

Stakar tölvur í netinu eru nefndar "zombies", enda eru þær eins og góðum uppvakningum sæmir algerlega viljalaus verkfæri í höndum óþjóðalýðs.

Eitthvað mun vera um svona "zombie" tölvur hér á landi, þótt Púkinn hafi ekki ákveðnar tölur handbærar um fjölda þeirra.

FBI hefir hins vegar verið að reyna að leita uppi svona "botnet", en það er gert í samvinnu við Symantec fyrirtækið.  Þeir sem hafa áhuga á að athuga þeirra tölvur eru hluti af einhverju slíku "botnet" geta fylgt þessum hlekk til Symantec og tekið þátt í prófunum á AntiBot forriti þeirra.

FBI berst við uppvakninga

Hámark brjálæðisins?

Púkinn hefur öðru hverju verið með bloggfærslur sem nefnast "Bruðl dagsins", þar sem hann veitir þeim aðstoð sem hafa of margar krónur í vasanum miðað við það vit sem þeir hafa í kollinum.

Nú virðist hins vegar sem svo að aðrir hafi tekið að sér að aðstoða þá nýríku við að koma peningunum sínum í lóg með því að selja "penthouse" íbúð á litlar 230 milljónir.

Það versta við þetta mál...

Púkinn er nokkuð viss um að hér á Íslandi megi finna fólk sem er reiðubúið að borga þessa upphæð.

Hvað um það - Púkinn er þeirrar skoðunar að svona hlutir marki topp brjálæðisins - það er erfitt að toppa þetta.

Þakíbúð fyrir 230 milljónir? Skiptar skoðanir meðal fasteignasala

"Grænar" tölvur

Þetta hljómar eins og ódýr auglýsingabrella að vilja framleiða "grænar" tölvur, þar sem minni útblástur á gróðurhúsalofttegundum verður til við framleiðsluna.

Það er nefnilega ekki þar sem vandamálið við mengunina frá tölvuiðnaðinum liggur.  Mengunin sem stafar af notkun þungmálma við framleiðsluna er sennilega mun hættulegra vandamál.

Tölvuframleiðsla er nefnilega langt frá því að vera umhverfisvæn starfsgrein, sé allt ferlið skoðað.

Fyrirtæki standa sig reyndar misilla, en hér má sjá  kort frá Greenpeace, sem sýnir hversu "græn" helstu tölvu- og farsímafyrirtækin eru.

Tölvuiðnaðurinn sameinast um grænar tölvur

Darwin og þorskurinn

Verður þorskurinn við Íslandsstrendur tekinn sem dæmi um þróun tegundar í kennslubókum framtíðarinnar?

Það má vera að einhverjum þyki þetta undarleg spurning, en athugum málið aðeins nánar.  Sú skilgreining á þróun sem ég hef hér til hliðsjónar er breyting á tíðni gena innan stofnsins milli kynslóða.

Drifkraftur þessarar þróunar er að sjálfsögðu þær ytri aðstæður sem stuðla að náttúruvali (sbr. Darwin), eða, eins og stundum er sagt - "hinir hæfustu lifa af".

Hæfustu þorskarnir, já - en hæfastir til hvers?

Jú, hæfastir til að lifa af, eða réttara sagt, líklegastir til að skila genum sínum áfram til næstu kynslóðar.

Séu stofnar nægjanlega stórir og engin óvænt ytri áhrif má gera ráð fyrir að tíðni gena sé í jafnvægi.  Skoðum til dæmis tíðni þeirra gena sem ráða því hve stór og gamall þorskurinn er þegar hann verður kynþroska (og þar með hæfur til að skila genum sínum áfram til næstu kynslóðar).

Í jafnvægisástandi má gera ráð fyrir að um breytileika sé að ræða, sumir þorskar verða kynþroska fyrr en aðrir, en meðaltalið ætti að haldast stöðugt og allar sveiflur að leita aftur til jafnvægis.  Ef mikil aukning yrði skyndilega á stórum þorski er hætt við að fæðuframboðið fyrir hann yrði ekki nægjanlegt, þannig að ef þeim myndi fækka.   Ef mikil aukning yrði skyndilega á smáþorski myndu seiði hans e.t.v. ekki standast samkeppnina við seiði stórþorsksins, eða ef til vill myndu stærri þorskar fagna þessu aukna fæðuframboði og éta smáþorskinn.

Það sem skiptir máli er að meðan ekkert raskar jafnvæginu má gera ráð fyrir að það haldist - tíðni genanna sé nokkurn veginn stöðug.

En hvað gerist ef jafnvæginu er raskað?

Minnkað fæðuframboð

Skoðum aðeins heildarmagn þeirrar fæðu sem þorskurinn þarf að éta áður en hann nær kynþroskaaldri.  Þorskur sem verður kynþroska ungur og smávaxinn þarf minna magn fæðu til að ná þeim punkti en þorskur sem verður kynþroska stærri og nokkrum árum eldri.  Ef skortur er á fæðu, gefur það smáþorskinum forskot, þannig að til lengri tíma litið munu verða breytingar á genamenginu - tíðni þeirra gena sem valda því að þorskurinn verður kynþroska síðar mun lækka.

Veiði á stórþorsk 

Ef stærsti þorskurinn er veiddur, er augljóst að þeir fiskar munu ekki eftir það skila genum sínum áfram til næstu kynslóðar.  Þetta leiðir til sömu niðurstöðu - tíðni "smáþorskagenanna" mun fara vaxandi.

Dreifing þorsks

Þorskurinn syndir ekki um í þéttum torfum eins og síldin, en hann getur synt um stakur eða í smærri hópum. Sennilegt er að sú hegðun sé að einhverju leyti ákvörðuð úr frá genunum.  Tíðni gena sem ráða þeirri hegðun ætti líka að leita jafnvægis - einfarar hafa minni líkur á að finna fisk af gagnstæðu kyni á rættum tíma, en eru hins vegar öruggari fyrir ákveðnum ógnum.  Með "stórvirkum" veiðarfærum er erfiðast og óhagkvæmast að veiða fiska sem synda stakir , þannig að jafnvæginu er raskað með þeim veiðum - það eykur lífslíkurnar að vera einfari, þannig að þróunarlega pressan virkar í þá átt að auka tíðni þeirra gena sem láta fiskinn synda dreifðan um allan sjó.

Sem sagt.

Niðurstaðan er sú að minnkað fæðuframboð og stórvirk veiðarfæri stuðla beint að því að breyta genamengi þorsksins þannig að niðurstaðan verður fljótvaxnari, smávaxnari og dreifðari fiskur.

Þetta er það sem við erum að sjá, þannig að eftir nokkra áratugi verður tilurð íslenska dvergþorsksins ef til vill lesefni í námsbókum.

Að vinna BMW...eða þannig

Púkinn var að fá tölvupóst um að hann hefði unnið í BMW happdrættinu, og vinningurinn ekki af verri endanum - BMW 5 Series, Sport Saloon og væn summa í reiðufé.

Þetta er að sjálfsögðu gabb, ætlað til að hafa fé af Púkanum á einn eða annan hátt, en þessir aðilar fá þó allavegana prik fyrir að reyna eitthvað nýtt. 

Púkinn hefur margoft fengið bréf um að hann hafi unnið í hollenska ríkishappdrættinu, nú eða því breska, svo ekki sé minnst á öll bréfin frá Ubongo Ubongo og öllum vinum hans í Nígeríu sem þurfa aðstoð Púkans við að koma illa fengnu fé úr landi - en BMW happdrættið, það hefur Púkinn aldrei séð áður. 

Þeir vilja auðvitað fá upplýsingar frá Púkanum - nafn, aldur, kyn, póstfang, síma, stöðu og tölvupóstfang - ekkert sérlega grunsamlegt við fyrstu sýn.

Púkinn er hins vegar að velta fyrir sér að svara þessu, frá hotmail póstfangi, með tilbúnu nafni og heimilisfangi, gefa upp ógilt símanúmer, og tryggja á allan hátt að þessir glæpamenn geti ekki rakið svarið til hans, bara svona til að sjá nákvæmlega hvað gerist næst.  Vilja þeir fá bankareikning Púkans, undir því yfirskini að ætla að leggja peninginn þar inn, eða vilja þeir að Púkinn sendi greiðslu vegna útflutningstolla á BMWinum, eða hvað...Púkinn er svolítið forvitinn að vita hvernig þeir vilja stela af honum.

Dóphausar og drykkjurútar

Í tíð fyrrverandi ríkisstjórnarsamstarfs var talað um "Fíkniefnalaust  Ísland 2000".  Árið 2000 kom og fór, en ekki hurfu fíkniefnin - þvert á móti virðist meira um þau en nokkru sinni fyrr og fréttir dagsins um að fleiri séu stöðvaðir undir áhrifum fíkniefna en áfengis er eitt enn dæmið um þessa þróun.

En hvað er til ráða?  

Púkinn ætlar ekki að fara út í umræðuna um lögleiðingu kannabisefna - enda hefur hann mun meiri áhyggjur af sterku efnunum.

Það sem Púkinn myndi vilja sjá er eftirfarandi.

Meðferð

Stór hluti þeirra sem eru teknir með fíkniefni eru eingöngu með efni til eigin neyslu, eða þá smávægilega sölu til að fjármagna eigin neyslu.  Þetta fólk þarf á meðferð að halda, ekki refsingum, en meðferðarúrræði sem eru í boði eru takmörkuð og skortur virðist á að þeim sem hafa lokið meðferð sé veitt aðstoð við að koma undir sig fótunum á ný.   Þetta þarf að bæta - það er lítið gagn af því að henda mönnum bara aftur út á götuna eftir meðferð, í þeirra gamla umhverfi og kunningjahóp.  Meðferðin þarf líka að vera í höndum fagfólks, ekki trúarsamtaka, jafnvel þótt þau meini vel.

Refsingar

Það eru aðrir sem stunda fíkniefnaviðskipti ekki bara til að standa undir eigin neyslu heldur í ágóðaskyni.  Púkinn hefur enga samúð með slíku fólki.  Hann vil sjá það tekið úr umferð - varanlega, eða a.m.k. í einhverja áratugi.  Þessir aðilar stunda það að eyðileggja líf annarra.  refsingar við slíku ættu að samsvarandi og refsingar við morðum - jafnvel hærri, því fórnarlömbin geta verið fleiri.  Það má vera að það þurfi að byggja ný fangelsi, en Púkinn telur hreinan þjóðhagslegan ávinning af því aðkoma þessu liði úr umferð.  Refsiramminn í dag er of lágur, og er jafnvel ekki nýttur að fullu.  Þessu þarf að breyta.

Akstur undir áhrifum

Púkinn vill sjá hertar refsingar við akstri undir áhrifum - hvort sem þar er um að ræða áfengi eða fíkniefni.  Sér í lagi vill Púkinn að hér á landi verði tekið upp það kerfi sem tíðkast sums staðar að bílarnir séu gerðir upptækir (nema þeim hafi verið stolið, að sjálfsögðu).  Þessi aðferð er að vísu ekki áhættulaus - hún gæti leitt til aukningar á bílþjófnuðum og því að menn reyni að stinga lögregluna af með meðfylgjandi glæfraakstri, en jákvæðu áhrifin ættu að vega upp á móti því

Síðasta ríkisstjórn stóð sig ekki í þessum málaflokki.   Verður sú núverandi betri?

Fleiri ökumenn stöðvaðir undir áhrifum fíkniefna en áfengis

Ný leið til að læra íslensku - eða hvað?

Við leit að námsefni í íslensku fyrir útlendinga á geisladiskum rakst Púkinn á þann geisladisk sem hér er sýndur.  Það merkilegasta við hann er sennilega textinn "There are no audible words on this subliminal CD".

Einmitt það já. Við nánari athugun kom í ljós að diskurinn inniheldur aðallega rigningar- og  þrumuveðurshljóð, en í bakgrunninum eru einhver orð sögð, en of lágt til að hægt sé að greina þau.

Púkanum er ekki alveg ljóst hvernig þetta á að auðvelda íslenskunámið, en samkvæmt framleiðenda byggir þetta á því að virkja undirmeðvitundina.

Einmitt það já - þetta er væntanlega jafn áhrifaríkt og að undirbúa sig fyrir próf með því að sofa með námsbækurnar undir koddanum. 

Og verðið á þessum disk?  Tja, það er rétt tæpir 5 dollarar - enn eitt dæmi um að maður fær kannski það sem maður borgar fyrir.

Trú og fáfræði í Bandaríkjunum

Hvernig stendur á því að í landi sem stendur að mörgu leyti fremst í vísindum og tækni finnst stór hópur fólks sem hafnar mörgum merkilegustu niðurstöðum vísindanna og kýs að byggja líf sitt á gömlum sögum, sömdum í allt öðrum menningarheimi?

Hvers vegna er til fólk sem trúir firru eins og að maðurinn hafi verið skapaður fyrir um 6000 árum síðan eða að fyrir nokkur þúsund árum hafi gífurlegt flóð eytt öllu lífi á jörðinni nema nokkrum hræðum í skipi og þeim dýrum sem þar voru?

Það er að vísu svo í Bandaríkjunum að svona skoðanir eru algengastar meðal þeirra sem hafa lélega menntun eða litlar gáfur, en inn á milli má finna greint fólk sem skammast sín ekki fyrir að viðurkenna að það trúi þessu - fólk sem telur það rétt sinn að ala upp börn sín í sömu svartnættisfáfræðinni.

Nú má vera að einhverjir saki Púkann um að bera ekki virðingu fyrir skoðunum annarra, en það eru einfaldlega ekki allar skoðanir jafnréttháar - sumar skoðanir eru einfaldlega helber della frá upphafi til enda.  Púkinn ber ekki virðingu fyrir þeirri skoðun að tunglið sé gert úr grænum osti, né heldur ber Púkinn virðingu fyrir þeim sem trúa á bókstaflegan sannleik Biblíunnar eða að sögurnar af Adam og Nóa séu nokkuð meira en skáldskapur - mannanna verk, sem eigi ekkert erindi til nútímans, nema sem dapurleg heimild um fáfræði fyrri tíma.

Sem betur fer hefur nú svona fáfræði verið úthýst í flestum siðmenntuðum löndum, en þó er á því ein undantekning - Bandaríkin - hvað er eiginlega að þar?

Nei Púkinn ber ekki virðingu fyrir þeim sem neita að hugsa sjálfstætt eða neita að viðurkenna vísindalegar staðreyndir.  

Þróunarkenningin og sköpunarkenningin báðar réttar

Nicola Tesla

Það er í sjálfu sér athyglivert að menn skuli leita leiða til að flytja rafmagn á þráðlausan hátt, en það er hins vegar ekki nýtt, en rúm 100 ár eru síðan serbneski uppfinningamaðurinn og sérvitringurinn Nicola Tesla hóf rannsóknir á því sviði.

Tesla á heiðurinn af mörgum mikilvægustu uppfinningum nútímans, svo sem riðstraumskerfum og útvarpinu, þótt oft hafi aðrir fengið heiðurinn af þeim en hann var sérkennilegur í háttum og geðheilsa hans var dregin í efa af sumum.

Púkinn hvetur alla sem hafa áhuga á sérvitrum snillingum til að lesa um Nicola Tesla - það má t.d. byrja hér á Wikipedia.

Þráðlaust rafmagn er staðreynd