Eitur fyrir útlendinga!

Ef hér á landi yrði umhverfisslys þar sem hópur íslenskra manna fengi í sig hættulegt efni, í því magni að líklegt væri að þeir myndu bíða heilsutjón af, þá yrði allt vitlaust.  Það yrðu umræður á Alþingi um vinnuöryggi, fjölmiðlar myndu slá upp stórfrétt um málið og lögfræðingar færu á stúfana til að krefjast skaðabóta.

En hvað ef um útlendinga væri að ræða?  Púkanum er kunnugt um eitt dæmi þar sem hópur erlendra verkamanna lenti í því að anda að sér ákveðnu efni í því magni að það fór langt yfir öll leyfileg mörk.

Vakti það athygli?  Nei.  Gerðu fjölmiðlar veður úr málinu? Nei. Var mönnunum veitt besta mögulega læknisþjónusta, eða voru þeir bara sendir úr landi og nýir þræl...eh...erlendir verkamenn fengnir í staðinn?

Það virðist nefnilega ekki sama hverjir lenda svona uppákomum hér á landi.   Heilbrigðiseftirlitinu er kunnugt um þetta atvik og gerði athugasemd, en málið fékk ekki meiri athygli.  Það skyldi þó aldrei vera af því að engir Íslendingar urðu fyrir þessu?

Sænskt sýndarsendiráð

Í tilefni af umræðunni um óheyrilegan kostnað við byggingu og rekstur íslenskra sendiráða erlendis, er ef til vill við hæfi að  benda á það sem Svíar gerðu núna í vikunni.

Fyrsta sýndarsendiráðið er nú opið á netinu.  Nánar til tekið er það í Second Life tölvuleiknum, en sá leikur er í raun heill heimur - heimur þar sem fólk getur átt samskipti hvert við annað á margvíslegan hátt.

Sænsks sýndarsendiráðið þjónar reyndar einnig hlutverki landkynningarmiðstöðvar og er tilgangurinn væntanlega að hvetja fólk til að heimsækja Svíþjóð ... í raunveruleikanum, ekki tölvuspilinu.

Reykingamenn eru líka fólk (bara ekki eins lengi)

Púkinn er ekki hrifinn af reykingum og reynir eftir fremsta megni að forðast þá staði þar sem reykt er.  Það kemur þó fyrir að Púkinn neyðist til að sætta sig við reykingar annarra - nú síðast gerðist það á Stranglers-tónleikum sem voru haldnir hérlendis í vor. en þar reyndi Púkinn að njóta tónleikanna, þrátt fyrir loftmengunina, sem fór versnandi eftir því sem leið á kvöldið.

Þegar heim var komið lyktaði Púkinn eins og öskubakka, þannig að ekki var annað til ráða en að fara í sturtu og henda fötunum í hreinsun.

Svona uppákomur heyra nú vonandi sögunni til og fagnar Púkinn því að hér á landi muni aðrir ekki framar eyðileggja fyrir honum skemmtanir eða máltíðir með því að menga loftið umhverfis Púkann.

Sumir reykingamenn telja brotið á réttindum sínum og vilja halda uppteknum hætti, sem betur fer eru fleiri og fleiri komir á þá skoðun að þótt erfitt sé að banna fólki að reykja þar sem það skaðar enga aðra en sig sjálft, þá séu þeir tímar liðnir að fólk megi komast upp með að eitra fyrir öðrum.

Ja...nema þá börnunum sínum.

Það eru nefnilega ýmsir sem telja það eðlilegt að reykja innandyra heima hjá sér, þótt í fjölskyldunni séu börn eða aðrir aðilar sem ekki reykja.   Skítt með það að fólk kjósi að stytta sitt eigið líf - en þeir sem spúa tóbaksreyk yfir sín eigin börn eru einfaldlega óhæfir foreldrar - svo einfalt er það.

Ungfrú Barbiedúkka

Í tilefni af "Ungfrú Ísland" keppninni þar sem stúlkur ganga fram og aftur eins og Barbiedúkkur með innantóm bros, fannst Púkanum tilvalið að benda á þessa "Íslensku" Barbiedúkku sem er í boði á Ebay (sjá þennan hlekk). en hún mun víst vera 21 árs um þessar mundir og á sambærilegum aldri og keppendurnir.

Reyndar virðist hún bara nokkuð lík sumum þeirra. 

Cantat bilaður - enn einu sinni

Maður er einhvern veginn hættur að kippa sér upp við fréttir af því að Cantat sé bilaður eina ferðina enn.  Ekki er langt síðan hann komst loksins í lag aftur, eftir að hafa bilað fyrir síðustu áramót og ekki skrýtið að menn séu að velta fyrir sér hvenær hann verði endanlega afskrifaður.

Nú er bara að vona að engar bilanir verði á FarIce meðan Cantat-tengingin til Evrópu liggur niðri - afleiðingar þess gætu orðið slæmar. Menn munu sjá það fljótt ef skosku rotturnar naga strenginn í sundur á þeim hluta hans sem ekki hefur enn verið tvöfaldaður.

Það er enn alllangt í nýjan streng, Farice II og eins og Púkinn hefur oft sagt áður hefur hann verulegar efasemdir um hvernig staðið er að því máli, en sem stendur er lítið hægt að gera annað en að bíða og vona.

Bilun á Cantat-3 sæstrengnum

Lambakjöt...og alvöru lambakjöt

Púkinn er mikill áhugamaður um góðan mat, eins og sést kannski best á því að hann hefði nú bara gott af því að losa sig við nokkur kíló.

Hvað um það - eitt það besta sem Púkinn fær er gott lambakjöt, hvort sem það er grillað eða matreitt á annan hátt.

Púkinn hefur hins vegar stöku sinnum orðið þeirrar ógæfu aðnjótandi að vera boðið upp á nýsjálenskt lambakjöt.  Reynslan af því er að annað hvort séu allir kokkar óhæfir sem matreiða það, eða að þetta hráefni sé einfaldlega vont - já, hreint út sagt virkilega vont - það besta var með yfirgnæfandi "ullarbragði", en það verst var eins og eitthvað undarlegt kjötlíki - svo vont að Púkinn skildi það eftir á diskinum sínum, borðfélögum til mikillar undrunar - nokkuð sem gerist nánast aldrei.

Nú er Púkinn í sjálfu sér ekki mótfallinn því að leyft verði að flytja inn nýsjálenskt lambakjöt - en hann mun forðast að kaupa slíkt og hreinlega ekki kaupa lambakjöt í íslenskum verslunum nema það sé tryggilega merkt sem íslensk afurð af íslenskum lömbum.

Púkinn hefur það einnig fyrir venju að gefa hundinum sínum lambakjötsbita einu sinni á ári - á jóladag, en það mun vera áfram íslenskt lambakjöt - Púkinn vill ekki gera hundinum sínum það að gefa honum þennan nýsjálenska óþverra sem gengur undir sama nafni.

Nei, ef menn vilja flytja inn erlent kjöt, þá ættu þeir að horfa á nautakjötið - Púkinn myndi gjarnan vilja sjá alvöru argentínskar nautalundir á boðstólum hér.

Ekki fullreynt með lambakjötið

Bullandi, falin verðbólga

Enn heldur krónan áfram að styrkjast - eða hvað?

Það er nefnilega ekki svo einfalt að við séum raunverulega með sterkan gjaldmiðil, heldur stendur þessi blessaða íslenska króna á óttalegum brauðfótum.

Seðlabankinn er fastur í vítahring.   Það vita allir að útflutningsfyrirtækjum, bæði í sjávarútvegi og öðrum greinum er að blæða út, vegna gengis krónunnar, en ef Seðlabankinn myndi lækka vexti gæti það leitt til samdráttar í útgáfu jöklabréfanna, gjaldeyrir myndi hætta að flæða inn í landið og krónan snarfalla, sem aftur myndi leiða til hækkunar á innfluttum varningi, sem á endanum myndi koma fram sem verðbólga, en forgangsmarkmið seðlabankans er einmitt að halda verðbólgunni niðri.

Vandamálið er bara það að sú verðbólga er í rauninni þegar til staðar - hún er bara falin vegna  hágengisins.

Púkinn vill í raun fullyrða að hávaxtastefna Seðlabankans sé í rauninni afar gagnslítið stjórntæki.   Þeir sem vilja taka lán í erlendum gjaldmiðli á mun lægri vöxtum gera það, þannig að háir vextir slá ekki á þensluna - það eina sem þeir gera er að valda röskun í efnahagslífinu - háir vextir gera útgáfu jöklabréfa áhugaverða, sem styrkir krónuna, sem gerir innflutning "ódýran" - innflytjendur og heildalar græða sem aldrei fyrr, meðan útflutningsfyrirtækin lepja dauðann úr skel.

Hágengisstefnan er að leggja staði eins og Flateyri í eyði og hrekur hátæknifyrirtækin úr landi.  
Ef svo fer fram sem horfir mun þessi spilaborg hrynja á endanum og íslenskt efnahagslíf verður þá sem brunarúst, þar sem ekkert stendur eftir nema fjármálafyrirtækin.

Styrking krónunnar hefur ekki skilað sér út í verðlagið

Listamaður étur hund

Listamaðurinn Mark McGowan mun borða Corgi hund í beinni útsendingu á Resonance FM 104.4 í London næstkomandi þriðjudag.

Það fylgir að vísu ekki sögunni hvort hundurinn verður borinn fram með sósu og grænmeti eða frönskum kartöflum.  Ástæða þessa gjörnings mun vera mótmæli gegn aðgerðaleysi breskra dýraverndunarsamtaka vegna refaveiða konungsfjölskyldunnar, en Corgi hundarnir munu víst vera uppáhaldshundar drottningarinnar.

Listamaðurinn er áður þekktur fyrir að hafa borðað svan og að hafa ýtt jarðhnetu gegnum London með nefinu. 

Ættleiðingar samkynhneigðra

Carlos og Fernando hafa verið par síðan þeir komu út úr skápnum fyrir fimm árum síðan.

Þar sem þeir geta af augljósum ástæðum ekki eignast afkvæmi saman, en hafa báðir mikinn áhuga á að sinna foreldrahlutverkinu er úr vöndu að ráða. 

Sem betur fer fyrir þá þurfa þeir ekki að standa í stríði við neinn varðandi þær óskir - þeir eru nefnilega flamingóar. 

Undanfarin ár hafa þeir rænt eggjum annarra fugla og ungað þeim út, en í ár bar svo við að ákveðið var að leyfa þeim að "ættleiða" egg sem foreldrarnir höfðu yfirgefið.

Að sögn dýravarða við Wildfowl & Wetlands Trust í Slimbridge, Englandi, eru Carlos og Fernando umhyggjusamir, skiptast á um að fóðra ungana sem þeir ala upp.

Nánari upplýsingar má finna á pinknews.co.uk, en starfsmenn munu víst vera nokkuð forvitnir um hvort ungar þeirra muni hneigjast til síns kyns eða þess gagnstæða - spurningin um erfðir og uppeldi.

Skemmdarverkahúsmæður

Það að vinna skemmdarverk á eignum annarra er ákveðið merki um vanþroska - flestir krakkar vaxa upp úr því um 5 ára aldurinn, en því miður eru einhverjir sem gera það ekki.

Sú staðreynd að umrædd kona var með barnastól í bílnum gæti bent til þess að hún ætti börn - og sé svo, þá vorkennir Púkinn því barni, að þurfa að alast upp hjá svona foreldri - það liggur við að manni finnist dapurlegt að það eru strangari kröfur gerðar til þeirra sem vilja eignast hund en til þeirra sem vilja eignast börn.

Púkinn hefur annars oft ritað um þann sóðaskap sem veggjakrot er og vill gjarnan sjá gripið til aðgerða, en eins og staðan er, þá má Púkinn ekki einu sinni setja upp eftirlitsmyndavél með upptökubúnaði á sínu eigin húsi til að fylgjast með skemmdarvörgum. 

Kona „graffar" í skjóli nætur