Netþjónabú á Íslandi?

Púkinn hefur áður lýst þeirri skoðun sinni að of mikil áhersla sé lögð á stóriðju hér á landi og núverandi stjórnvöld séu að gera stór mistök.

Í mörgum öðrum löndum hafa menn veðjað á hátæknina, með góðum árangri, en sú er því miður ekki raunin hér á landi.

Sum hátæknifyrirtækin eru að flytja hluta starfseminnar úr landi en önnur, eins og OZ er varla unnt að kalla "íslensk" lengur.

Erlendir aðilar hafa velt fyrir sér hvers vegna Íslendingar reyna ekki að laða til sín erlend fyrirtæki, til dæmis með því að reka raforkufrek netþjónabú hérlendis.

Púkinn rakst til dæmis á þessa grein á siliconvalleywatcher.com. 

Íslendingar hafa einnig velt hugmyndinni fyrir sér, en það eru ljón í veginum - dýrt og óáreiðanlegt netsamband Íslands við umheiminn er stærsta vandamálið.  Því miður virðast ekki miklar líkur á að það batni - sem stendur er ástandið skelfilegt, með Cantat bilaðan og innlend fyrirtæki sem byggja starfsemi sína á Internetinu sitja bara og vona að ekki verði truflanir á FarIce á meðan.

Vonandi kemst Cantat í lag á næstunni, en líftími hans er brátt á enda, og þótt við fáum nýjan streng til Írlands, verður staðan sú að við munum þá hafa enga beina tengingu vestur um haf.

Það þýðir tafir, sem gera hugmyndir um netþjónabú hér á landi freklar óraunhæf.  

Púkanum finnst að það hefði verið meira vit í að láta peninga í betrumbætt samband Íslands við umheiminn heldur en að eyða þeim í vitleysu eins og Héðinsfjarðargöng.   Slík ákvörðun hefði hins vegar krafist framsýnna og gáfaðra stjórnmálamanna sem hugsa lengur fram í tímann en til næstu kosninga.

Þannig fólk virðist oft vandfundið á Alþingi.

Á hvaða leið eru tryggingarfélögin?

Er réttlátt að tryggingartakar borgi iðgjöld í samræmi við áhættu?

Púkinn var að velta þessu fyrir sér og niðurstaða hans var "stundum já, stundum nei".

Skoðum fyrst bílatryggingar.  Tryggingarfélögin hafa óskað eftir upplýsingum um ökuferil ökumanna, þannig að þau geti látið þá sem eru t.d. ítrekað teknir fyrir hraðakstur eða slíkt borga hærri iðgjöld en aðra. 

Þessari beiðni var hafnað, en hvað þetta mál varðar er Púkinn alfarið á bandi tryggingarfélaganna - það að aka of hratt er ákvörðun sem hver ökumaður tekur fyrir sig og Púkanum finnst ekki nema réttlátt að menn taki afleiðingunum af eigin hegðun. 

Skoðum næst sjúkdómstryggingar.  Púkanum finnst til dæmis á sama hátt eðlilegt að reykingarmenn borgi hærri iðgjöld en aðrir og með sömu rökum - fólk verður að taka afleiðingum eigin heimsku.

Hvað erfðagalla varðar snýst dæmið hins vegar við að mati Púkans þar sem tryggingartakinn getur á engan hátt borið ábyrgð á þeim göllum.  Þar ætti áhættan að dreifast á allt samfélagið.

Læknafélagið: Reynt að skipta þjóðinni upp í hreinan kynstofn og hina

Framtíð nýsköpunarfyrirtækja

Púkinn fagnar því þegar nýsköpunarfyrirtækjum gengur vel, en hins vegar er hann svolítið svartsýnn á köflum hvað framtíð nýsköpunarfyrirtækja almennt varðar.

Það verður nefnilega að segjast eins og er að ólíkt því sem gerist í löndum eins og Írlandi og Kanada, þá hefur stuðningur íslensskra stjórnvalda við nýsköpun verið ómarkviss og óáreiðanlegur.

Púkann grunar að ástæðan sé hugsanlega sú að stjórnmálamenn skilji hreinlega ekki hátækni.

Púkinn gæti haldið langa ræðu um það hvernig stefna stjórnvalda virðist stundum vera sú að hrekja nýsköpunarfyrirtæki úr hátæknigeiranum úr landi, en sú grein verður að bíða betri tíma.

Samt tekst sumum að gera athygliverða hluti og Púkinn verður nú að viðurkenna að fyrir 10 árum síðan hefði hann ekki átt von á að Íslendingar myndu flytja út búnað sem er eiginlega á mörkum þess að teljast hergögn.

Hafmynd handhafi Nýsköpunarverðlauna í ár

Falsaður tölvupóstur í ÞINNI tölvu!

Í tilefni umræðunnar um meintar falsanir á tölvupósti í Baugsmálinu finnst Púkanum við hæfi að minna á að verulegur hluti þess tölvupósts sem er í umferð er einmitt falsaður.

Hér á Púkinn að sjálfsögðu við ruslpóst sem hefur verið gerður þannig úr garði að meintur sendandi er allt annar en raunverulegur sendandi.  "Haus" póstsins er þannig falsaður og stundum einnig hluti þeirra upplýsinga sem fylgja póstinum um leið hans í gegnum Netið.

Þetta er ástæða þess að margir fá tölvupóst þar sem þeim er sagt að tölvupóstur þeirra (sem þeir kannast ekki við) hafi ekki komist til skila, en þá hefur póstfang þeirra verið sett sem póstfang sendanda.  Erfitt er að berjast gegn þessu nema með endurbótum á öllu kerfi póstsendinga á Netinu.

Hin tegund falsana felst gjarnan í því að halda "hausum" póstsins óbreyttum en breyta innihaldinu og prenta síðan breytta bréfið út.

Sendendur geta að hluta verndað sig gegn þessu með notkun rafrænna undirskrifta.

Falsaðir tölvupóstar og samsæri í Baugsmálinu

Hvað er barnaklám - hluti 2

Er hægt að kæra einstakling fyrir misnotun á sjálfum sér? Púkanum finnst skrýtið ef svo er.  Púkinn er reyndar ekki löglærður, en hann hélt að það væri nú þannig að lögum sem eru sett til verndar ákveðnum hópi væri almennt ekki beitt gegn meðlimum þess hóps.

Með öðrum orðum - er eðlilegt að lögum gegn barnaklámi sé beitt gegn börnum? Í hluta 1 af þessari grein benti Púkinn á Jeremy og Amber, sem gerðu þau mistök að taka myndir af sér í rúminu. 

Það eru fleiri dæmi um það sem Púkanum finnst óeðlileg beiting svona laga, til dæmis þetta.  15 ára stúlka sendi nektarmyndir af sjálfri sér til annarra í tölvupósti og var fyrir vikið kærð fyrir misnotkun á barni, framleiðslu og dreifingu barnakláms.  Það er nokkuð ljóst að hún var sek um dreifinguna - en Púkinn setur ákveðið spurningarmerki við misnotkunina.  Að mati Púkans þyrfti umrædd stúlka frekar á sálfræðiaðstoð en því að vera kærð fyrir misnotkun og þurfa að dragnast með barnaníðingsstimpil á sér ævilangt.

Púkinn vill ekki að neinn misskilji sig - hann vill sjá verulegar hertar refsingar handa þeim sem misnota börn, en ef lögin eru óljós, eða skilgreiningar í þeim eru óljósar er hætta á að annað af tvennu gerist - annað hvort gæti lögunum verið beitt í tilvikum þar sem það er umdeilanlegt, eins og í ofanfarandi dæmum, eða einhverjir sem ættu refsingar raunverulega skildar sleppa fyrir horn vegna gata í lögunum.

Hvort tveggja er slæmt.

Þess vegna er það mikilvægt að skilgreiningar í lögunum séu ótvíræðar og Púkinn spyr því aftur "Hvað er barnaklám".  Svarið við þeirri spurningu er nefnilega ekki svo einfalt og það er nokkurt magn efnis sem liggur á "gráu" svæði.

Tökum nokkur dæmi:

• Klámmyndir af börnum, framleiddar af þeim sjálfum.  Púkinn bendir á ofanfarandi sem dæmi um það.

• "Hentai" Grófar teiknimyndir í japönskum "manga" stíl.  Ef þær sýna börn, er það þá barnaklám? Engin raunveruleg börn voru (mis)notuð við gerð myndanna, en áhugi á þeim gæti borið vitni um verulega brenglaðan hugsanahátt.

• Tölvugrafík fer stöðugt batnandi og eitthvað mun vera um tölvugert klámefni.  Nú veit Púkinn ekki hvort nokkuð slíkt efni sýnir börn, en sé svo er spurningin hvort um "barnaklám" sé að ræða.  Hvað ef tölvugrafíkin batnar svo í framtíðinni að myndirnar verða óþekkjanlegar frá raunveruleikanum?

•  Ungar "fyrirsætur".  Það munu vera einhver dæmi um það að myndir séu teknar af "barnalegum" stúlkum, sem í raun eru 18 ára eða eldri (og eru löglegar þar sem þær eru framleiddar), en líta út fyrir að vera yngri.  Er þetta barnaklám?  Verjandi manna sem væru gripnir með slíkt myndefni gæti hugsanlega rökstutt að  svo væri ekki -  myndirnar sýni ekki börn - þær bara líti út fyrir það.
  

• Photoshop-breyttar myndir.  Hér er um svipaðan hlut að ræða, nema hvað myndir (sem eru löglegar þar sem þær eru framleiddar) eru teknar og þeim breytt til að láta "fyrirsæturnar" líta út fyrir að vera yngri en þær eru.  

Nú má vera að þetta sé ekki vandamál í raunveruleikanum, þar sem flestir sem eru gripnir með efni á svona "gráu" svæði eru væntanlega einnig með "harðara" efni, sem engin spurning er að flokkist sem barnaklám, og er þá hægt að dæma viðkomandi fyrir vörslu þess.  Púkinn vill hins vegar benda þeim sem vilja tjá sig um barnaklám á nauðsyn þess að hafa á hreinu hvað þeir eiga við.

Heilsuhótel?

Púkinn hefur ekki átt erindi í gömlu heilsuverndarstöðina við Barónsstíg áratugum saman og ber engar sérstakar tilfinningar til byggingarinnar sem slíkrar.

Byggingin er hins vegar reisuleg og gæti sjálfsagt orðið hið ágætasta hótel.  Að því gefnu að hægt sé að samræma nauðsynlegar breytingar við þær friðunarkröfur sem eru gerðar.

Það sem Púkanum finnst hins vegar furðulegt við þetta er hvernig einhver et tilbúinn til að fjárfesta í hótelbyggingu um þessar mundir, með tilliti til þess fjölda hótela sem er í byggingu eða á teikniborðinu.  Fer þessi markaður ekki að mettast?

Nema...auðvitað, ef hótelið á að höfða til einhvers sérstaks markhóps - á þetta e.t.v. að vera heilsuhótel?

Heilsuverndarstöðin við Barónsstíg verður hótel

40 ára fangelsi fyrir fáfræði?

Í hvaða ríki heims gætu kennarar átt á hættu 40 ára fangelsi fyrir að nemendur þeirra sjái efni á netinu sem er yfirvöldum ekki þóknanlegt?  Norður-Kóreu?  Kína?  Sádi-Arabíu?

Nei, í Bandaríkjunum. 

Julie Amaro var afleysingakennari sem kenndi 7. bekk grunnskóla í Connecticut.  Hún var ekki mjög tölvufróð og vissi ekkert hvað hún átti að gera þegar endalaus straumur af klámfengnum "pop-up" myndum tók að birtast á tölvunni í skólastofunni.  Tölvu sem ekki var varin af eldvegg eða "pop-up blocker " og hafði aðeins úrelt veiruvarnarforrit.

Hún hefði getað slökkt á tölvunni, eða ýtt á Ctrl-Alt-Del, kallað up Task Manager og skotið niður vafrann, en nei - hún hljop yfir á kennarastofuna að leita aðstoðar.

Stór mistök, en eins og Púkinn sagði...hún var ekki mjög tölvufróð.

Til að gera langa sögu stutta var hún kærð fyrir að stofna velferð barna í hættu ("endangering the welfare of children by exposing them to porn") - ein kæra fyrir hvert barn sem staðfest var að hefði séð klámmyndirnar. Fullyrðingar saksóknara (sem voru í besta falli ósannaðar, en í versta falli meinsæri), um að hún hefði beinlínis verið að skoða klámsíður bættu ekki stöðu hennar.  

Juli Amaro var fundin sek af kviðdómi.  Dómur verður kveðinn upp í byrjun mars, en samkvæmt lögum Connecticut gæti hún átt 40 ára fangalsi yfir höfði sér. 

Auga fyrir auga

Púkanum finnst í senn hlálegt og dapurlegt að Ísraelsríki skuli fordæma Palestínumenn miðað við hvernig þeirra eigin afrekaskrá er - hernám sem brýtur gegn alþjóðalögum, ólöglegar landnemabyggðir, skipulögð barátta til að brjóta niður innviði samfélags Palestínumanna, árásir á íbuðarhverfi (sem væru kölluð hryðjuverk ef einhver annar ætti í hlut) og fleira í svipuðum dúr, svo ekki sé nú minnst á hryðjuverk Ísraelsmanna gegn Bretum fyrir 60 árum síðan.

Ísraelsmenn komast nefnilega upp með hvað sem er, meðan Bandaríkin beita neitunarvaldi sínu í Öruggisráðinu til að stöðva hverja einustu tilraun til að fordæma hegðun Ísraelsmanna. 

Púkanum finnst einng dapurlegt að hér á Íslandi skuli vera til samtök sem styðja ofbeldisstefnu Ísraelsmanna.

Nú er Púkinn ekki að segja að hann sé stuðningsmaður Palestínumanna, enda eru þeirra aðferðir engu betri og þeir eiga sína stuðningsmenn hér sem vilja berjast gegn Ísraelsríki á hvaða hátt sem er.

Nei, Púkinn er þeirrar skoðunar að báðir aðilar séu of fastir í þeim úrelta hugsunarhætti semn einkennist af orðunum "Auga fyrir auga, tönn fyir tönn." 

Því miður sér Púkinn enga von um að þetta breytist á næstunni.

Olmert: Samstaða um að hundsa Palestínustjórn sem virðir ekki samninga

deCODE - fréttir?

Púkanum finnst það nú eiginlega ekki frétt að bréf deCODE hafi hækkað um 5 sent.

Ef menn skoða hvernig gengi bréfanna hefur þróast frá upphafi er ljóst að þessi nýjasta hækkun er minniháttar - þetta er ekki orðið að frétt ennþá - ef gengið stykki upp um 10% eða meira, þá væri þetta e.t.v. þess virði að fjalla um það. 

Það má einnig benda á að á bak við þessa hækkun voru einungis 281.117 bréf, eða um 80 milljónir íslenskra króna, sem er langt undir meðalveltu, sem er rúm 500.000 bréf.

Púkinn vill gjarnan fá fréttir af íslenskum fyrirtækjum, en þetta er bara ekki frétt.

Hækkun á bréfum deCODE

Samtök tilvistarskertra

Púkinn á við tilvistarkreppu að stríða - eða væri réttara að kalla það "tilvistarskerðingu"?  Hann er nefnilega ekki til - svona í vissum skilningi.

Púkinn hefur enga kennitölu og tilvist hans er ekki viðurkennd af hinu opinbera.  Hann getur ekki fjarfest í hlutabréfum eða höfðað meiðyrðamál, svo dæmi sé tekið um þá mismunun sem Púkinn og aðrir tilvistarskertir einstaklingar búa við.

Púkinn er ekki einn um að búa við þetta vandamál, en tilvistarskerðing er útbreiddari en margir myndu halda.  Meðal þekkra einstaklinga með tilvistarskerðingu má nefna Andrés Önd, Stekkjastaur og alla hans fjölskyldu, já og líka Silvíu Nótt.

Við, tilvistarskertir einstaklingar höfum fengið okkur fullsadda á þeirri mismunum sem viðþurfum að búa við og stefnum að stofnun samtaka til að standa vörð um hagsmuni okkar.

Tilvistarskertir einstaklingar allra landa, sameinist!