Þarf fleiri og stærri fangelsi?

Það er auðvelt að bregðast við fréttum um yfirfull fangelsi með því að heimta að fleiri og stærri fangelsi verði byggð.

Það er hins vegar allt annað mál hvort það er rétta lausnin, en í því sambandi er best að skoða hinn þrefalda tilgang fangavistar. 

Refsing 

Í fyrsta lagi þjónar fangavist þeim tilgangi að refsa fanganum - hugmyndin er að fangelsun hafi fælingarmátt - menn vilji fyrir alla muni forðast að lenda þar inni - og þeir sem lenda inni vilji forðast að koma þangað aftur. Til þess að fangavistin hafi fælingarmátt mega fangar hins vegar ekki líta á hana sem "hvíldardvöl", eins og sagt er að sé viðhorf sumra fanga - sér í lagi af austur-evrópskum uppruna.  Frá þessum sjónarhóli er hægt að mæla árangur fangavistarinnar út frá "endurkomutíðni" - því minni líkur sem eru á að menn lendi ítrekað á bak við rimlana, því betur er kerfið að standa sig.  Japanska fangelsiskerfið er sagt státa af mjög lágri endurkomutíðni, enda er fangelsisvist þar víst frekar niðurdrepandi - það mun vera regla fremur en undantekning að mönnum sé haldið í einangrun langtímum saman.  

Mannbæting

Í öðru lagi þjónar fangavist þeim tilgangi að "bæta"fangann - gera hann að betri manni sem ekki brjóti af sér aftur.  Hér er aðallega horft til menntunar og þess að losa fangann við eiturlyfjafíkn.  Til að fangelsið virki sem meðferðarstofnun verður hins vegar rétt meðferð að vera í boði, starfsfólk verður að hafa rétta þjálfun og meðferðinni verður að vera fylgt eftir þegar fanginn er kominn aftur út í samfélagið.  Þetta mætti bæta verulega á Íslandi.

Verndun samfélagsins

 Í þriðja lagi þjónar fangavist þeim tilgangi að vernda samfélagið gegn fanganum -hugmyndin er sú að viðkomandi brjóti ekki meira af sér meðan hann er bak við lás og slá.  Þetta á sérstaklega við þegar um geðsjúka afbrotamenn er að ræða, eða ofbeldishneigða síbrotamenn.

Það er staðreynd að fangelsismál hér á landi eru ekki í góðu lagi, en hvað er hægt að gera?  Púkinn myndi vilja sjá eftirfarandi:

• Sérstakt öryggisfangelsi fyrir erlenda fanga sem stendur til að vísa úr landi eftir afplánun.  Það er engum greiði gerður með því að leyfa þeim að stofna til tengsla við íslenska fanga.  Þetta er sérstaklega mikilvægt ef erlendu fangarnir hafa tengsl við erlend glæpasamtök.

• Stórlega bætt afvötnun/fíkniefnameðferð - það eru of margir fangar sem fremja afbrot til þess að fjármagna neyslu - það er engin von til að þeir láti af því nema það takist að stöðva neysluna.

• Ef fíkniefnameðferð ber ekki árangur og viðkomandi einstaklingur heldur áfram afbrotum eftir að hafa verið sleppt út, jafnvel í annað, þriðja eða fjórða sinn, er ljóst að
  refsing og mannbæting virka ekki á viðkomandi - í þeim tilvikum er tvennt til ráða - það mætti gefa viðkomandi sitt dóp frítt og undir eftirliti, þannig að hann þurfi ekki að fjármagna neysluna með afbrotum.  Hin lausnin er að loka viðkomandi inni til lengri tíma - í þeim tilgangi að vernda samfélagið gegn viðkomandi.

140 dæmdir menn á biðlista

Athugasemdir

[Þorsteinn Briem, 10.5.2008 kl. 12:55]

Hæsti refsingarstuðull (einangrun) = 1

Hæsti mannbætingarstuðull (menntun) = 1

Hæsti verndunarstuðull (öryggisfangelsi) = 1

Samkvæmt útreikningum dómastrumpsins Bíbí, vinar míns:

Engin einangrun þá: 0 x 1 x 1 = 0

Engin menntun þá: 1 x 0 x 1 = 0

Ekkert öryggisfangelsi þá: 1 x 1 x 0 = 0

Niðurstaða: Best er að mennta fanga í einangrun í öryggisfangelsum.

Ergó: Eingöngu skal reisa hér öryggisfangelsi og þar skal mennta fanga í einangrun, einkum í lögfræði og afbrotafræði.

Hvernig mennta skal fanga í einangrun er hins vegar síðari tíma verkefni.

[Sæll , 10.5.2008 kl. 16:35]

Ég er með lausn, lögleiðum fíkniefni, glæpir fækka um allavega 60%.

Seljum fíkniefni eins og við seljum áfengi og tóbak.

Notum gróðann af því í forvarnir.

Í Sviss eru sprautufíklar sprautaðir frítt á sjúkrahúsum, það hefur valdið því að glæpum hefur fækkað um 60%, ekkert hefur verið um ofskammta eða smitsjúkdóma í 13 ár síðan Sviss tók þetta upp.

www.leap.cc

Kveðja Andri

[Púkinn, 10.5.2008 kl. 16:48]

Almenn lögleiðing myndi ekki ganga upp - en svissneska fyrirkomulagið væri til bóta fyrir þjóðfélagið.

[Sæll , 10.5.2008 kl. 18:06]

Af hverju gengur almenn lögleiðing ekki upp? er núverandi stefna að virka svona vel?

Núverandi stefna takmarkar enganvegin aðgengi að fíkniefnum, því að velja þessa leið þá? 

[Sæll , 10.5.2008 kl. 22:41]

Menn munu nota fíkniefni sama hvort efnin eru lögleg eða ólögleg, með lögleiðingu verða fíkniefnasalarnir atvinnulausir og ríkið gæti haft skatttekjur af sölunni.

Afbrot af fíkniefnaneitendum eru aðallega til að fjármagna fíknina, en verðið er auðvitað fáránlega hátt á einhverju sem er nánast verðlaust. 

Svo má með sanni segja að ríkið bókstaflega drepi sprautufíklana á Íslandi með stefnu sinni gagnvart þeim, svona ef við berum okkur saman við Sviss.

Það hefur engin sprautufíkill dáið í Sviss í 13 ár.

[Jón Finnbogason, 10.5.2008 kl. 23:35]

Mjög góð grein um fangelsismál, minna þarf ráðamenn á þetta fyrir næsta steypusamning.

Svo á að sjálfssögðu að leyfa fíkniefni, það er ekki til neins að banna fólki skaðlausa iðju. Reyndar þarf að draga úr fíkniefnaneyslunni, það er til háborinnar skammar að fólk noti eiturlyf.