Blogg um frétt um blogg um frétt um auglýsingu

Nú býður Morgunblaðið fólki að skrifa blogggreinar um frétt Morgunblaðsins um blogggreinar sem eru skrifaðar um frétt Morgunblaðsins um sjónvarpsauglýsingu.

Púkinn reynir nú oftast að vera málefnalegur í skrifum sínum, en það er virkilega erfitt í þessu tilviki.

Og auglýsingin sjálf - tja - hún hefur óneitanlega fengið góða umfjöllun - ætli það fái ekki einhver klapp á bakið fyrir að hafa látið sér detta þetta í hug.

Á meðan geta bloggarar bloggað um fréttir um blogg bloggara um fréttir um blogg bloggara um fréttir um...

Miklar umræður á meðal bloggara um nýja auglýsingu Símans

Réttindalausir unglingar á torfæruhjólum

Púkinn hefur verið að velta fyrir sér hvað sé að hjá þeim foreldrum sem leyfa börnum sínum að aka réttindalaus á torfæruhjólum, en verður að viðurkenna að hann hefur ekki komist að niðurstöðu.

Það er hins vegar eitt sem Púkinn er viss um og það er að foreldrarnir verða argir ef þeir heyra að Púkanum finnist ekki allit í lagi með viðkomandi, og líta sennilega bara þannig á að þetta séu "bara strákar að leika sér."

Púkinn lítur hins vegar þannig á að þarna séu óábyrgir foreldrar að kenna börnum sínum að það sé allt í lagi að hafa lög og reglur að engu og það sé allt í lagi þótt maður slasi sig - það verður bara lappað upp á mann á kostnað samfélagsins.

Er ekki eitthvað að þessu? Eru foreldrarnir bara að bíða efir alvarlegra slysi?

Unglingsdrengur slasaðist á torfæruhjóli

Kafbátahöfn í Reykjavík!

Íslenskir milljarðamæringar fylgjast ekki með auðmannatískunni.  Nei, þeir eru önnum kafnir við að kaupa sér einkaþotur og þyrlur, þegar allir vita að það er enginn milli með millum nema hann eigi sinn eigin einkakafbát.

Sjáið til dæmis þennan gula kafbát hér - sérsmíðaður fyrir Paul Allen (sem stofnaði Microsoft ásamt Bill Gates) fyrir litlar 12 milljónir dollara. 

Svona eiga alvöru millafarartæki að vera.

En, eitt stendur í vegi fyrir kafbátavæðingu  íslenskra auðmanna - skortur á góðri kafbátahöfn í Reykjavík.

Eða hvað?  Er ekki neðsti bílakjallari tónlistahallarinnar undir sjávarmáli?  Lítið mál að opna bara lúgur út í haf svo menn geti siglt inn á kafbátunum sínum.

Trúarbrögð skaðleg?

Púkinn fagnar þeirri niðurstöðu að næstum annar hver Breti telji trúarbrögð skaðleg - en betur má ef duga skal.

Í gegnum mannkynssöguna hafa trúarbrögð verið einn versti skaðvaldurinn sem mennirnir hafa fundið upp.  Fjöldamorð hafa verið fram í nafni trúarbragða og þau notuð sem stjórnunartæki til að halda þjóðfélagshópum niðri.

Sem betur fer hafa trúarbrögðin ekki lengur þau kverkatök á vestrænum þjóðfélögum sem þau höfðu á fyrri öldum, en margt er í raun líkt með miðöldum Vesturlanda og sumum löndum múslíma í dag hvað þetta varðar.  Kirkjunnar menn komu því til leiðar að fólk var tekið af lífi hérlendis, fyrir sakir sem þættu lítilvægar í dag, en sama á við um sumt í Sharia lögum múslíma frá sjónarhóli okkar.

Nei, sem betur fer hefur samfélag okkar þróast þannig að trúarbrögð skipta flesta litlu sem engu máli - flestir láta ekki gamlar skræður, samdar af misvitrum mönnum í ólíkum menningarsamfélögum ráða gerðum sínum.

Því fleiri sem hugsa sjálfstætt, í stað þess að láta trúarbrögðin stjórna hugsun sinni, því betra.

Annar hver Breti telur trúarbrögð skaðleg

"Ég hef týnt belju"

Sumar auglýsingar eru tær snilld (samanber "Changes" auglýsingu Morgunblaðsins), en aðrar eru þannig að Púkinn skilur ekki hvað menn eru eiginlega að hugsa.

Er verið að reyna að búa til auglýsingu sem er svo hræðileg að allir taki eftir henni - þá væntanlega með það í huga að einhver athygli sé betri en engin?

"Ég hef týnt belju" auglýsingin frá Vodafone er dæmi um þetta.

Það sem Púkinn var hins vegar að velta fyrir sér var ekki hvaða auglýsingastofa stæði á bak við þetta, heldur hversu margir húmoristar muni hringja í Vodafone og segjast hafa týnt beljunni sinni....og hvort aumingja fólkið á símanum hafi eitthvað staðlað svar við þessu vandamáli.

Endurholdgun í leyfisleysi

Kínversk stjórnvöld munu nýlega hafa samþykkt lög þar sem Búddamunkum er bannað að endurholdgast án heimildar.

Þetta ljómar svolítið furðulega, en mun væntanlega vera svar Kínverja við yfirlýsingu Dalai Lama, þar sem hann tilkynnti að hann myndi ekki endurholdgast í Tíbet meðan hernám Kínverja stæði enn.

Næsti lama mun því væntanlega fæðast meðal útlaga frá Tíbet, sem finnast víða um lönd, þannig að Kínverjar munu ekki geta valið næsta andlegan leiðtoga Tíbeta - en það er væntanlega tilgangurinn með yfirlýsingu Dalai Lama.

Trúarbrögð eru hættuleg - en þegar trúarbrögð og stjórnmál blandast saman er það hálfu verra. 

Að byrja 19..18..17..16..15 ára í háskóla

Möguleikar nemenda til að stytta nám sitt hafa aukist á undanförnum árum.  Púkinn er fylgjandi þeirri þróun, enda var hann sjálfur 18 ára þegar hann hóf háskólanám.

Spurningin er samt hvort þetta sé komið út í öfgar - hvort allir nemendur hafi félagslegan þroska til að hefja háskólanám á þeim aldri - vitsmunalegur þroski er ef til vill ekki nægjanlegur einn og sér.

Það má vera að einhverjir hvái yfir því að unnt sé að byrja háskólanám 15 ára, en það er ekki svo fáránlegt.

• Hluti nemenda er færður upp um bekk strax við upphaf skólagöngu, eða fær að hefja skólagöngu ári á undan jafnöldrum.  Þar sparast eitt ár.
• Sumir nemendur fá að hlaupa yfir 10. bekk - eru teknir inn í menntaskóla strax eftir þann 9., en þar sparast annað ár.
• Í menntaskólum með áfangakerfi er unnt að ljúka námi í menntaskóla á 2.5 árum, jafnvel þótt nemendur fái engar einingar metnar inn. (Þetta var a.m.k. mögulegt þegar Púkinn var í menntaskóla og hefur tæplega breyst).  Hefji nemendur nám með einhverjar einingar metnar inn, gætu þeir mögulega stytt námið um hálft ár til viðbótar og lokið því á 2 árum.  Nú, svo er auðvitað menntaskólinn Hraðbraut. Hér er unnt að spara tvö ár til viðbótar.
• Að lokum (já, það er svolítið svindl) getur fólk átt afmæli í lok árs og verið því ári yngra á pappírnum þegar skólaárið hefst.

Púkinn er þeirrar skoðunar að skólakerfinu beri að veita góðum nemendum viðfangsefni við hæfi, en eð "leysa" vandamálið eingöngu með því að leyfa þeim að flýta sér í gegnum kerfið er ef til vill ekki besta lausnin.

Björgum björgunarsveitunum

Fréttir undanfarinna daga af umsvifamikilli leit björgunarsveita að horfnu Þjóðverjunum ættu að duga til að minna landsmenn á hve mikilvæg starfsemi þeirra er.  Starfsemi björgunarsveitanna kostar hins vegar sitt en flugeldasala þeirra er langsamlegasta mikilvægasta tekjulindin - það er ekki svo gott að björgunarsveitir landsins byggi á styrkjum frá ríki eða sveitarfélögum.

Vandamálið er hins vegar það að á undanförnum árum hafa ýmsir aðrir verið að seilast inn á svið flugeldasölu - íþróttafélög, trúarhópar, já og jafnvel einkaaðilar sem standa í þessu í hreinu gróðaskyni.

Nú má ekki skilja Púkann þannig að hann sé á móti því að menn græði - síður en svo.  Hins vegar gerir Púkinn kröfu um ákveðið siðferði í þessum málum og þegar flugeldasalar eru farnir að villa á sér heimildir, þannig að fólk heldur að það sé að versla hjá björgunarsveitunum þegar það er í raun að styðja einkaaðila, þá finnst Púkanum nóg komið.

Það er að vísu langt til næstu áramóta, en Púkanum finnst samt rétt að minna fólk á mikilvægi björgunarsveitana og vill hvetja alla flugeldakaupendur til að kaupa kaupa hjá þeim.

Eitt lítið dæmi um hækkun fasteignaverðs

Einu sinni átti Púkinn (og frú Púki) hús.  Það hús var keypt fyrir um 14 milljónir og selt síðar fyrir aðeins hærri upphæð.  Þetta var árið 1994.

Núna var þetta sama hús að koma aftur á sölu, nema hvað nú eru settar litlar 69 milljónir á húsið.

Þegar maður sér svona dæmi þá verða þessar hækkanir einhvern veginn mun áþreifanlegri en áður.

Best að byrja að heilaþvo krakkana snemma

Púkinn ber ekki mikla virðingu fyrir trúarbrögðum og gildir þá einu hvort um er að ræða nýleg fyrirbæri eins og Vísindakirkjuna, eða önnur eldri sem eiga rætur árþúsundir aftur í tímann.

Sé málið skoðað nánar, er munurinn nefnilega næsta lítill - trúarbrögðin eru byggð upp í kringum sterkan stofnanda og síðar ýmsa arftaka hans.  Öll trúarbrögð lofa fylgjendum sínum öllu fögru ef þeir fara eftir fyrirmælum stofnendanna, eða a.m.k. fyrirmælum þeirra eins og leiðtogar hvers tíma túlka þau.  Öll þykjast trúarbrögðin hafa fundið hinn eina stóra sannleik í einhverju formi.

Til að viðhalda trúarbrögðum þurfa að koma til nýjar og nýjar kynslóðir safnaðarmeðlima - þetta er ekki vandamál í sumum menningarsamfélögum þar sem aðeins ein trúarkenning er í boði og þeir nánast réttdræpir sem ekki fylgja línunni, en í öðrum löndum, eins og Bandaríkjunum er framboðið meira - fólk getur valið hvaða dellu það vill trúa.

Foreldrar vilja gjarnan að börn þeirra fylgi sömu trúarskoðunum og þau sjálf og besta leiðin til þess er nú bara að byrja að heilaþvo krakkagreyin nógu snemma.

Sumarbúðir vísindakirkjunnar eru ekkert frábrugðnar sumarbúðum annarra trúarhópa hvað þetta varðar.

Boðskapurinn er hins vegar jafnvel enn meira kjaftæði en boðskapur margra annarra, en Púkinn hefur áður minnst á það (sjá þennan hlekk eða þennan helkk).

Að lokum, hér hemur ein æfing Vísindakirkjunnar, sem er hluti af þjálfunarprógrammi OT-VII stigs:

OT7-48

1.   Find some plants, trees, etc., and communicate to them individually until you know they received your communication.

2.   Go to a zoo or a place with many types of life and communicate with each of them until you know the communication is received and, if possible, returned.

Það er nefnilega það.

Tom Cruise sendi börn sín í sumarbúðir Vísindakirkjunnar