Vanhæfir foreldrar

Púkinn á bágt með að skilja hvað er að foreldrum þeirra drengja sem voru teknir (og ekki í fyrsta skipti) fyrir akstur á fjórhjólum.  Þetta eru nú ekki ódýrustu leiktækin á markaðnum, þannig að hér er augljóslega um að ræða fólk með of mikla peninga og of lítið vit í kollinum.

Það er á svona stundum sem Púkanum finnst það jaðra við að vera hlálegt að fólk skuli þurfa leyfi til að meiga eignast hund, þar sem krafist er umsagnar tvegggja valinkunnra manna, en engar hæfniskröfur séu gerðar til þeirra sem eignast börn.

Foreldrar sem ítrekað leyfa 10 og 12 ára börnum sínum að rúnta um á svona tækjum eru vanhæfir - það er ekkert meira um það að segja. 

Vonandi átta foreldrarnir sig ef barnaverndaryfirvöld fara að gera athugun á heimilishögum þeirra, en hins vegar finnst Púkanum það dapurlegt að lögreglan skuli ekki hafa heimild til að gera meira.  Það vantar leyfi til að gera svona tæki upptæk undir svona kringumstæðum

Þetta er reyndar sama og Púkinn vill sjá varðandi bíla þeirra sem gripnir eru viðakstur undir áhrifum - það ætti að gera bílana upptæka, eða að minnsta kosti að kyrrsetja þá til lengri eða skemmri tíma.  Þetta eru jú tæki sem eru notuð til að fremja með afbrot.

Vonandi kemur að því að einhverjir þingmenn átti sig á kostum svona lagaheimildar.

10 og 12 ára teknir á fjórhjólum

Vistvænir bílar

Púkinn heyrði einhverjar hugmyndir um að hvetja til notkunar á vistvænum bílum meðví að leyfa þeim að leggja endurgjaldslaust í stæði.

Þetta er í sjálfu sér ekki slæm hugmynd, en óttalega hljómar þetta nú korter-fyrir-kosningalega, svona eins og flokkurinn sem stendur að þessu sé að reyna að skella á sig einhverri grænni slikju svona til að telja fólki trú um að umhverfismál skipti hann raunverulegu máli.

Kannski eigum við eftir að sjá bíla eins og þessa hér á götunum - ekki kraftmikill, að vísu - væntanlega bara eitt hestafl, en samt...

Hagkvæmt fyrir hverja?

Jæja, svo ríki og sveitarfélög eiga að selja fasteignir sínar og leigja þær síðan aftur til baka?  Það er örugglega hagnaðarvon í þessu - fyrir fasteignafélögin a.m.k.

Þau fyrirtæki sem stunda það að kaupa fasteignir og leigja þær síðan aftur fyrri eigendum eru ekki góðgerðarstofnanir - nei, þeirra markmið er að græða, a.m.k. til lengri tíma litið og í þessu tilviki eru það peningar skattborgaranna sem þeir vilja koma höndum yfir.

Það er reyndar einn flötur á þessu máli sem ef til vill er vit í - hið opinbera hefur oft sinnt viðhaldi sinna bygginga mjög illa, þannig að þegar loksins er ráðist í viðgerðir á skemmdum eru þær mun tímafrekari og kostnaðarsamari en ef um jafnt og stöðugt viðhald hefði verið að ræða.  Ef byggingarnar væru í eigu einkaaðila, væri ef til vill von til að þessum málum væri sinnt betur.

Segir hagkvæmt fyrir opinbera aðila að selja fasteignir sínar

Ef það væri ekki fyrir innflytjendur...

Eins og þeir vita sem þekkja Púkann þá hefur hann mikinn áhuga á ættfræði. 

Sú umræða sem hefur verið í gangi hérlendis um innflytjendur varð til þess að Púkinn ákvað að athuga hversu mikið væri um innflytjendur í ættum Íslendinga.  Landnámsmennirnir voru að sjálfsögðu innflytjendur síns tíma, en Púkinn vill nú líta fram hjá þeim og skoða bara innflytjendur seinni tíma - eftir siðaskipti til dæmis.

Niðurstöðurnar voru athygliverðar. 

Í ættartré Púkans má finna allnokkra inflytjendur og erlenda aðila sem höfðu hér viðdvöl um lengri eða skemmri tíma, svo sem danskan kaupmann, Westy Petræus, sem var hér um aldamótin 1800.

Púkinn tók sæmilega stórt handahófsúrtak af Íslendingum og athugaði ættartré þeirra.  Í allmörgum tilvikum fundust einhverjir svipaðir innflytjendur eða erlendir forfeður, en í einstaka tilvikum þurfti að fara lengra aftur í aldir, jafnvel allt til manna eins og Erasmusar, sonar Villadts, sem kom hingað skömmu eftir siðaskipti.

Í handahófsúrtaki Púkans ver hins vegar enginn sem hafði enga innflytjendur meðal forfeðra sinna, eða erlendar greinar í ættartrénu.

Niðurstaðan - jú, ef það væri ekki fyrir innflytjendur, þá værum við ekki hér.

"Hátæknilandið" Ísland

Púkinn lenti um daginn í rökræðum um framtíð hátækni á Íslandi.  Þetta er í sjálfu sér ekki í frásögur færandi, nema hvað Púkinn fór að hugleiða mismunandi skilgreiningar á hátækni, og í framhaldi af því hvort öll hátækni væri æskileg hér á landi.

Sumir skilgreina "hátækni" sem notkun á þeirri tækni sem telst þróuðust á hverju sviði á hverri stundu.  Samkvæmt því telst t.d. olíuhreinsunarstöð sem byggð er þannig að hún nýti sér nýjustu tækni til olíuhrinsunar vera "hátæknifyritæki".

Þetta er gott og blessað, það er bara ekki svona "hátækni" sem Púkinn vill sjá hér á landi - nei, Púkinn vill hátækni sem byggir á þekkingu og menntun.  Fyrirtæki sem ekki byggja eingöngu á því að þjálfa starfsmenn til að nota innfluttan hátæknibúnað, heldur fyrirtæki sem nota menntun og þekkingu starfsmanna til að framleiða hátæknivörur.

Púkinn vill sjá fyirtæki í lyfja-, líftækni-, rafeinda, upplýsingatækni- og jafnvel fjármálageiranum.  Fyrirtæki þar sem stór hluti starfsmanna hefur langskólamenntun og nýtir þá menntun við vinnu sína.

Púkinn er búinn að fá nóg af orkufrekum mengunarfyrirtækjum.

Burt með bókabúðir - inn með spilavíti!

Nú er illa komið fyrir þjóðinni sem einu sinni kallaði sig "bókaþjóð".

Bókabúðin við Hlemm leggur upp  laupana og í stað hennar kemur stækkað og endurbætt spilavíti.

Hvað segir þetta um þróun íslensks þjóðfélags?

Íslendingar gefa jú enn hverjir öðrum mikið af bókum í jólagjafir - það er sterk hefð fyrir þeirri tegund "harðra pakka", en er bókalestur að öðru leyti ekki að dragast saman - sérstaklega meðal yngra fólks?  Það er í sjálfu sér ekki skrýtið, það er svo miklu meira framboð af annars konar afþreyingarefni en fyrir nokkrum áratugum - fleiri sjónvarpsrásir og  tölvuleikir til dæmis.  Púkinn fær ekki betur séð en að bókamenning íslendinga sé á undanhaldi...því miður.

Spilavítin eru að sjálfsögðu önnur tegund afreyingar - afþreying sem sem beint er til heimskingja og fíkla.  Það eru sjálfsagt einhverjir aðrir sem detta inn einstöku sinnum, en "fastakúnnarnir", þeir sem halda uppi rekstrinum eru annað hvort of heimskir til að átta sig á tilgangsleysi þess að henda peningunum svona frá sér, nú eða þá orðnir of háðir spilafíkninni til að geta hætt.

Það er skoðun Púkans að það ætti að loka þessum stöðum, ekki stækka þá.

Háspenna ætlar að stækka spilasal við Hlemm

Tækniþróunarsjóður - og svo hvað ?

Íslenskir stjórnmálamenn eru enn við sama heygarðshornið - halda að öll vandamál sé hægt að leysa með því að moka í þau peningum.

Nú er Púkinn ekki að segja að það sé slæmt að styrkja Tækniþróunarsjóð, en leysir það raunverulega vandamálið?  Staðreyndin er sú að ekki gengur eins vel að breyta hugvitinu í framleiðsluvörur hér á landi eins og í þeim löndum sem við viljum bera okkur saman við.

Og hvers vegna skylkdi það nú vera?  Jú, það skyldi þó aldrei vera vegna þess að aðstæður fyrir hátæknifyrirtæki eru einfaldlega mun lakari hér á landi en erlendis.

Það er margt sem spilar þar inn, en Púkinn ætlar sem stendur bara að nefna nokkur atriði:

• Fjandsamlegt skattaumhverfi fyrir einyrkja sem vilja stofna fyrirtæki sem byggir á hugviti.
• Alger skortur á fjárfestum sem hafa áhuga á fjárfestingum í fyrirtækjum af millistærð.
  
• Öryggisleysi í gagnaflutningsmálum
• Enginn  stuðningur við R&Þ í gegnum skattakerfið.
• Verulegur skortur á hæfu fólki.
• Ósanngjörn samkeppni opinberra aðila.
• Ofurkrónan, sem er að murka lífið úr útfluningsfyrirtækjunum.
  

Staðreyndin er einfaldlega sú að meðan umhverfið er þannig að fyrirtækin eru að flytja starfsemina að stærri og stærri hluta úr landi, þá skiptir það einfaldlega ekki máli hvort einhverjum milljónahundruðum meira eða minna er hent í Tækniþróunarsjóð - það mun ekki breyta neinu til lengri tíma litið.

Stefnt að tvöföldun framlaga til Tækniþróunarsjóðs til ársins 2012

Gott hjá tryggingafélaginu

Púkinn hefur margítrekað þá skoðun sína að fólk verði að taka ábyrgð á gerðum sínum og taka afleiðingunum.  Bíleigendur bera almennt ábyrgð á því hverjir aka bílum þeirra og í þessu tilviki er ljóst að bíleigandinn leyfði manni að aka bílnum sem ekki var þess trausts verður.

Púkinn á reyndar hreinlega bágt með að skilja rök þeirra sem vilja meina að tryggingarfélagið hefði átt að bæta skaðann, ekki nema þá þeir telji að kaskótryggingin fela líka í sér einhverja afglapatryggingu eigandans og að tryggingafélagið ætti síðan að endurkrefja ökumanninn um greiðslu tjónsins.

Sökin fellur á þá báða - eigandann sem sýndi það dómgreindarleysi að leyfa bróður sínum að nota bílinn og bróðurinn sem sýndi það dómgreindarleysi að aka ölvaður.  Leyfum þeim að jafna þetta sín á milli.  Tryggingarfélagið á ekki að bæta fyrir svona afglöp. 

Fær ekki greidda kaskótryggingu vegna ölvunar ökumanns

Gengissveiflur ofurkrónunnar

Tilfinningar Púkans til íslensku krónunnar eru nokkuð blendnar - svona eins og "love-hate relationship" milli fólks sem getur stundum ekki slitið sig hvort frá öðru, en öskrar á hvort annað þess á milli.

Síðustu árin hefur sambandið hins vegar verið á hraðri niðurleið.  Tekjur fyrirtækis Púkans eru að langmestu leyti í erlendum gjaldmiðli, en útgjöldin í íslenskum krónum.  Þetta setur ákveðinn þrýsting á sambandið þegar krónan er of sterk, þannig að Púkinn fær færri krónur fyrir hverja evru eða dollara.  Það er þó ekki endilega stærsta vandamálið.

Nei, stærsta vandamálið eru sveiflur krónunnar - þær gera allar áætlanir mun erfiðari en ella.  Hvernig í ósköpunum eiga útflutningsfyrirtæki að geta unnið í svona umhverfi? 

Og núna er manni sagt að búast við meiri sveiflum.  Úff. 

Púkinn vorkennir reyndar aumingja Seðlabankanum, sem veit vel að ofurkrónan er hægt og rólega að murka lífið úr útflutningsfyrirtækjunum og hrekja störf úr landi.  Hátt vaxtastig heldur krónunni uppi, en ef Seðlabankinn lækkar það er hætta á verulegu útstreymi gjaldeyris ef útgefendeur jöklabréfanna taka að ókyrrast - það gæti síðan valdið snörpu gengisfalli með verðbólguskoti eftir á.

Nei, það er ekki gaman að vera seðlabankastjóri í dag - sama hvað þeir gera eru þeir skammaðir. 

Skiljanlegar áhyggjur en tóninn of neikvæður segir Landsbankinn

Blúbb, blúbb í bílakjallaranum

Nýlegar fréttir um flóð í bílakjöllurum vöktu Púkann til umhugsunar um möguleika á flóðum vegna hækkunar sjávarmáls.

Í því sambandi varð Púkanum hugsað til fyrirætlana um byggð á landfyllingum og þau vandræði sem almennt geta skapast við sjávarsíðuna ef saman fer hækkandi sjavarborð, stórsteymi og "röng" vindátt.  Hætt er við að fréttir af flóðum í bílakjöllurum verði þá algengari.

Til lengri tíma litið er auðvitað hrein heimska að búa alveg við sjóinn og það vita þeir sem ætla að byggja í Örfirisey mæta vel...en eftir nokkra áratugi verður það ekki þeirra vandamál.  Þangað til verða kaupendurnir bara að fara eftir "the greater fool theory" - sama hversu kaupin eru heimskuleg - þú getur sennilega fundið einhvern sem er enn heimskari en þú til að kaupa af þér...

...þangað til menn þurfa árabát til að komast að útidyrunum.