Krækiberjalíkjör

Púkinn er hlyntur öllu sem stuðlar að aukinni fjölbreytni í íslensku atvinnulífi - sérstaklega þegar um er að ræða eitthvað sem er umhverfisvænt og er ekki bundið við einn ákveðinn landshluta.   Hver veit nema niðurstaðan af þessu verði til dæmis íslenskur krækiberjalíkjör, eins og sá sem er þegar framleiddur í Nova Scotia eða Noregi.

Fleiri tegundir standa til boða auk þeirra sem vaxa villtar á Íslandi eins og krækiber, bláber, aðalbláber.  Einnig vaxa jarðarber villt hér, þótt þau séu reyndar ekki eiginleg "ber".  Hrútaber eru líka til, en tæplega raunhæfur kostur.  Það er síðan spurning um orðalag í lögunum - mega menn brugga úr því sem þeir rækta í görðum sínum og gróðurhúsum?  Þá höfum við rifsber, sólber, stikilsber, hindber, brómber og jafnvel vínber, svo ekki sé nú minnst á margvíslegar grænmetis- og kryddjurtir.

Hins vegar finnst Púkanum vera ákveðin mismunun á ferðinni hér.  Hvers vegna er þetta takmarkað við íslensk ber og jurtir?  Í Finnlandi vaxa til dæmis rúmar 30 tegundir af berjum sem hægt er að brugga úr - Púkanum finnst svolítið óréttlátt að hann megi ekki brugga moltuberjasnafs, nú svo að ekki sé minnst á að greinarmunur er gerður á íslenskum vínberjum og innfluttum.

Hitt er síðan annað mál að með þessu er verið að lögleiða það sem hefur verið stundað á mörgum stöðum árum saman, mörgum til ánægju.  Gott mál.

Megi brugga íslensk vín

Trúarfasismi

Af hverju á ein trúarstofnun að hafa þau völd að geta sagt þeim sem ekki aðhyllast hennar trú fyrir um hvað þeir mega og hvenær?

Hvar er réttlætið í því að búddistum eða múslímum sé til að mynda bannað að spila bingó á þeim dögum sem teljast helgidagar samkvæmt tímatali kristninnar?

Þetta er að sjálfsögðu mismunun.  Búddistinn eða múslíminn má ekki fara eftir sínu trúarlega dagatali um það hvenær honum leyfist t.d. að spila bingó - aðeins sá kristni má gera slíkt.

Það er ekkert eðlilegt við þetta - hér er um að ræða leifar af úreltu fyrirkomulagi frá þeim tíma er völd kirkjunnar voru yfirgnæfandi í þjóðfélaginu.   Sá tími er liðinn, en því miður sitjum við enn uppi með óæskilegar leifar eins og þessar.

Púkinn er að sjálfsögðu trúlaus með öllu og ef hann hefði einhvern áhuga á bingó myndi hann sjálfsagt leita að öðrum skoðanabræðrum sínum til að spila við sig á páskadag, svona til að mótmæla þessum trúarfasisma. 

Bannað að spila bingó á ákveðnum tímum um páska

Endurteknar dóprassíur

Púkinn ætlar ekki að fara út í umræðuna um lögleiðingu kannabisefna, eða hvort harðari efnum skuli dreift til fíkla til að daga úr glæpatíðni.  Nei, það sem Púkinn ætlaði að minnast á er frasinn um að þetta kvöld eigi eftir að endurtaka sig.

Auðvitað á það eftir að endurtaka sig - við hverju búast menn eiginlega...menn eru teknir með eitthvað lítilræði, málið telst upplýst og þeim sleppt til að fara út aftur og ná sér í næsta skammt.

Það þarf að ráðast að rótum vandans - ekki vera bara með síendurteknar rassíur sem engu skila til lengri tíma.

Púkinn vill sjá fíkla skikkaða í meðferð, en til þess verður að bæta meðferðarúrræðin verulega.

Púkinn vill líka sjá sölumennina (þá stóru, ekki bara smáfíklana sem selja til að fjármagna eigin neyslu) dæmda til mun harðari refsinga - ekki til að bæta þá, ekki til að "senda skilaboð út í þjóðfélagið", heldur til að vernda þjóðfélagið gegn viðkomandi.

Meðan ekkert róttækt er gert í málinu munum við bara sjá endurtekningar á þessu kvöldi og ekkert annað. 

"Þetta kvöld á eftir að endurtaka sig"

Týnd í fjögur ár á Íslandi?

Þessi frétt vakti Púkann til umhugsunar um hvort einhver gæti legið látinn heima hjá sér árum saman hér á Íslandi, án þess að það myndi uppgötvast.

Svipuð  mál hafa komið fyrir hérlendis, en þá hefur verið um að ræða daga eða vikur, jafnvel mánuði, en aldrei ár.  En samt, gæti þetta skeð? Það eru margir einstæðingar hér á landi, því miður, fólk sem á fáa eða enga vini og ættingja - fólk sem lifir út af fyrir sig og engir eftirlitsaðilar fylgjast með.   

Fólk getur verið á bótum sem renna inn á reikning sem rafmagn, sími, hiti og jafnvel húsaleiga eru sjálfkrafa greidd af - það er helst skattskýrslan sem gæti valdið því að þetta uppgötvaðist - nú, eða þá lyktin.

Það er í rauninni ekki svo fáránlegt að þetta gæti gerst.

Því miður. 

Myndin hér til hliðar er frá Tula í Rússlandi, en þar fannst lík sem hafði setið við borð í sex ár og var lýst sem "múmíu". Sjá hér.

Fannst á heimili sínu eftir að hafa verið týnd í fjögur ár

Ísland - hreinasta svifryk í heimi

Jæja, svo Hong-Kong búar sem búa við umtalsverða loftmengun lifa nú lengur en Íslendingar.

Þetta er að sjálfsögðu enn eitt áfallið fyrir vesalings þjóðarsálina - ekki nóg með það að við eigum bara 17. besta vatn í heimi, heldur getum við ekki lengur haldið því fram að eiga tærasta loftið - Ætli sá heiður falli ekki Grænlendingum í skaut núna.

Það var orðið nokkuð ljóst að loftið hér í Reykjavík var orðið slæmt í vetur þegar sást til fólks með öndunargrímur á götum úti, en þetta er einmitt svið þar sem Hong Kong búar hafa mikla reynslu.

Kannski stefnan sé bara að leyfa menguninni að aukast, þangað til það eina sem við getum montað okkur af sé að vera með hreinasta svifryk í heimi.

Nei takk, segi ég bara.

Íbúar Hong Kong þeir lífseigustu

Gott nafn - eða ekki?

"Íslandsflokkurinn" - er það gott nafn eða ekki?  Púkinn er ekki alveg viss.  Annars vegar lýsir það nokkuð vel því  sem framboðið vill standa fyrir - framtíð landsins sem heild, en ekki bara hagsmuni einhvers tiltekins þröngs hóp, eins og til dæmis "Kristilegi frlokkurinn" eða "Þjóðernissinnaflokkurinn".

Á hinn bóginn er þetta nafn nokkuð ... stórt.  Púkanum fannst á sínum tíma ákaflega ósmekklegt af Árna Johnsen að keyra um á bíl með skráningarnúmerinu "'ISLAND", og að vissu leyti á það sama við hér.

Þrátt fyrir góðan vilja er það ljóst að þessi flokkur mun aldrei ná meirihlutafylgi, þannig að hann mun aldrei geta talað fyrir allt Ísland - hann mun laða til sín óákveðna og fólk sem vill breytingar - fólk sem er orðið þreytt á núverandi ástandi, en telur sig samt ekki eiga samleið með neinum þeirra flokka sem þegar eiga fulltrúa á þingi.

Hvert endanlegt fylgi verður þegar talið verður upp úr kjörkössunum ræðst af mörgu - hvað önnur framboð gera til að halda í sitt fólk, hvort eitthvað verður af framboði aldraðra, hverjir verða á framboðslistunum, hverjar áherslur flokksins verða í öðrum málum - það er ekki nóg að segjast bara vilja höfða til blágræna fylgisins og treysta á óánægjufylgið en síðast en ekki síst því hvort frambjóðendur slysast til að koma með einhverjar heimskulegar yfirlýsingar sem fæla fólk í burtu á síðustu stundu.

Púkinn er ekki að segja að hann hafi neina tillögu um betra nafn - hann átti allt eins von á að sjá eitthvað eins og "Framtíðarflokkurinn", en við sjáum til hvort þetta skýrist ekki á næstu dögum. 

Íslandsflokkurinn vinnuheiti á áformuðu þingframboði Margrétar Sverrisdóttur

Barnaklámsnetlöggan

Þar sem allir eðlilegir einstaklingar hafa viðbjóð á barnaklámi virkar það oft vel að veifa barnaklámsflagginu til að auka eftirlit með tölvunotendum eða takmarka réttindi þeirra á einhvern hátt.  Það er erfitt fyrir menn að vera á móti aðgerðum af þessari tegund án þess að verða úthrópaðir sem perravinir.

Málið er hins vegar ekki svo einfalt.

Púkinn hefur áður skrifað um tengt efni - samanber þessa grein. 

Nú ætlar Púkinn hins vegar að fullyrða að tilraunir til að stöðva dreifingu óþverrans á þann hátt sem dönsk stjórnvöld eru að ræða um eru einfaldlega ekki vænlegar til árangurs. 

Netfyrirtæki geta vissulega lokað á aðgang að einstökum vefsíðum, en í þessum tilvikum myndu síðurnar bara færast annað, eða jafnvel vera komið fyrir á tölvum einstaklinga án þeirra vitundar.

Það eru þekkt dæmi um það að brotist hafi verið inn á tölvur og þær notaðar til að hýsa þjóna til dreifingar á margvíslegu kolólöglegu efni.  Í einhverjum tilvikum hafa eigendur tölvanna síðan lent í verulegum vandræðum fyrir vikið.

Ef stjórnvöld ætlast hins vegar til að netfyrirtækin horfi ekki á uppruna efnisins, heldur ritskoði það hreinlega, er málið enn fáránlegra.  Burtséð frá því að mögulega er þetta efni sent dulkóðað á milli manna, er í hæsta máta vafasamt að notendur sætti sig við almenna ritskoðun, til að unnt sé að leita að svona efni.

Eitt enn sem menn hafa verið að horfa á er að skylda netfyrirtækin til að geyma öll gögn um samskipti langt aftur í tímann.  Hugsunin er þá að ef einhver perri er gripinn, þá séu hans samskipti skoðuð til að athuga uppruna efnisins og síðan væntanlega gerð húsleit hjá öllum öðrum sem hafa fengið efni frá sömu stöðum. Það eru hins vegar ýmis tækni- og siðferðisleg rök gegn þessu.

Eða, eins og Púkinn sagði áður - þetta er ekki alveg svona einfalt.

Barnaklám af Netinu

Forritun fyrir stráka!

Púkinn styður að sjálfsögðu allt sem getur aukið áhuga námsmanna á forritun.  Það sem Púkanum finnst hins vegar merkilegt er hvers vegna svo virðist sem keppni eins og þessi höfði fyrst og fremst til strákanna.  Nú veit Púkinn reyndar ekki hvort staðan hefur breyst í ár, en þegar keppnin var haldin 2005 hétu keppendur Kvennaskólans Einar, Einar Óli og Hinrik, svo eitt dæmi sé tekið.

Séu myndir frá síðustu keppni skoðaðar, þá er karlpeningurinn allsráðandi.  Hvað veldur?

Þátttaka í svona keppni er gott veganesti fyrir starfsferil á hugbúnaðarsviðinu og góður árangur er vel þess virði að nefna hann á starfsferilslýsingunni þegar að því kemur að sækja um "alvöru" störf.

En, það eru að meirihluta strákar sem gera það.  Púkinn hefur sagt áður að hann myndi gjarnan vilja ráða fleiri kvenkyns forritara og kerfisstjóra, en þær þær virðast bara ekki vera til.

Hvar eru femínistarnir og jafnréttissinnarnir núna?

Forritað af kappi

"Voting for dummies"

Nú eru 20 ár síðan Púkinn taldi sig fyrst skilja kosningalöggjöfina.  Það var þá verið að hræra í kosningalögunum, færa einhverja þröskulda upp og niður og hnika til tölum þangað til allar voru sæmilega ánægðir.

Allir hverjir?  Jú - fyrst og fremst sitjandi þingmenn - það mátti nefnilega ekki breyta lögunum þannig að menn sem "áttu" sín þingsæti myndu detta út.

Púkinn kom ásamt öðrum að gerð forrits á þessum tíma sem reiknaði út hvernig lögin myndu virka, miðað við tilteknar atkvæðatölur.  Það var að vísu eitt vandamál við þá forritun - það hefði getað gerst að forritið lenti í endalausri lykkju og ekki væri hægt að úthluta öllum þingsætunum.  Lögin voru einfaldlega ekki rökrétt, en það er jú ein versta martröð forritara að þurfa að forrita órökrétta hluti.

"Flakkaranum" var síðan bætt við og ætti það að hafa leyst fyrrnefnt vandamál, en kosningalögin eru í dag þannig að Púkinn leyfir sér að efast um að þeir séu margir sem raunverulega skilji þau.

Æ, já - bókin sem myndin er af hér til hliðar er víst ekki til, en stundum finnst Púkanum hann þurfa á slíkri bók að halda.

Jafnan rétt til hvers?

Þegar spurt er hvort karlar og konur hafi jafnan rétt, þá vantar að mati Púkans eitt inn í þá spurningu ... jafnan rétt til hvers?

Er verið að spyrja um jafnan rétt til þess sem flestir telja sjálfsögð mannréttindi nú orðið?  Jafnan rétt til menntunar?  Jafnan rétt til heilbrigðisþ.jónustu?  Jafnan rétt til aðgangs að opinberun stofunum?  Nú orðið er erfitt að finna dæmi um mismunun á þessu sviði, miðað við það sem var áður.

Eða....

Er verið að tala um jafnan rétt til jafnra launa?

Púkinn er að sjálfsögðu fylgjandi því að jafn hæfum einstaklingum, með sömu menntun og reynslu séu greidd sömu laun fyrir sömu vinnu, óháð kyni, háralit eða skóstærð.  Þessi atriði skipta Púkann í sjálfu sér ekki máli. 

Fólki hættir hins vegar til að horfa á launamun karla og kvenna án þess að takl fullt tillit til hæfni, reynslu og menntunar. 

Vandamálið sem Púkinn á við að stríða er annað.  Þegar í fyrirtæki Púkans eru í boði störf sem krefjast lítillrar menntunar eða reynslu, sækir jafnt hlutfall karla og kvenna um. Þegar í boði eru tæknileg störf, sem krefjast menntunar og/eða reynslu er mikill meirihluta umsækjenda karlkyns.  Hvers vegna?

Sem stendur er Púkinn til dæmis að auglýsa eftir Linux kerfisstjóra.  Allir umsóknir  sem hafa borist um það starf eru frá karlmönnum.  Púkinn myndi gjarnan vilja ráð femíniskískan kvenkyns Linux kerfissstjóra - en þeir bara virðast ekki vera til.

Meðan karlar og konur sækjast eftir mismunandi störfum er hætt við að launamunur hverfi ekki. 

56% Íslendinga telja konur hafa jafnan rétt og karlar