Hrunið var fyrirsjáanlegt (upprifjun á spá frá júlí 2007)

Sumir (fyrrverandi) ráðamenn hafa haldið því fram að enginn hafi átt von á hruni íslensks efnahagslífs, en Púkinn þarf ekki að leita lengra en í sína eigin grein frá júli 2007:

Hagfræðingar framtíðarinnar munu ef til vill skilgreina þessar ákvarðanir Seðlabankans sem eina meginorsök hruns íslensks efnahagslífs á fyrstu áratugum 21. aldarinnar.

Greinina má lesa í heild hér .  Þessi orð voru rituð 15 mánuðum áður en allt hrundi, en þá hefði hverjum hugsandi manni átt að vera augljóst að hverju stefndi.

Var hlustað á Púkann og aðra sem vöruðu við þeirri braut sem þjóðfélagið var á?  Voru allir of uppteknir við að skara eld að eigin köku?

Svari hver fyrir sig.

Athugasemdir

[TARA, 17.3.2009 kl. 20:42]

Já, við vorum of upptekin af lífgæðakapphlaupinu og að eignast meira en næsti maður, til að hlusta á aðvörunarbjöllur í fjarska.

Við Íslendingar erum nefnilega haldin þeirri miður gáfulegri trú, að eigið ágæti sé svo mikið að ekkert geti orðið okkur að falli.

Ég vildi að ég hefði lesið þessa grein fyrir fimmtán mánuðum.

[Offari, 17.3.2009 kl. 22:48]

Hvernig stóð á því að ég var ekki varaður við svo ég hefði geta eflt gjaldeyrissjóð minn fyrir hrunið?

[Hildigunnur Rúnarsdóttir, 17.3.2009 kl. 22:51]

Nei, það hlustuðu fáir. Já, þetta var augljóst, ef skynsemin hefði verið tengd í fólki.

Verðmæti verða ekki til úr engu. Það bara virkar ekki þannig.

[Einar Indriðason, 18.3.2009 kl. 08:16]

Það var slatti af fólki sem varaði við, mishávært, og mismikilsmetið.  Var hlustað á það?  Nei.  Þetta voru "úrtölumenn", "svartsýnisfólk", "öfundssjúkir" ... og önnur neikvæð orð sem voru notuð, til að draga úr gildi viðvaranna....

Lærum við eitthvað af þessu?  Kannski sumir, en fráleitt að allir hafi lært á þessu.  Dæmi:  fjöldi þeirra sem ætlar enn að kjósa D og B samkvæmt könnunum.  ("Það var ekki kerfið sem brást, heldur fólk"!)  Stundum finnst mér að Ísland hefði átt að ýta á (kjarnorku) RESET takka, og bara klára málið.

[Sigurjón, 25.3.2009 kl. 16:07]

Ég get stoltur sagt þér það Púki góður, að ég tók þessi orð þín og fleiri alvarlega.  Ég fjárfesti ekki í hlutabréfum þessarra drulludela og setti allan minn sparnað á venjulega, verðtryggða sparibók.  Ég vil nota tækifærið og þakka þér fyrir varnaðarorðin.  Sá er (blogg)vinur er til vamms segir!