Púkablogg

Fimmtudagur, 15. nóvember 2007

100.000 flettingar, takk, takk, takk ...

Teljarinn skreið í 100.000 í dag og Púkanum fannst því tímabært að þakka fyrir sig, en í leiðinni að velta fyrir sér hvers vegna nokkur nennir að lesa það sem svona lítið skrýtið blátt fyrirbæri hefur að segja um mannlífið.

Á þeim mánuðum sem eru liðnir frá því að Púkabloggið byrjaði eru greinarnar orðnar 348, en misgáfulegar eins og gengur og gerist. Ef einhver myndi nenna að lesa í gegnum allar greinarnar myndi viðkomandi sjá að Púkinn skrifar sjaldan um persónuleg málefni, en flestum greinunum má skipta í nokkra hópa, sem er lýst að neðan, ásamt hlekkjum yfir á nokkrar valdar greinar.

Þar sem sá sem stendur á bak við Púkann er mikill áhugamaður um tölvur, tækni og önnur "nördaleg" efni ætti ekki að koma á óvart að allmargar greinar fjalla um þau mál.

Púkanum er uppsigað við vaxandi firringu í þjóðfélaginu, sem meðal annars kemur fram í gengdarlausu bruðli og virðingarleysi fyrir eigum og réttindum annarra.

Púkinn er ekki trúaður, en skrifar oft um trúmál, því meira því fjarstæðukenndari sem trúarskoðanirnar eru og því meiri mannfyrirlitningu sem þær lýsa á "öðrum".

Púkinn á fáa samkynhneigða kunningja, en nokkrar af greinunum fjalla um þeirra mál, eða frekar um þá fordóma sem þeir þurfa að fást við.

Þótt Púkinn sé ekki mjög pólitískur að eðlisfari finnur hann sig stundum knúinn til að hnýta í heimskulegar ákvarðanir ráðamanna landsins.

Góð menntun er að mati Púkans mikilvægari en flest annað.

Það má í rauninni segja að rauði þráðurinn í gegnum greinar Púkans sé "blogg gegn heimsku", í hvaða mynd sem hún birtist.

Að lokum vill Púkinn aftur þakka þeim sem hafa haft þolinmæði til að lesa skrif hans á þessu ári.

Meginflokkur: Bloggar | Aukaflokkur: Vinir og fjölskylda | Facebook

Athugasemdir

púki minn...þú ert bara ómissandi! Þannig er það!

Anna Benkovic Mikaelsdóttir, 15.11.2007 kl. 22:06

Ég er sammála langflestu sem Púkinn skrifar. Þegar ég er ósammála, hika ég samt ekkert við að skrifa það niður. Mér virðist Púkinn virða skoðanir annarra og kann ég honum þakkir fyrir það.

Sigurjón, 16.11.2007 kl. 03:02