Hugleiðingar um fangelsismál

Undanfarið hefur verið minnst á það í fréttum að fangelsi landsins séu yfirfull, en einnig að fangelsismálastofnun sé gert að skera niður og spara í rekstri.

Sparnaður er svosem góðra gjalda verður þegar hann á við, en sparnaður í fangelsismálum er ekki það sem Púkinn vill sjá.

Þvert á móti myndi Púkinn vilja sjá kraft settan í nýja fangelsisbyggingu á höfuðborgarsvæðinu - aðgerð sem líka myndi skapa vinnu í byggingargeiranum.

 Áður en lengra er haldið er nú samt best að skoða hinn þrefalda tilgang fangavistar. 

Refsing 

Í fyrsta lagi þjónar fangavist þeim tilgangi að refsa fanganum - hugmyndin er að fangelsun hafi fælingarmátt - menn vilji fyrir alla muni forðast að lenda þar inni - og þeir sem lenda inni vilji forðast að koma þangað aftur. Til þess að fangavistin hafi fælingarmátt mega fangar hins vegar ekki líta á hana sem "hvíldardvöl", eins og sagt er að sé viðhorf sumra fanga - sér í lagi sumra af austur-evrópskum uppruna.  Frá þessum sjónarhóli er hægt að mæla árangur fangavistarinnar út frá "endurkomutíðni" - því minni líkur sem eru á að menn lendi ítrekað á bak við rimlana, því betur er kerfið að standa sig.  Japanska fangelsiskerfið er sagt státa af mjög lágri endurkomutíðni, enda er fangelsisvist þar víst frekar niðurdrepandi - það mun vera regla fremur en undantekning að mönnum sé haldið í einangrun langtímum saman.  

Mannbæting

Í öðru lagi þjónar fangavist þeim tilgangi að "bæta" fangann - gera hann að betri manni sem ekki brjóti af sér aftur.  Hér er aðallega horft til menntunar og þess að losa fangann við eiturlyfjafíkn.  Til að fangelsið virki sem meðferðarstofnun verður hins vegar rétt meðferð að vera í boði, starfsfólk verður að hafa rétta þjálfun og meðferðinni verður að vera fylgt eftir þegar fanginn er kominn aftur út í samfélagið.  Þetta mætti bæta verulega á Íslandi - þetta kostar pening, en spurning er hvort sá peningur myndi ekki skila sér margfalt aftur til samfélagsins í fækkun glæpa.

Verndun samfélagsins

Í þriðja lagi þjónar fangavist þeim tilgangi að vernda samfélagið gegn fanganum - hugmyndin er sú að viðkomandi brjóti jú ekki af sér meðan hann er bak við lás og slá.  Þetta á sérstaklega við þegar um geðsjúka afbrotamenn er að ræða, eða ofbeldishneigða síbrotamenn.

Púkinn er á þeirri skoðun að þetta eigi sérstaklega við þegar litlar líkur eru á að "mannbætandi" aðgerðir gagnist viðkomandi.  Það er ef til vill hart að þurfa að afskrifa einhverja sídæmda afbrota menn með þeim orðum að þeir eigi hvergi heima nema bak við rimlana, en ef ekkert annað ber árangur, þá eiga aðrir þegnar þjóðfélagsins heimtingu á að vera verndaðir gegn viðkomandi.

Púkinn myndi vilja sjá eftirfarandi:

• Sérstakt öryggisfangelsi fyrir erlenda fanga sem stendur til að vísa úr landi eftir afplánun.  Það er engum greiði gerður með því að leyfa þeim að stofna til tengsla við íslenska fanga.  Þetta er sérstaklega mikilvægt ef erlendu fangarnir hafa tengsl við erlend glæpasamtök.

• Stórlega bætt afvötnun/fíkniefnameðferð - það eru of margir fangar sem fremja afbrot til þess að fjármagna neyslu - það er engin von til að þeir láti af því nema það takist að stöðva neysluna.

• Ef fíkniefnameðferð ber ekki árangur og viðkomandi einstaklingur heldur áfram afbrotum eftir að hafa verið sleppt út, jafnvel í annað, þriðja eða fjórða sinn, er ljóst að
  refsing og mannbæting virka ekki á viðkomandi - í þeim tilvikum er tvennt til ráða - það mætti gefa viðkomandi sitt dóp frítt og undir eftirliti, þannig að hann þurfi ekki að fjármagna neysluna með afbrotum.  Hin lausnin er að loka viðkomandi inni til lengri tíma - í þeim tilgangi að vernda samfélagið gegn viðkomandi.

Hvað sem er gert, er boðaður niðurskurður ekki góð leið til að bæta núverandi ástand.

Athugasemdir

[Héðinn Björnsson, 17.12.2008 kl. 17:12]

Það er hætt við að brátt fyllist fangelsi af fólki sem ekki á í önnur hús að vernda.

[Óskar Þorkelsson, 17.12.2008 kl. 20:18]

jupp.. stækkum fangelsin því það eru slæmir tímar framundan :)

[molta, 18.12.2008 kl. 09:56]

Já, fangelsis og betrunariðnaðurinn er vaxtabroddur, fullt af óánægðu fólki sem er að missa eignir, fer í mótmæli og hægt er að fangelsa stórar torfur af fólki ef fáeinir missa stjórn á sér.

Á keflavíkurflugvelli eru stórar byggingar sem standa mikið til auðar.  Að auki er völlurinn  nú þegar girtur af með litlahrauns-kjúklingagirðingum, öflug, skotheld varðskýli á tveim inngöngum, auðvelt að loka þeim hlutum girðingarinnar sem hafa verið teknir niður.

Í bandaríkjunum eru flestir fangar í heminum.  Þar hefur fangaiðnaðurinn náð hæstu hæðum.  Ríkið er að auki tilbúið með neyðaráætlanir sem duga til að fangelsa milljónir bandarískra borgara, ef þeir fara að mótmæla af krafti.

Það er ástæðulaust að leggjast í volæði, bara drífa í uppbyggingu nýja Íslands, land fangelsa, fátæktar og þrælalundar.

http://www.freedomfiles.org/war/fema.htm

[Ásgeir Kristinn Lárusson, 21.12.2008 kl. 11:20]

Fangelsismál þjóðarinnar eru bókstaflega í járnum - eitt dæmið um ruglið er Skólavörðustígur 9, Hegningarhúsið. Ef við viljum kallast „siðuð þjóð“, þá verða þessi mál að vera í lagi og öllum til sóma.

[Þorsteinn Briem, 29.12.2008 kl. 14:24]

Gleðileg jól, Púkinn minn, langt fram á næsta ár!