Utanþingsstjórn, takk!

Ef hér á landi væru þingmenn sem væri raunverulega annt um hag þjóðarinnar, en hugsuðu ekki bara um eigin hagsmuni og gengi í væntanlegum prófkjörum, þá myndu þeir vilja hæfasta fólkið í stjórn landsins.

Púkinn er þeirrar skoðunar að það sem Ísland þurfi á að halda sé stjórn skipuð hæfustu sérfræðingum á sínum sviðum - ekki stjórn atvinnupólitíkusa sem gegna allt öðrum ráðherraembættum en þeir hafa menntun og hæfileika til að sinna.

Utanþingsstjórn sérfræðinga myndi ekki sitja nema fram til kosninga og verkefni hennar væri að stýra þjóðarskútunni á sem farsælastan hátt þann tíma og taka á fyrirliggjandi vandamálum.

Púkinn treystir nefnilega ekki atvinnustjórnmálamönnum í prófkjörsslag til að gera það sem gera þarf - það er vafasamt að þeir myndu þora að taka nauðsynlegar en sársaukafullar ákvarðanir sem gætu fælt atkvæðin í burtu.

En nei - Púkanum verður tæplega að ósk sinni - hagsmunir flokkanna eru of miklir.

Þingflokksfundir hefjast

Björgvin og FME - hver fer næst ?

Púkinn er ekki alveg viss hvort það sé pólitískt snilldarbragð hjá Björgvin að láta það verða sitt síðasta embættisverk að reka stjórn FME, en hitt er víst að þetta útspil bætir möguleika hans á endurkomu í íslensk stjórnmál.

Fjármálaeftirlitið mátti alveg fá þessa flengingu, enda brást það á marga vegu, en þó hafa þeir þá afsökun að stofnunin missti marga af sínum hæfustu starfsmönnum yfir til bankanna sem tvö- eða þrefölduðu laun þeirra.  Þeir sem sátu eftir réðu einfaldlega ekki við verkefnið.

Seðlabankinn hefur hins vegar ekki þessa afsökun.  Þar tóku menn heimskulegar ákvarðanir - og ekki bara einu sinni, heldur endurtekið.  Seðlabankinn þrjóskaðist við að hækka og hækka vexti til að reyna að slá á verðbólguna, þrátt fyrir að bent væri á að bæði væru aðrar aðferðir vænlegri (hækka bindiskyldu bankanna til að slá á útlánagleði þeirra) og að með sífelldum vaxtahækkunum væru þeir að skapa gífurlegan óstöðugleika, því allt það fjármagn sem flæddi inn í landið vegna jöklabréfanna gæti flætt jafn hratt út aftur með tilheyrandi hruni.  

Nei, afglöp Seðlabankans voru mun verri en afglöp Björgvins og FME - og þess vegna hefði Púkinn viljað sjá þá fjúka fyrst...

... en þá mega Seðlabankastjórarnir í staðinn bara vera þeir næstu sem fá að fjúka.

Björgvin segir af sér

Þögn forsetans

Forseti Íslands hefur ekki látið mikið fyrir sér fara síðustu mánuðina, þrátt fyrir að sjaldan í sögu lýðveldisins hafi verið jafn mikil þörf á sameiningartákni fyrir þjóðina eins og núna.

Hvers vegna - tja, það skyldi þó aldrei vera vegna þess að undanfarin ár hefur forsetinn sýnt krónískan undirlægjuhátt gagnvart þeim fjárglæframönnum sem bera stóran hluta ábyrgðarinnar á núverandi ástandi.

Forsetinn talaði ekki á sínum tíma gegn græðgivæðingu þjóðfélagsins - nei, hann studdi útrásina með ráðum og dáð - og það náði hámarki þegar Baugur fékk útflutningsverðlaun forseta Íslands árið 2008.

Baugur - fyrirtæki sem ekkert hefur flutt út annað en peninga - fyrirtæki með hagsmuni sem voru andstæðir hagsmunum allra raunverulegra útflutningsfyrirtækja.

Já...stundum er kannski bara best að þegja og skammast sín ... en mikið saknar Púkinn nú þess að hafa ekki forseta eins og Vigdísi.  Þannig forseti myndi ekki þegja í dag.

 

Stjórnarskipti breyta engu

Skoðanakönnun - hvað ætlar þú að kjósa í vor?

Í október síðastliðnum var Púkinn með skoðanakönnun hér á blog.is um hvað fólk myndi kjósa ef þá hefði verið efnt til kosninga.

Í ljósi þess að nú standa raunverulega kosningar fyrir dyrum er við hæfi að endurtaka þá skoðanakönnun - sjá hér til hliðar.

Niðurstöður hinnar óvísindalegu könnunar Púkans í Október voru eftirfarandi:

B - Framsókn 7.0%

D - Sjálfstæðisfl. 17.0%

F - Frjálslyndir 4.1%

Í - Íslandshreyfingin 3.4%

S - Samfylkingin 22.2%

V - Vinstri grænir 23.2%

Ekkert af ofanfarandi 23.0%

Það kæmi Púkanum hins vegar ekki á óvart þótt niðurstöðurnar yrðu talsvert öðruvísi núna.

Svona til gamans þá bætti Púkinn við valmöguleikum sem vísa til tveggja hreyfinga sem hafa verið áberandi að undanförnu, ef svo færi að formleg framboð kæmu á þeirra vegum.  Stuðningsmenn Harðar Torfa og Sturlu geta þá nýtt sér þá valkosti.  

Sé fólk hins vegar enn tvístígandi, þá er enn í boði próf á vefnum sem segir fólki hvaða flokki það á helst samleið með, þótt spurningarnar séu orðnar nokkuð úreltar núna.

Geir: Kosið í maí

...mótmælendur sakaðir um eignatjón...

Nú vill Púkinn ekki verja skemmdarverk mótmælenda, en einhvern veginn læðist sú hugsun nú fram að það eignatjón sem þeir unnu sé smávægilegt miðað við það tjón sem Seðlabankinn olli með arfavitlausri stefnu, nú eða það tjón sem alþingismenn og ráðherrar hafa orsakað með sínum aðgerðum (eða aðgerðaleysi), nú eða það tjón sem Fjármálaeftirlitið olli með því að grípa ekki í taumana.

Það ætti ef til vill að kæra einhverja aðra líka fyrir að valda eignatjóni?

Tveir mótmælendur handteknir

Atvinnuleysi ... en á sama tíma finna sum fyrirtæki ekki starfsmenn

Á sama tíma og verulegt atvinnuleysi er í sumum starfsgreinum eru aðrar greinar þar sem skortur er á menntuðu fólki og íslensk fyrirtæki þurfa að leita erlendis eftir hæfum starfsmönnum.

Einhverjir horfa til framkvæmda í Helguvík og vona að mörg störf muni skapast þar, en Púkinn getur nú ekki að því gert, miðað við reynsluna frá Reyðarfirði, að hann veltir fyrir sér hversu mörg þeirra starfa munu bjóðast þeim sem nú eru á atvinnulausir á Íslandi .. . ætli erlendir láglaunaþrælar muni ekki vinna dágóðan hluta starfanna.

Ástandið er slæmt í byggingageiranum, enda voru umsvifin þar komin langt út fyrir öll velsæmismörk og alveg óhætt að slaka verulega á þar í nokkur ár, en uppsagnir og samdráttur snerta margar starfsgreinar og þeir eru margir, nýútskrifuðu viðskiptafræðingarnir og aðrir sem leita að störfum í samræmi við sína menntun, en koma alls staðar að lokuðum dyrum.

Inn á milli eru síðan fyrirtæki og greinar þar sem alger skortur er á menntuðu hæfu fólki hér á landi.

Yfir 10 þúsund án atvinnu

Hugleiðingar um fangelsismál

Undanfarið hefur verið minnst á það í fréttum að fangelsi landsins séu yfirfull, en einnig að fangelsismálastofnun sé gert að skera niður og spara í rekstri.

Sparnaður er svosem góðra gjalda verður þegar hann á við, en sparnaður í fangelsismálum er ekki það sem Púkinn vill sjá.

Þvert á móti myndi Púkinn vilja sjá kraft settan í nýja fangelsisbyggingu á höfuðborgarsvæðinu - aðgerð sem líka myndi skapa vinnu í byggingargeiranum.

 Áður en lengra er haldið er nú samt best að skoða hinn þrefalda tilgang fangavistar. 

Refsing 

Í fyrsta lagi þjónar fangavist þeim tilgangi að refsa fanganum - hugmyndin er að fangelsun hafi fælingarmátt - menn vilji fyrir alla muni forðast að lenda þar inni - og þeir sem lenda inni vilji forðast að koma þangað aftur. Til þess að fangavistin hafi fælingarmátt mega fangar hins vegar ekki líta á hana sem "hvíldardvöl", eins og sagt er að sé viðhorf sumra fanga - sér í lagi sumra af austur-evrópskum uppruna.  Frá þessum sjónarhóli er hægt að mæla árangur fangavistarinnar út frá "endurkomutíðni" - því minni líkur sem eru á að menn lendi ítrekað á bak við rimlana, því betur er kerfið að standa sig.  Japanska fangelsiskerfið er sagt státa af mjög lágri endurkomutíðni, enda er fangelsisvist þar víst frekar niðurdrepandi - það mun vera regla fremur en undantekning að mönnum sé haldið í einangrun langtímum saman.  

Mannbæting

Í öðru lagi þjónar fangavist þeim tilgangi að "bæta" fangann - gera hann að betri manni sem ekki brjóti af sér aftur.  Hér er aðallega horft til menntunar og þess að losa fangann við eiturlyfjafíkn.  Til að fangelsið virki sem meðferðarstofnun verður hins vegar rétt meðferð að vera í boði, starfsfólk verður að hafa rétta þjálfun og meðferðinni verður að vera fylgt eftir þegar fanginn er kominn aftur út í samfélagið.  Þetta mætti bæta verulega á Íslandi - þetta kostar pening, en spurning er hvort sá peningur myndi ekki skila sér margfalt aftur til samfélagsins í fækkun glæpa.

Verndun samfélagsins

Í þriðja lagi þjónar fangavist þeim tilgangi að vernda samfélagið gegn fanganum - hugmyndin er sú að viðkomandi brjóti jú ekki af sér meðan hann er bak við lás og slá.  Þetta á sérstaklega við þegar um geðsjúka afbrotamenn er að ræða, eða ofbeldishneigða síbrotamenn.

Púkinn er á þeirri skoðun að þetta eigi sérstaklega við þegar litlar líkur eru á að "mannbætandi" aðgerðir gagnist viðkomandi.  Það er ef til vill hart að þurfa að afskrifa einhverja sídæmda afbrota menn með þeim orðum að þeir eigi hvergi heima nema bak við rimlana, en ef ekkert annað ber árangur, þá eiga aðrir þegnar þjóðfélagsins heimtingu á að vera verndaðir gegn viðkomandi.

Púkinn myndi vilja sjá eftirfarandi:

• Sérstakt öryggisfangelsi fyrir erlenda fanga sem stendur til að vísa úr landi eftir afplánun.  Það er engum greiði gerður með því að leyfa þeim að stofna til tengsla við íslenska fanga.  Þetta er sérstaklega mikilvægt ef erlendu fangarnir hafa tengsl við erlend glæpasamtök.

• Stórlega bætt afvötnun/fíkniefnameðferð - það eru of margir fangar sem fremja afbrot til þess að fjármagna neyslu - það er engin von til að þeir láti af því nema það takist að stöðva neysluna.

• Ef fíkniefnameðferð ber ekki árangur og viðkomandi einstaklingur heldur áfram afbrotum eftir að hafa verið sleppt út, jafnvel í annað, þriðja eða fjórða sinn, er ljóst að
  refsing og mannbæting virka ekki á viðkomandi - í þeim tilvikum er tvennt til ráða - það mætti gefa viðkomandi sitt dóp frítt og undir eftirliti, þannig að hann þurfi ekki að fjármagna neysluna með afbrotum.  Hin lausnin er að loka viðkomandi inni til lengri tíma - í þeim tilgangi að vernda samfélagið gegn viðkomandi.

Hvað sem er gert, er boðaður niðurskurður ekki góð leið til að bæta núverandi ástand.

Allt sem fer upp....

Það má vera að einhverjum sem keyptu húsnæði fyrir nokkrum misserum síðan sárni þegar þeir eru sakaður um þá heimsku að hafa keypt fasteignir á fáránlegu yfirverði,  en raunin er sú að það mátti öllum vera augljóst að að fasteignaverð var orðið allt, allt of hátt á þeim tíma.

Augljósasta vísbendingin um það var hinn gífurlegi fjöldi íbúða sem var í byggingu og sömuleiðis sá fjöldi byggingaraðila sem stefndi að því að græða á íbúðabyggingum.  Þegar staðan er sú að hægt er að stórgræða á íbúðabyggingum er ljóst að munur á byggingarkostnaði og söluverði er orðinn óeðlilega hár.  Sú einfalda staðreynd hefði átt að vekja fólk til umhugsunar.

Jafnvel þótt ekki hefði komið til bankakreppu á Íslandi er næsta víst að íbúðarverð hefði lækkað að raunvirði - það stefndi í offramboð á íbúðum og slíkt leiðir alltaf til lækkunar.

Með öðrum orðum - þessi lækkun er eðlileg og óhjákvæmileg - þetta er ekki bara hluti af ráðagerð peningamanna um að ná til sín fasteignum þjóðarinnar á undirverði og neyða eignalausa þjóðina síðan til að leigja til baka húsnæðið.

Einhverjir gerðust síðan sekir um enn meiri heimsku með því að taka gengisbundin lán á þeim tíma þegar krónan var allt, allt of sterk.  Púkinn á mjög erfitt með að skilja hvernig nokkur gat rökstutt þá ákvörðun, því varnaðarorð heyrðust úr öllum áttum - útflutningsfyrirtækin börðust í bökkum og voru jafnvel að flytja starfsemi sína úr landi - Viðskiptahallinn var gengdarlaus og öllu haldið uppi með "ódýru" erlendu lánsfé.

Margir bentu á að þessi staða gæti ekki varað til frambúðar - það væri ekki spurning um hvort krónan myndi falla, heldur bara hvenær og hversu mikið.

Þeir sem hunsuðu þessi varnaðarorð og eru núna að sökkva í skuldafen geta í raun engum kennt um nema sjálfum sér.

Og þó...

Í einhverjum tilvikum var þessum erlendu lánum beinlínis otað að fólki af bankastarfsmönnum, án þess að fólk væri upplýst um þá gengisáhættu sem þeim fylgdi.   Hafi einhverjir fjármálaráðgjafar beinlínis mælt með þessum lánum á síðasta ári, jaðrar það við glæpsamlega vanrækslu að mati Púkans.

Á endanum ber fólk samt ábyrgð á eigin gerðum og getur ekki krafist þess að samfélagið bjargi því frá öllum afleiðingum eigin mistaka. Ef það ætti að gefa þeim eftir skuldir sem fóru of geyst í húsnæðiskaupum mætti spyrja hvort líka hefði átt að gefa þeim eftir skuldir sem töpuðu á Decode hlutabréfum, nú eða steyptu sér í skuldir í fjárhættuspilum.

Já - það getur verið erfitt að þurfa að taka afleiðingum eigin ákvarðana þegar þær eru rangar, en oft er lítið annað hægt.

25 til 30% lækkun þarf á fasteignamarkaði

Hvaða atvinnuleysi?

Púkinn auglýsti nýlega eftir starfsmönnum í tvö störf, en viðbrögðin benda nú ekki beint til þess að neitt atvinnuleysi sé í hugbúnaðargeiranum.

Fyriræki Púkans er eitt af þessum skrýtnu hugbúnaðarútflutningsfyrirtækjum sem hagnast á falli krónunnar, þannig að núna þessa dagana ætti að vera gott tækifæri til að færa aðeins út kvíarnar.

Störfin sem í boði eru eru tæknilegs eðlis, Linux/Perl og Windows/C++ forritun - hvort tveggja svona frekar "venjulegt", en hvað halda menn að margir Íslendingar hafi sótt um þessi störf?  20? 30?

Nei.

Heilir 4 íslenskir umsækjendur.

Það komu álíka margar umsóknir frá útlendingum sem gátu hugsað sér að setjast að á Íslandi, þannig að aðdráttarafl landsins er greinilega ekki með öllu horfið, en Púkinn verður nú að viðurkenna að það kom honum á óvart hversu fáir íslensku umsækjendurnir voru.

Sennilegasta skýringin er væntanlega sú að tölvufræðin hefur ekki verið í tísku undanfarin ár, þannig að fjöldi útskrifaðra (og sjálfmenntaðra) tölvumanna heldur ekki í við þarfir atvinnulífsins.

Ef Púkinn hefði auglýst eftir viðskiptafræðingum í tvö störf hefðu undirtektirnar sennilega orðið aðeins betri.

Getum ekki treyst á álið

Jólaguðspjallsskáldsagan

Púkinn er í hópi þeirra sem telja jólaguðspjallið lítið meira en skáldsögu og hin sjaldgæfa staða reikistjarnanna þann 17. júní árið 2. f.Kr breytir engu um það.

Það eru nefnilega aðeins of margar aðrar holur í sögunni.

Það var ekkert manntal framkvæmt árið 2 f.Kr, heldur var manntal Kýreníusar framkvæmt 7 árum síðar, árið 6 e.Kr.

Í því manntali var engin krafa gerð um að fólk færi til sinnar ættborgar, enda voru menn skráðir og skattlagðir þar sem þeir bjuggu, en ekki í þeirri borg sem þeir voru ættaðir frá.  Slík kvöð hefði valdið gífurlegri upplausn í þjóðfélaginu að tilgangslausu, þar sem margir hefðu þurft að eyða dögum eða vikum á ferð, fjarri heimili og vinnu.

Það var ekki nein þörf fyrir Jósef að þvælast alla þessa leið.

Jafnvel þótt hann hefði af einhverjum undarlegum ástæðum kosið að gera það, hvers vegna hefði hann þá átt að drösla kasóléttri heitkonu sinni með?  Staða kvenna á þessum tímum var aðeins betri en staða þræla, en þær voru ekki  skráðar enda boguðu þær ekki skatt.  Að leggja það á ólétta konu að sitja á asnabaki 140 kílómetra leið hefði verið mannvonska af verstu gerð.

Betlehem í Júdeu virðist líka tæplega hafa verið til sem bær á þessum tíma - a.m.k. hafa fornleifarannsóknir sýnt fram á byggð þar á tímabilinu 1200-550 f.Kr og frá 6. öld e.Kr, en engar mannvistarleifar hafa fundist frá tímabilinu 100 f.Kr. til 100 e.Kr, þótt vissulega megi vera að þar hafi verið einhver örfá hús á þessum tíma.

Hvers vegna er þá svona ósennilega saga í Biblíunni?

Er einhver sennileg skýring á þessari sögu - jú, nefnilega sú að menn væntu þess að Messías myndi  fæðast í Betlehem, en Jesús var talinn Galíeumaður (sbr. Jóh 7:41-43) Það var því nauðsynlegt að búa til sögu - skálda það upp að hann hefði víst fæðst í Betlehem eftir allt saman og þannig varð jólaguðspjallið til.

Síðan var búin til sú þjóðsaga til að þetta hefði gerst um 25. desember, sem gaf kirkjunni góða afsökun til að yfirtaka vetrarsólstöðuhátíðina sem haldin var um það leyti.

Púkanum finnst það ljótt að segja börnum svona skáldsögur undir því yfirskini að þær séu sannar. 

„Jesús fæddist 17. júní“